Nyasaye Neno Nade Kong’o?

JACHWECHWA madwaro mondo wayud gima ber, ok otamowa tiyo gi kong’o e yo mowinjore. * Kar mano, osemiyo dhano “divai mamiyo chuny dhano mor, kod mo mamiyo wang’e rieny, gi chiemo matego chuny dhano.” (Zaburi 104:15) Nitie odiechieng’ ma Yesu Kristo nomedo mor e nyasi mar arus kuom loko pi odoko “divai maber.”​—Johana 2:3-10.

En gima owinjore paro ni Jachwech ong’eyo malong’o kaka kong’o nyalo ketho dendwa kod obwongowa. Kokalo kuom Muma, Wuonwa me polo ‘puonjowa mondo wayud konyruok,’ kendo okwerowa matek ni kik wati gi kong’o e yo marach. (Isaiah 48:17) Ne ane siem maluwogi:

“Kik umer; mano en anjawo.” (Jo Efeso 5:18) ‘Jomer ok nocham gikeni mag pinyruodh Nyasaye.’ (1 Jo Korintho 6:9-11) Wach Nyasaye kwedo “mer, tugo e thum, gi moko ma kamagi.”​—Jo Galatia 5:19-21.

Wane ane moko kuom hinyruok ma madho kong’o ahinya kelo.

Hinyruok ma Madho Kong’o Ahinya Kelo

Kata obedo ni kong’o nyalo kelo ber moko, gik milosego ketho obwongo kod del. Madho kong’o ahinya nyalo kelo achiel kuom chandruoge maluwogi:

Madho kong’o ahinya ketho nyalo ma ng’ato nigo mar ng’ado “paro” e yo malong’o. (Ngeche 23:33, Luo New Testament, 2003) Allen, jal ma ne madho kong’o ahinya mowuo kuome e sula motelo mar gasedni wacho kama: “Bedo jakong’o ok en mana tuwo mar del kende, en tuwo maketho pach ng’ato kod yo monenogo gik moko. Ok ipar ni ihinyo jomoko.”

Madho kong’o ahinya nyalo mono obwongo tiyo malong’o. Ndiko chiwo siemni: “Ndhogruok gi divai gi divai manyien  omayo ji rieko.” (Hosea 4:11) E yo mane? Seche ma kong’o pod tiyo e del, paro kaachiel gi gombo ma wajokwedo nyalo chako nenore ka gima ni kare, kendo lombowa. Teko ma wan-go kuom timo gima kare nyalo dok chien. Kong’o nyalo monowa bedo gi teko mar tamruok timbe anjawo, kendo onyalo ketho winjruokwa gi Nyasaye.

Kuom ranyisi, bang’ John chwanyore gi jaode, ne iye owang’ mowuok odhi kar madho kong’o. Dhako moro nobiro ire ka noyudo John osemadho kong’o matin mondo okuwe chunye. Bang’ ka nosemetho ahinya, John nowuok kode kanyo modhi oterore kode. Bang’ timno, John noneno malit ahinya ni notimo gima ok dine oparo timo ka dine bed ni ok omadho kong’o ahinya.

Madho kong’o mokalo tong’ nyalo miyo ng’ato owuo kendo otim gik moko maok oparo. Muma penjo kama: “Ng’a moneno masira? Ng’a ma dhau pile? Jogogo mabudho ka madho divai; jogo madhi dwaro divai moruwore.” (Ngeche 23:29, 30) Madho kong’o mokalo tong’ nyalo miyo ibed kaka “ng’ato manindo e chuny nam; kata kaka ng’ato manindo e wi tal mar jahasi.” (Ngeche 23:34) Ng’at momadho kong’o ahinya nyalo bedo kaka ng’at ‘mosego to ok rame, mosechwad to ok owinjo goch.’​—Ngeche 23:35.

Madho kong’o ahinya nyalo ketho ngima maber mar ringruok. “Achien [kong’o] okayo kaka thuol; okayo kaka u.” (Ngeche 23:32) Nonro mosetim e weche mag thieth oseyie gi rieko mayudore e ngero machonni. Madho kong’o ahinya en sum manyalo kelo kansa mopogore opogore, tuoche mag nyarogno, adundo kod tako, tuwo sukar, hinyruok ne nyathi manie ich, abach, magi gin mana hinyruok moko matin. Bende madho kong’o mang’eny dichiel nyalo lalo pach ng’ato kata nege. Hinyruok maduong’ moloyo ma kong’o kelo ok onyis e buge thieth.

Hinyruok maduong’ moloyo. Kata obedo ni ng’ato nyalo madho kong’o to ok omer, madhe ahinya nyalo ketho winjruokne gi Nyasaye. Muma wacho maler kama: ‘Yaye, jogo mamondo gokinyi, mondo gidhi ka kong’o; mabudho nyaka odiewuor, nyaka divai omerogi!’ Nikech ang’o? Isaya lero kaka kong’o nyalo ketho winjruok ma ng’ato nigo gi Nyasaye ka omadhe ahinya: “Ok gidewo tich  Jehova, kendo ok giseparo tich mar luete.”​—Isaiah 5:11, 12.

Wach Nyasaye puonjowa kama, “kik ibedi kod jometho.” (Ngeche 23:20) Mon madongo isiemo ni kik gibed “josam kong’o.” (Tito 2:3) Nikech ang’o? Mosmos ka ji ok ong’eyo, kinde mang’eny gichako madho kong’o ahinya kendo gitimo kamano nyading’eny. Bang’e, ng’at ma madho kong’o ahinya nyalo chako penjore kama, ‘Anachieu karang’o mondo amed dware kendo?’ (Ngeche 23:35) Jokong’o chopo kama gombo kong’o gokinyi mondo gitiekgo gombogi.

Muma wacho ni joma “mer, tugo e thum, madho kong’o . . . chieng’ ginidwok wach e bura ni Jal moikore ng’ado bura ni jo mangima gi jo motho.” (1 Petro 4:3, 5) Kaluwore gi kinde matek mwadakieni, Yesu nochiwo siemni: “Ritreuru uwegi, dipo ka chunyu opong’ gi ich lach, kod mer, gi parruok mag ngimani, mi ndalono [mar Jehova] upo kochopo kuomu kaka obadho.”​—Luka 21:34, 35.

Kare, ang’o ma joma madho kong’o mokalo tong’ nyalo timo mondo gigeng’ ‘chuny mopong’ gi mer’?

[Weche moler piny]

[Piche manie ite mag 4, 5]

Madho kong’o mokalo tong’ nyalo kelo chandruoge mang’eny