Be Nitie Ng’at Madewa Gadier?

Be nitie kinde misewinjo e chunyi ka gima in kendi, kendo onge ng’ama nong’eyo gadier chandruoge ma ne in godo? To kata kapo ni jomoko nong’eyo wach chandruogego, ne ineno ni ne ok gidewi ngang’.

SECHE ma wan e chandruok, ngimawa chalo ka kodh yamo mager maok bi rumo. Seche moko wanyalo kata mana ng’ado ni chandruok ma wan-go duong’ ahinya makoro ok wanyal dhi nyime nano. Pile, mano e kaka wawinjo sama wayudo chandruok makelonwa parruok ahinya, aksident marach, tuwo maok rum, kata gik machalo gi magi. Wanyalo nwang’o ka wan kama tek ahinya kendo ka waonge geno, mi wapenjre ni to kare wabiro yudo hoch kune. Be nitie ng’at madewowa gadier?

“Nyasach Hoch Duto” Dewowa

Muma luongo Nyasaye ni, “Wuon ng’wono, kendo Nyasach hoch duto.” (2 Jo Korintho 1:3) Nyasaye, ma nyinge en Jehova, ong’eyo ni wadwaro hoch. “Hoch” en wach ma Muma tiyogo e yore mopogore opogore mokalo mia achiel, kosingonwa ni Nyasaye ok ong’eyo ang’eya chandruoge mwayudo, to bende en gi gombo mar hoyowa. Ng’eyo kamano miyo wabedo gadier ni kata kapo ni jomoko nenre ni ok dew, kata ok gitim gimoro e wi chandruok ma wan-go, Jehova Nyasaye to neno kendo odewowa gadier.

Ndiko konyowa neno maler kaka Jehova dewo ji, ok mana ka gin kaka oganda, to bende ka gin ng’ato achiel achiel. Muma wacho ni: “Wang’ Jehova ni kuonde duto; morango pile jo maricho kod jo mabeyo.” (Ngeche 15:3) Kamano bende, wasomo e Ayub 34:⁠21, niya: ‘Wang’e ng’iyo yore mag dhano, kendo oneno wuodhene duto.’ Jehova neno gigo mwatimo—mabeyo kata maricho⁠—⁠kendo ong’eyo chal marwa, omiyo onyalo yiero konyowa e yore mago ma en owuon oneno ni ber. Wanyalo ng’eyo mae kwanono weche ma Hanani janabi nowacho ne Ruoth Asa mar Juda kama: “Nimar wang’ Jehova ong’iyo piny duto koni gi koni, ni mondo tekone onyisre ni jogo ma chunygi lony kare e nyime.”—2 Weche mag Ndalo 16:⁠7, 9.

Jehova ng’iyowa koritowa nikech wach moro machielo bende. Yesu lero niya: “Onge ng’a ma nyalo biro ira, ma ok Wuoro ma noora e moywaye.” (Johana 6:⁠44) Jehova dewo ji ahinya e okang’ mamiyo onono ka chuny ng’ato dwaro ng’eye e yo momedore. Ka en kamano, to Jehova nyalo konyo jalo ahinya. Kuom ranyisi, e piny Dominican Republic, dhako moro ne ni osiptal mondo otimne yeng’o nikech tuwo mar kansa. Nosayo Nyasaye okonye mondo oyud din madier. Kae to bang’e, chwore nokelone brosua miluongo ni, Nyasaye Dwaro ni Mondo Watim Ang’o? * ma ne oyudo Joneno mag Jehova oa miye gokinyino kane gibiro e ode. Dhakono nosomo brosuano, mofwenyo ni mano ema ne en dwoko mar Nyasaye kuom lamone. Ne oyie ni mondo Joneno opuonjre kode Muma, kendo bang’ kinde matin ne dweche auchiel, nochiwo ngimane ne Nyasaye mi obatise.

