Be Dinde Duto Beyo?

WADAK e piny ma nitie dinde mang’eny mopogore opogore. Nonro moro ma nyocha otim nyiso ni nitie dinde madongo 19, koda dinde matindo tindo madirom 10,000 e piny mangima. Dinde mopogore opogoregi osemiyo ji thuolo mar yiero din ma gidwaro. Be yiero din milemoe en wach maduong’?

Jomoko wacho ni dinde mopogore opogore gin mana kaka yore mopogore matero ng’ato e wi got moro. Kaluwore gi kaka gineno, onge pogruok kata bed mana ni iyiero yo mane, nimar yore duto tero ji kan moro achiel. Giwacho ni nitie mana Nyasaye achiel kende Manyalo Duto, omiyo nyaka bed ni dinde duto tero ji ire.

Be Yore Duto Tero Ji ir Nyasaye?

Yesu Kristo ma en achiel kuom jopuonj moluor ahinya kuom weche din, nowacho ang’o kuom wachni? Nowacho ne jopuonjrene kama: “Donjuru e rangach madiny.” Nikech ang’o? “Nikech rangano duong’, kendo yorno lach ma dhi e kethruok, kendo ging’eny ma donjoe. To rangano tin, kendo yorno diny ma dhi e ngima, kendo ginok ma nwang’e.”—Mathayo 7:13, 14.

Be kuom adier Yesu ne wacho kanyo ni nitie dinde moko matero ji “e  kethruok”? Koso gima ne opuonjo en ni jogo maok oyie kuom Nyasaye kende ema nie yo malach, to ni jo moyie kuom Nyasaye kata bed mana ni gin e din mane, pod gin e yo madiny matero ji e ngima?

Mapiyo bang’ wacho ni nitie mana yore ariyo kende, Yesu nowacho kama: “Ritreuru ni jonabi mariambo, ma biro iru gi lep rombe, to e igi gin mana ondiegi mangemo.” (Mathayo 7:15) Bang’e nowacho kama: “Ok ni ji duto ma luonga ni ‘Ruoth, Ruoth,’ e ma nodonji e pinyruodh polo; to mana ng’atno ma timo gi ma Wuora me polo dwaro.” (Mathayo 7:21) Kapo ni ng’ato luongore ni janabi, kata ka ng’ato wacho ni Yesu en ‘Ruodhe,’ wanyalo wacho ni jalo en ng’at ma jadin, kendo opogore gi ng’at maok oyie kuom Nyasaye. Kuom mano, nenore maler ni Yesu ne chiwo siem konyiso ni dinde duto ok dibed mabeyo, kendo ni ji ok onego ogen kuom jopuonj duto mag din.

Be Fwenyo Yo Madinyno Nyalore?

Nikech ok ni yore duto tero ji ir Nyasaye, ere kaka inyalo yudo yo madiny matero ji e ngima, e kind yore gana gi gana mantieregi? Par ane ranyisini: Wawach ni ilal ei taon moro maduong’. Ing’ado mondo ikwa kony kuom jomoko. Ng’at achiel wachoni gi chir ni dhi yor korachwich. Machielo jiwi mondo idhi yor koracham. To ema ng’at machielo to nyisi mondo iyier yo mineno iwuon ni ber kodi. Gikone, ng’at machielo to miyi map kata gima nyalo konyi ng’eyo yo makare monego iluw. Bang’e to omiyi mapno mondo ikonyri kode e wuoth. Donge inyalo bedo gadier ni ibiro chopo kuma idhiye?

Kamano bende, kodok korka yiero din makare, dwarore wabed gi gima inyalo gen chuth manyalo tayowa. Be gima chalo kamano yudore? Ee, oyudore. Mapno en Muma, kendo owacho ayanga kama: “Ndiko duto mowuok kuom much Nyasaye, konyo kuom puonjo ji, kuom kwero gik maricho, kuom rieyo ji, kendo kuom tiego ji mondo gibed jo makare.”—2 Timotheo 3:16.

Onge kiawa ni in gi Muma minyalo tiyo godo e yiero yor lamo makare. Joma ogoyo gasedni, ma gin Joneno mag Jehova, nigi gocho maber mar Muma miluongo ni, New World Translation of the Holy Scriptures e dho-Swahili kod Ingresa. Kata kamano, kapo ni ok in achiel kuom Joneno mag Jehova, nyalo bedo ni diher tiyo gi loko mamoko mag Muma sama inono wach din maber kata marach. Kuom mano, sula mago mibiro non e wi wachni tiyo gi weche mogol e loko mar The Bible in Luo, 1968.

Sama isomo sula maluwogi, pim weche ming’eyo koda mago ma Muma wacho. Ket e pachi weche mago ma Yesu nowacho manyiso kaka wanyalo pogo din maber kod marach. Nowacho kama: “Yien mabeyo duto nyago mana olemo mabeyo, to yien maricho nyago mana olemo maricho. Yath maber ok nyal nyago olemo maricho, kata yath marach ok nyal nyago olemo mabeyo.” (Mathayo 7:17, 18) Wanon ane mana adek kende, kuom olemo mabeyo, ma Muma wacho ni inyalo fweny godo “yath maber.”

[Weche manie ite mar 3]

Muma chalo gi map ma ng’ato nyalo tiyogo e yudo yor lamo makare