Mwandu Mawuok Kuom Nyasaye

KA IN jatich Nyasaye mochung’ motegno, be obiro gwedhi gi mwandu? Nyalo bedo kamano, to kata kamano dibed ni ok gin mwandu ma in iparo. Kaw ane ranyisi mar Mariam min Yesu. Malaika Gabriel ne ofwenyorene mowachone ni ne en ng’at ‘motimne ng’wono’ gi Nyasaye, kendo ni ne odhi nyuolo Wuod Nyasaye. (Luka 1:28, 30-32) Kata kamano, ok ne en jamwandu. Kane Mariam odhi golo chiwo bang’ nyuolo Yesu, nochiwo “akuche odugla ariyo, kata akuche matindo ariyo,” ma ne gin winy ma jochan chiwo ne Jehova.—Luka 2:24; Tim Jo-Lawi 12:8.

Be bedo ni Mariam ne en jachan nonyiso ni ne oonge gweth mar Nyasaye? Mopogore gi mano, kane odhi limo Elisabeth ma ne en watne, ‘roho maler nopong’o Elisabeth, mi okok gi duol maduong’ niya, “Mariam in ng’a moguedhi e kind mon, kendo nyathi mibiro nyuolo bende en ng’a moguedhi!”’ (Luka 1:41, 42) Mariam ne nigi gweth maduong’ mar bedo min Wuod Nyasaye mohero, e piny.

Yesu wuon ne ok en jamwandu. Ne ok onyuole mi odongo e alwora mar chan kende, ne ojachan kuom ngimane duto e piny ka. Chieng’ moro nowacho ne jal moro ma ne dwaro bedo japuonjrene niya: “Bwe ni gi buchegi, kendo winy mag polo ni gi utgi; to Wuod dhano onge ka ma doketie wiye.” (Luka 9:57, 58) Kata kamano, gima Yesu Kristo notimo kuom biro e piny nochiwo thuolo mondo jopuonjrene oyud mwandu moloyo ahinya. Jaote Paulo nondiko kama: “Nodoko jachan nikech un, mondo kuom chan mare udok jomwandu.” (2 Jo Korintho 8:9) Gin mwandu machalo nade ma Yesu nomiyo jopuonjrene? To nade e ndalowagi?

Mwandu Machalo Nade?

Kinde mang’eny, bedo gi mwandu mag ringruok ketho yie mar ng’ato, nikech gimiyo ng’ato geno pesane kar keto geno kuom Nyasaye. Yesu nowacho kama: “Nobed matek ngang’ ni jo man gi mwandu donjo e pinyruodh Nyasaye!” (Mariko 10:23) Omiyo, nenre maler ni mwandu ma Yesu ne dhi miyo jolupne ok ne gin mwandu mag ringruok.

Kuom adier, thoth Jokristo ma nodak e kinde joote ne gin jochan. Kane jal moro ma ne ong’ol nyaka a e tinne okwayogi pesa, Petro nodwoko niya: “Fedha gi dhahabu aongego; to gi ma an go, amiyi. E nying Yesu Kristo, ja Nazareth, chungi, iwuothi!”—Tich Joote 3:6.

Weche ma japuonjre Jakobo nondiko bende nyiso ni kanyakla mar Jokristo ne nigi jochan. Nondiko kama: “Owetena mahero, winjuru. Nyasaye ok noyiero jogo ma jochan e piny koso, mondo gibed jomwandu kor ka yie, kendo jocham gikeni mag pinyruoth ma nosingo ni jogo mohere koso?” (Jakobo 2:5) E wi mano, jaote Paulo bende nowacho ni ok thoth joma “nonywol mariek” kata “marateke” kata “ma nonywol ruodhi,” ema  ne oluongi mondo obed jokanyo mag kanyakla mar Jokristo.—1 Jo Korintho 1:26.