E bug Zaburi ei Muma, wayudo weche mang’eny  majiwo chuny, ma gin weche ma ne ondiki gi chwo moko ma Jo-Hibrania kaka Ruoth Daudi, kendo wechego lero kaka Jehova dewo jotichne. E Zaburi 56:⁠8, wayudo kanyo ka Ruoth Daudi sayo Nyasaye kama: ‘Kan pi wang’a e chupani. Ok gin e kitapi koso?’ Mana kaka ranyisino konyowa neno, Daudi nong’eyo ni Jehova ok ong’eyo mana chandruok ma ne oyudo kende, to bende ong’eyo kaka gichando chuny ng’ato. Jehova nong’eyo lit ma Daudi ne nigo, kendo noparo kaka chuny Daudi ne chandore mamiyo pi wang’e ne chwer. Kuom adier, Jachwechwa rango kendo ong’iyo jogo duto manyiso kinda e timo dwaro mare, “jogo ma chunygi lony kare e nyime.”

Kama chielo ei Muma manyiso kaka Nyasaye dewo ji e yor hera, en Zaburi mong’ere ahinya mar 23. Weche mokwongo mag Zaburino nyiso ni Nyasaye en kaka jakwath ma jahera niya: ‘Jehova e Jakwadha. Ok anachand gimoro.’ E pinje mag Asia, jakwath rito kendo dewo rombene ahinya, kendo omiyo moro ka moro nying’. Pile ka pile oluongo rombo ka rombo ire, kendo omule komanyo kama dibed ni ohinyore. Kapo ni oyudo kama ohinyore, owiroe mo mondo omi kanyo ochang mapiyo. Kapo ni rombo tuwo, mano nyalo miyo jakwath ochun yath e dwond rombono, kokonye chung’ mondo kik onyosore mi otho. Kuom adier, mano en ranyisi makonyowa ng’eyo kaka Jehova dewo jogo ma dhi ire ka manyo kony.

Lamo kod Chier ​—⁠Ginyiso ni Nyasaye Dewo Ji

Zaburigi koda mamoko mabeyo ok ondiki ei mana ni mondo wasomgi kendo gimorwa  amora. Ginyisowa kaka jotich Nyasaye ma ne ochung’ motegno e kinde machon, ne wacho ne Jehova duto ma ne nie chunygi, ka ginyisogo ni gidwaro kony kuom Nyasaye, kendo nyiso ni giyie gi yore ma otayogi godo koda gweth mochiwo. Wechego nyisowa maler ni jotich Nyasaye machon-go ne nigi yie motegno ni Nyasaye dewogi gadier. Somo kendo paro matut kuom weche ma ne giwacho kowuok e chunygigo, nyalo konyowa bedo gi paro kaka ma ne gin-go kuom Nyasaye. Mich mar bedo gi thuolo mar wuoyo gi Nyasaye e lamo en ranyisi maduong’ ahinya ni Nyasaye dewowa.

Kata kamano, nitie seche ma chandruok hewowa ahinya, mi chop kama ok wang’eyo kata kaka onego walem. Be mano mono Jehova ng’eyo chandruok gi parruok ma wan-go? Jo Rumi 8:⁠26 dwoko kama: ‘Kamano bende roho konyo nyawowa; nikech ok wang’eyo lemo kaka owinjore; to roho owuon kwayonwa kochur ahinya ma tamore wacho.’ Ndikoni nyisowa ni lamo mag jotich Nyasaye machon, ma gin lamo ma nondiki kokalo kuom much Nyasaye, nyalo chalo gi mekwa, kendo Jehova ma en ‘Jawinj kwayo mar ji’ nyalo winjogi ka gima gin lamowa wawegi.—Zaburi 65:2.

Geno mar chier bende en achiel kuom gik manyiso ratiro ni Nyasaye dewowa ng’ato ka ng’ato. Yesu Kristo nowacho kama: “Ndalo biro ma ji duto manie liete nowinj dwonde [Yesu], kendo giniwuog oko.” (Johana 5:⁠28, 29) Kaluwore gi dho-Grik, wach molok kae ni “liete” onego obed “liete mag rapar,” to ok mana “liete.” Wacho ni liete mag rapar en gima nyiso ni kit ngima ng’at mosetho en gima Nyasaye paro.

