Puonj Nyithindi

 Yesu Nopuonjore Winjo Wach

BE SECHE moko iyudo ni winjo wach bedoni gima tek?​​—⁠ * Ok en gima kawowa gi wuoro ka isewinjo kamano. Ng’ato ang’ata oseyudo ni kinde moko winjo wach bedo gima tek. Be ing’eyo ni Yesu bende nopuonjore winjo wach?​—⁠

Be ing’eyo ng’at ma nyithindo duto onego owinj?​—⁠ Ee, wuonwa gi minwa. Muma wacho ni: “Winjuru jonywolu.” (Jo Efeso 6:1) Wuon Yesu en ng’a?​​—⁠Jehova Nyasaye, kendo en e Wuonwa bende. (Mathayo 6:⁠9, 10) Kata kamano, in kare ka iwacho ni Josef ne en wuon Yesu kendo Mariam ne en min-gi. Be ing’eyo kaka ne gidoko jonyuol Yesu?​​—⁠

Malaika Gabriel nonyiso Mariam kaka nodhi bedo min Yesu kata obedo ni ne pok onindo gi dichwo. Jehova nomiyo Mariam omako ich e yor hono maduong’. Gabriel nolero ne Mariam kama: “Teko mar Ng’a Mamalo Chutho noumi. E momiyo nyathi mibiro nywolo bende noluong ni maler, Wuod Nyasaye.”​​—⁠Luka 1:⁠30-​35.

Nyasaye nogolo ngima Wuode e polo moketo ei Mariam. Bang’e ngimano nodongo ei Mariam mana kaka nyithindo mamoko dongo ei minegi. Bang’ dweche ochiko, nonyuol Yesu. Josef nokendo Mariam e kinde ma ne en gi ich Yesu, kendo ji mang’eny nokawo ni Josef ema ne en wuon Yesu masie. Kuom adier, Josef ne en mana wuoro ma ne opidho Yesu. Omiyo, inyalo wachi ni Yesu ne nigi wuone ariyo!

Kane Yesu jahigini 12 kende, notimo gimoro ma nonyiso herane matut kuom Wuon-gi me polo, Jehova. E kindeno, joodgi Yesu nodhi e wuoth mabor Jerusalem e Pasaka, mana kaka negi jotimo. Bang’ mano, ka gin e yo giduogo dalagi Nazareth, Josef gi Mariam ok nofwenyo ni Yesu onge kodgi. Be kawi gi wuoro ni wigi ne nyalo wil kode nade?​​—⁠

E kindeno, noyudo Josef gi Mariam osenyuolo nyithindo moko. (Mathayo 13:⁠55, 56) Bende nyalo bedo ni ne giruowo gi wedegi e wuodhno, kaka Jakobo gi Johana kaachiel gi wuon-gi Zebedi, kod min-gi Salome, ma ne nyalo bedo ni en nyamin Mariam. Omiyo Mariam ne nyalo paro ni Yesu ne wuotho gi wedenego.​​—⁠Mathayo 27:56; Mariko 15:40; Johana 19:25.

Ka Josef gi Mariam nofwenyo ni Yesu onge, ne gidok mapiyo Jerusalem. Ne gimanye kamoro amora ma giparo ni doyudre. Ne giyude e hekalu e odiechieng’ mar adek. Mariam nowachone niya: “Marang’o itimonwa kamano? Wuoru kod an ne wadwari kwaparore! ” To Yesu nodwoko: “Ang’o ma nomiyo udwara? Ne ukiya ni onego abed e od Wuora koso? ”​​—⁠Luka 2:⁠45-​50.

Be iparo ni ne rach ka Yesu odwoko min-gi kamano?​​—⁠ Jonyuolne nong’eyo  ni nohero lamo e od Nyasaye. (Zaburi 122:1) Be Yesu ne ni kare kuom paro ni hekalu mar Nyasaye e kama jonyuolne ne onego okwong omanye?⁠—⁠ Bang’e, Mariam nosiko kaparo weche ma Yesu nowachogo.

Ere kaka Yesu nokawo Josef gi Mariam?​​—⁠ Muma wacho kama: “[Yesu] nolor kodgi, gidok Nazareth, kendo ne owinjogi.” (Luka 2:⁠51, 52) Ang’o mwanyalo puonjore kuom ranyisi ma Yesu noketo?⁠—⁠ Wabende onego wawinj jonyuolwa.

Kata kamano, ok ne en gima yot kinde duto mondo Yesu owinj wach, kata mana winjo wach Wuon-gi me polo.

E otieno mogik kapok otho, Yesu nokwayo ka Jehova ne nyalo loko pache kuom gima ne Jehova dwaro mondo otim. (Luka 22:42) Kata kamano, Yesu nowinjo Nyasaye kata obedo ni timo mano ne ok yot. Muma wacho ni “nopuonjore winjo wach kuom masichego ma noneno.” (Jo Hibrania 5:8) Be iparo ni wabende wanyalo puonjore winjo wach?​​—⁠

[Weche moler piny]

PENJO:

▪ Ere kaka Mariam nodoko min Yesu, to Yesu nobedo gi wuone ariyo e yo mane?

▪ Ang’o momiyo jonyuol Yesu ne ok ofwenyo ni nodong’ chien?

▪ Yesu ne paro ni jonyuolne dhi yude kanye?

▪ Ang’o minyalo puonjori kuom ranyisi ma Yesu noketo?

[Picha manie ite mar 31]

Ang’o momiyo iparo ni Josef kod Mariam nonego omany Yesu mokwongo e hekalu?