Ka mwandu ma Yesu nomiyo jolupne ok ne gin mag ringruok, to kare ne gin mwandu machalo nade ma nomiyogi? E barua ma Yesu nooro ne kanyakla mar Smurna, nowacho kama: ‘Ang’eyo chandruok mineno, kod chan mari to iramoko.’ (Fweny 2:8, 9) Kata obedo ni Jokristo ma ne ni Smurna ne gin jochan, ne gin gi mwandu mabeyo moloyo fedha gi dhahabu. Ne gin gi mwandu nikech yie margi koda chung’ margi motegno e tiyo ne Nyasaye. Bedo gi yie en mwandu nikech “ji duto ok gin jo moyie.” (2 Jo Thessalonika 3:2) Kuom adier, jogo ma onge gi yie, gin jochan e wang’ Nyasaye.—Fweny 3:17, 18.

Mwandu ma Bedo gi Yie Kelo

Kata kamano, yie en mwandu maduong’ moloyo e yore mage? Jogo ma nigi yie kuom Nyasaye yudo “ber mare mogundho, gi ng’wono mare, gi horruok mare.” (Jo Rumi 2:4) Bende gibedo gi gweth mar bedo jo ‘ma owenegi kethogi,’ nikech yie ma gin-go kuom misango mar rawar ma Yesu nochiwo. (Jo Efeso 1:7) E wi mano, ‘wach Kristo’ nigi rieko mokelo ne jogo ma nigi yie. (Jo Kolosai 3:16) Sama giwuoyo gi Nyasaye e lamo ka gin gi yie, “kuwe mar Nyasaye, modhierore ng’eyo” rito chunygi koda pachgi, kendo mano kelonegi mor.—Jo Filipi 4:7.

E wi gwethgi duto, jogo maketo yie margi kuom Nyasaye kokalo kuom Wuode Yesu Kristo, nigi geno mar dak nyaka  chieng’. Weche mong’ere ahinya mag Yesu Kristo gin magi: ‘Nyasaye nohero piny ahinya, omiyo nochiwo Wuode ma miderma, mondo ng’a ma oyie kuome kik lal, to obed gi ngima mochwere.’ (Johana 3:16) Geno majaberno bedo motegno sama ng’ato nigi ng’eyo malong’o e wi Wuoro koda Wuowi, nimar Yesu bende nowacho kama: “Mani e ngima mochwere, ni ging’eyi, in Nyasaye makende maradier, kod jal ma nioro, Yesu Kristo.”—Johana 17:3.

Kata obedo ni thoth gweth ma Nyasaye chiwo gin mag chuny, ber ng’eyo ni nitie bende gweth mag ringruok. Kaw ane ranyisi mar Dalídio modak e piny Brazil. Kapok nobedo gi ng’eyo malong’o e wi dwaro mar Nyasaye, ne en jakong’o. Timno ne oketho ahinya winjruokne gi joode. E wi mano, ne en gi chandruok kuom yore mag pesa. Bang’e, nochako puonjore Muma gi Joneno mag Jehova mi notimo lokruok madongo e ngimane.

Gigo ma ne Dalídio opuonjore koa ei Muma nomiyo oweyo yore maricho ma ne kelone hinyruok. Notimo dongruok mang’eny kaluwore gi puonj mag Muma, mochopo kama nowacho niya, ‘Ne athoro wuok e od kong’o moro to adhi e machielo; sani to adhi ot ka ot kalendo.’ Nobedo jal matiyo tij lando Wach Nyasaye kuom thuolone duto. Lokruok ma notimono nomiyo obedo gi ngima maber mar del, to bende nokonye rito pesane. Dalídio nowacho kama, “Pesa ma ne atiyo godo e madho kong’o, atiyogo sani e konyo joma nigi chandruok, kata e ng’iewo gigo ma adwaro.” Bende osebedo gi osiepe madier nikech riwruok gi jogo ma neno gik moko kaka Nyasaye nenogi. Dalídio sani nigi paro koda chuny mokuwe moloyo kaka ne en kapok ong’eyo Nyasaye.

