Be Nyasaye Singoni Mwandu?

‘Nyasaye dwaro ni ibed gi mwandu, ibed gi mtokni, ohala madhi maber. Bed mana gi yie kuome, donj mana ei ofuko, kendo imiye duto minyalo.’

KALUWORE gi gaset moro migoyo e piny Brazil, mago e weche ma dinde moko manie pinyno lando ne ji. En wach ma thoth ji mang’eny osekawo gi pek. Kaluwore gi nonro moro ma ne otim e piny Amerka kuom jogo maluongore ni Jokristo, gaset mar Time nowacho kama: “Pasent 61 mar ji ne nigi yie ni Nyasaye dwaro ni ji obed jomwandu. To pasent 31 . . . ne nigi yie ni ka imiyo Nyasaye pesani, to Nyasaye biro medo gwedhi gi pesa mang’eny.”

Paro ma kamago, ma gin paro ma onya ahinya e pinje mag Latin Amerka kaka Brazil, osemiyo ji opong’o kanise ma singonegi gweth mar mwandu moa kuom Nyasaye. Kata kamano, be en adier ni Nyasaye singo mwandu ne jogo matiyone? Be ji duto ma ne tiyo ne Nyasaye chon ne gin jomwandu?

En adier ni e Ndiko mag Dho-Hibrania, pile wasomo kuonde manyiso ni Nyasaye ne gwedho joge gi mwandu mag ringruok. Kuom ranyisi, wasomo e Rapar mar Chik 8:18 kama: “Nihing Jehova Nyasachi, nikech en e momiyoi teko mar yudo pith.” Wachni ne miyo Jo-Israel bedo gadier ni ka giwinjo dwond Nyasaye, to ne odhi miyo gibed oganda momewo.

To nade jotich Nyasaye ka gin ng’ato achiel achiel? Ayub jal ma noluoro Nyasaye, ne en jamwandu ahinya, kendo bang’ ka Satan nosekelone dhier, Jehova nodwoko mwandu Ayub “nyadiriyo.” (Ayub 1:3; 42:10) Ibrahim bende ne en jamwandu. Chakruok 13:2 wacho ni ne en “japith mar dhok, gi fedha gi dhahabu.” Kane jolweny mag ruodhi ma yo Ugwe omako Lut wuod owadgi Ibrahim, Ibrahim ‘nogolo joge ma nosepuonjo, ji monyuol e ode, ji piero apar adek gapar gaboro.’ (Chakruok 14:14) Kaachiel gi joge 318 “ma nosepuonjo” mong’eyo ting’o gi lweny, nyaka bed ni jood Ibrahim ne ng’eny. Bedo ni ne onyalo rito joot mang’eny kamano, nyiso ni ne en jamwandu ma nigi kweth mang’eny mar jamni.

Ee, thoth jogo ma ne ochung’ motegno e tiyo ne Nyasaye chon—Ibrahim, Isaka, Jakobo, Daudi, Suleman, kwahulo mana nying’ joma nok kuomgi—ne gin jomwandu. Kata kamano, be mano nyiso ni Nyasaye biro miyo ng’ato ka ng’ato matiyone obed jamwandu? To be dibed ni ka ng’ato odhier to koro mano nyiso ni Nyasaye ok ogwedhe kata ok oyie kode? Sula maluwo biro wuoyo kuom penjogi.