Be Chan En Gima Nyiso ni Nyasaye Ok Oyie gi Ng’ato?

NYASAYE nowacho ne Jo-Israel machon niya: “Jachan ok nobedie kuomi.” Mani ne en nikech Chik ma Nyasaye nomiyogi noting’o chike moko manyiso ni onego girit jochan, kata mana kuom wach gonyo ng’ato kuom gowi. (Rapar mar Chik 15:1-4, 7-10) Kuom mano, ne ok onego obedie jochan e kind Jo-Israel nimar Jehova nosingo ni ne odhi gwedhogi. Kata kamano, ne odhi gwedhogi mana ka giluwo weche manie Chik, to Jo-Israel ne ok otimo kamano.

Kata kamano, mano ne ok onyiso ni koro jogo ma ne gin jochan ne gin joma Nyasaye ok oyiego, mana kaka bedo gi mwandu ne ok onyiso ni koro Nyasaye oyie kod ng’ato. Thoth jogo ma ne ochung’ motegno e tiyo ne Nyasaye ne gin jochan e yor ringruok. Janabi Amos ne en jachan ma japith rombe kendo matiyo tije mag lwedo koyudore. (Amos 1:1; 7:14) Kane kech nie piny Israel e ndalo janabi Elija, nochuno mondo Elija okwa kony kuom chi liel moro ma jachan, ma mogo matin koda mo ma ne en-go, nomedo betie e yor hono kuom kinde duto mag kech. Elija kata chi lielno ne ok obedo jomwandu; Jehova nokonyogi yudo mana gigo madwarore.—1 Ruodhi 17:8-16.

Weche moko maok wang’eyo motelo kendo matimore apoya nyalo miyo wadonj e dhier. Masira moro kata tuwo nyalo mono ng’ato tiyo kuom kinde matin, kata mana chuth. Kendo tho nyalo miyo kiye koda mond liete obedie. Kata mana masiche ma kamago, ok nyis ni Nyasaye ok oyie kod jogo. Sigand Naomi kod Ruth nyiso maber kaka Jehova rito joma nie chandruok e yor hera. Kata obedo ni Naomi kod Ruth ne obedo jochan nikech tho mar chwogi, Jehova Nyasaye nogwedhogi kendo nochiwonegi gigo madwarore e ritogi.—Ruth 1:1-6; 2:2-12; 4:13-17.

Kuom adier, chan ok en gima nyiso ni Nyasaye ok oyie gi ng’ato. Jogo mochung’ motegno e tiyo ne Jehova Nyasaye, nyalo bedo gadier kuom weche Ruoth Daudi ma nowacho niya: “Nabedo nyathi, to koro ati; to ok aseneno ng’at matir kojwang’, kata kothe ka kwayo ji chiemo.”—Zaburi 37:25.

[Picha manie ite mar 8]

Kata obedo ni Naomi kod Ruth ne gin jochan, Nyasaye nogwedhogi kendo ritogi e yor hera