Renato en ranyisi machielo manyiso kaka jogo maketo yie kuom Jehova Nyasaye bedo gi ngima mamor. Ka inene sani ka wang’e opong’ gi mor, ok diyie ni kinde moko ne otimne malit ahinya. Kane eka oa nyuole, min mare ne ojwang’e. Min mare ne oweye ka dende ohinyore marach e bag moro e bwo benj mar bet, ka pende bende pod ok ong’ad oko. Mon moko ariyo nokalo kanyo moneno ka bag sudo e bwo benjno. Mokwongo ne giparo ni ng’ato oweyo paka kanyo. Kane gifwenyo ni en nyathi ma eka oa nyuol, ne gireto mi gitere e osiptal man machiegni.

Achiel kuom mon-go ne en Janeno mar Jehova, kendo nonyiso Rita mabende en Janeno machielo, wach nyathino. Rita noyudo osebedo ka nyuolo nyithindo mosetho, kendo ne en mana gi nyathi achiel ma nyako. Nosegombo ahinya bedo gi nyathi mawuowi, omiyo ne ong’ado mar kawo Renato obed kaka nyathine.

Rita nowacho ne Renato ka Renato pod tin ni, en ok ne en min mare masie. Kata kamano, ne orite e yor hera kendo notemo puonje chike manie Muma. Kaka Renato nomedo dongo, e kaka nochako hero weche manie Muma. Bende nomedo nyiso erokamano kuom kaka ne ores ngimane e yo miwuoro. Pi wang’e hinyo  chwer sama osomo weche ma jandik-zaburi Daudi nondiko niya: ‘Chieng’ ma wuora gi mama nojwang’a, Jehova biro kawa.’—Zaburi 27:10.

Konyiso mor koda erokamano kuom duto ma Jehova osetimone, Renato ne ochiwore mondo obatise e higa 2002, kendo nokawo tij tiyo ne Nyasaye kuom thuolone duto e higa ma noluwo mano. Nyaka sani, pok ong’eyo wuon mare koda min mare masie, kendo dibed kata ni ok obi ng’eyogi ngang’. Kata kamano, Renato neno ni achiel kuom gweth madongo moloyo ma oseyudo, en ng’eyo Jehova kendo bedo gi yie kuome kaka Wuoro ma jahera kendo madewo joge.

Nyalo bedo ni in gi gombo mar bedo gi winjruok maber kendo machiegni ahinya gi Nyasaye, ma en winjruok manyalo miyo ngimani obed gi mor. Thuolo mar bedo gi winjruok ma kamano gi Jehova Nyasaye koda Wuode, Yesu Kristo, oyawre ne ji duto—gibed jomwandu kata jochan. Nyalo bedo ni timo kamano ok bi kelonwa mwandu mag ringruok, to kata kamano wabiro bedo gi kuwe ei chunywa koda e pachwa, ma gin gik ma pesa duto manie piny ok nyal ng’iewo. Weche mayudore e Ngeche 10:22 wacho adier niya: ‘Hap Jehova e makelo mwandu; kendo Jehova ok mi ji mwandu makelo parruok.’

Jehova Nyasaye ohero ahinya jogo madhi ire: “Ma di niwinjie chikna! eka dibedo gi kuwe kaka aora, gi tim makare kaka apaka me nam.” (Isaiah 48:18) Kendo osingo ni obiro gwedho ahinya jogo madhi ire gi chuny matir, niya: “Mwandu gi duong’ gi ngima e ma ng’a mamuol oyudo maluoro Jehova.”—Ngeche 22:4.

[Picha manie ite mar 5]

Kata obedo ni ne gin jochan e yor ringruok, Nyasaye nogwedho ahinya jood gi Yesu me piny

[Picha manie ite mar 6]

Bedo gi yie kuom Nyasaye kelo kuwe, chuny maber, koda mor