Par ane niya, Nyasaye biro duoko ng’at motho obed mangima kendo, nikech ong’eyo weche duto kuom ng’atno, kaachiel gi kaka kite maoko ne chalo chon, kido ma ne onyuolego koda mago ma ne obedogo bang’e, mi kendo oduok ne ng’atno paro duto ma ne en-go kapok otho. (Mariko 10:27) Paro ma Nyasaye nigo kuom ng’atno ok lal, kata mana bang’ higini gana gi gana. (Ayub 14:⁠13-​15; Luka 20:38) Kuom mano, ji bilionde mosetho nie pach Jehova Nyasaye kendo ong’eyo weche duto kuomgi —ma en gima nyiso gadier ni Nyasaye dewowa ng’ato ka ng’ato!

Jehova En Jachiw Mich

En ang’o ma nyaka watim mondo omi Jehova oritwa kodewowa e yor hera? Gima duong’ en ni nyaka wanyis ni wageno kuome kendo wawinje, ka waketo yie kuome. Jaote Paulo nyiso tudruok mantie e kind keto yie kuom Nyasaye kod yudo rit mochiwo. Nondiko kama: “To ng’at ma onge yie ok nyal bet malong’o ni Nyasaye; nikech ng’at ma sudo ir Nyasaye nyaka obed gi yie ni Nyasaye nitie, kendo ni en gi mich momiyo jogo ma dware.”—Jo Hibrania 11:6.

Ne ni kit yie mamoro Nyasaye otenore kuom weche ariyo. Mokwongo, nyaka wabed “gi yie ni Nyasaye nitie,” kendo ni en e Jaloch Mamalo Chutho monego wawinj kendo walam. Mar ariyo, nyaka wabed gi yie ni en e ‘jachiw mich ne jogo ma dware.’ Bedo gi yie madier dwaro ni wang’e ni Nyasaye dwaro ne jogo duto matimo dwarone ngima maber, kendo omiyogi mich. Kuom puonjruok Wach Nyasaye kendo bedo kanyachiel gi jogo mawinje, in bende inyalo bedo gi kit yie manyalo miyo Nyasaye omiyi mich kaachiel gi rit maber.

Ji mang’eny kindegi wacho ni Nyasaye ok dew gik matimore e ngima dhano. Kata kamano, mana kaka waseneno, Muma nyiso maler ni Nyasaye dewo ahinya jogo manyiso ni gin gi yie madier kuome. Kata obedo ni ndalogi piny opong’ gi kuyo, parruok, koda lit, chunywa ok onego onyosore. Jehova Nyasaye dewowa gadier. Kuom adier, ogwelowa e yor hera ni mondo wamany kony kuome. Jandik-zaburi wacho niya: “Ket ting’ mari kuom Jehova, mi nopidhi; ok noyie jo matir oyiengini nyaka chieng’.”—Zaburi 55:22.

[Weche moler piny]

[Sanduk/Picha manie ite mar 27]

Ndiko Manyalo Konyi Bedo gi Yie ni Nyasaye Dewi

‘Wang’ Jehova ng’iyo piny duto koni gi koni, ni mondo tekone onyisre ne jogo ma chunygi lony kare e nyime.’—2 WECHE MAG NDALO 16:9

“Kan pi wang’a e chupani; ok gin e kitapi koso?”—ZABURI 56:8

“Jehova e jakwadha: ok anachand gimoro.”—ZABURI 23:1

“A in ma winjo kwayo mar ji, ji duto nobi iri.”—ZABURI 65:2

‘Iniluong nyinga, eka anaduoki. Chunyi noher tich mar lweteni.’—AYUB 14:15

“Ng’at ma sudo ir Nyasaye nyaka obed gi yie ni Nyasaye nitie, kendo ni en gi mich momiyo jogo ma dware.”—JO HIBRANIA 11:6

“Ket ting’ mari kuom Jehova, mi nopidhi; ok noyie jo matir oyiengini nyaka chieng’.”​—⁠ZABURI 55:22