Lemo

4 Weche Mage Monego Waket e Lemo?

EN LEMO ma Jokristo osebedo kanwoyo gaming’a moloyo lemo moro amora. Bed ni mano en adier kata ooyo, lamo mar ranyisi ma Yesu nochiwoni​—ma seche moko iluongo ni Lamo mar Ruoth kata Wuonwa me Polo​—kuom adier en lamo ma ji mang’eny ok ong’eyo tiende. Dhano tara gi tara olo weche mag lamono pile pile, samoro nyading’eny e odiechieng’. Kata kamano, Yesu ne ok dwar ni oti gi lamono e yo ma kamano. Wang’eyo mano nade?

Matin kane pok opuonjo lemono, Yesu nowacho niya: “Kulemo, kik uthor [nwoyo] wacho weche.” (Mathayo 6:7) Be en adier ni Yesu ne kwedo wechene owuon kuom chiwo weche ma ji onego omak e wigi kendo giwach nyadinwoya? Ooyo, ngang’! Kar mano, Yesu ne puonjowa gik ma onego wakwa e lemo kendo nonyisowa gigo monego waket mokwongo e pachwa sama walemo. We wang’i ane matut gigo ma ne owacho. Lamono ondik e Mathayo 6:9-13.

“Wuonwa manie polo, nyingi mondo obed maler.”

E wacho kamano, Yesu ne paro ne jolupne ni lemo duto onego owach ne Wuon mare, ma en Jehova. Kata kamano, be ing’eyo gimomiyo tiyo gi nying Nyasaye en gima duong’, kendo gimomiyo onego omi nyingno luor, kata kete obed maler?

Chakre histori mar dhano, nying Nyasaye maler osemien gi miriambo. Jasik Nyasaye ma en Satan, oseluongo Jehova ni en Jatelo ma jamiriambo, ma jaguondo, kendo maok nigi ratiro sie mar chiko chwechne. (Chakruok 3:⁠1-6) Ji mathoth osedok ne Satan, ka gipuonjo ni Nyasaye onge hera, oger, ochulo kuor, kendo ni ok en Jachwech. Jomamoko to osekedo gi nying Nyasaye owuon ka gigolo nyingno e loko maggi mag Muma kendo kwero ji ni kik giti kod nyingno.

Muma nyiso ni Nyasaye biro rieyo gik maok karego duto obed maber. (Ezekiel 39:7) Kuom timo kamano, obiro chopo dwaro ma in-go duto kendo loyo chandruogeni bende. E yo mane? Weche maluwogi ma Yesu nowacho e lamone, chiwo dwoko.

“Pinyruodhi mondo obi.”

Ndalogi nitie chochni mang’eny e kind jopuonj mag din kuom wach mar Pinyruodh Nyasaye. Kata kamano, mana kaka jowinjo mag Yesu nong’eyo, jonabi mag Nyasaye ne  osekoro higini machon ni Mesia ma en Jawar ma Nyasaye noyiero, ne dhi locho e wi Pinyruoth ma ne dhi kelo lokruok e piny. (Isaiah 9:⁠6, 7; Daniel 2:⁠44) Pinyruodhno biro keto nying Nyasaye obed maler kuom keto ayanga miriambo mag Satan, kae to obiro tieko Satan koda tijene duto. Pinyruodh Nyasaye biro tieko lweny, tuoche, kech​​—⁠kata mana tho bende ibiro tieki. (Zaburi 46:9; 72:⁠12-​16; Isaiah 25:8; 33:24) Sama ilemo mondo Pinyruodh Nyasaye obi, inyiso ni ikwayo mondo singogi duto ochopi.

“Gi midwaro mondo otimre e piny kaka e polo.”

Weche ma Yesu nowachogi nyiso ni adier dwaro mar Nyasaye nyaka timre e piny ka kaka timore e polo, kama Nyasaye odakie. Onge gima ne nyalo mono dwaro mar Nyasaye kik timre e polo; kuno, Wuod Nyasaye nokedo lweny gi Satan gi jochiendene ma owitogi e piny ka. (Fweny 12:⁠9-​12) Mana kaka kwayo mokwongo koda mar ariyo, kwayo mar adekni konyowa keto pachwa e wi gima duong’ie mogik​​—⁠ma en dwaro mar Nyasaye, to ok dwachwa wawegi. Dwaro mar Nyasaye ema kinde duto kelo gweth mogundho ne chwechne. Omiyo, kata mana Yesu jal ma ne onge richo, nowacho kama ne Wuon mare: “Ok gi madwaro, to mana gi midwaro e ma mondo otimre.”​​—⁠Luka 22:42.

“Imiwa tinende chiembwa ma ndalo duto.”

Yesu nomedo wacho ni wanyalo kwayo gigo mwachando. Onge rach kwayo Nyasaye omiwa gik mwanyalo konyorego e ngima mapile. Kuom adier, mano paronwa ni Jehova e Jal ma ‘chiwo ne ji duto ngima, gi muya, gi gik moko duto.’ (Tich Joote 17:25) Muma nyiso ni en janyuol mohero miyo nyithinde gigo ma gichando. Kata kamano, mana kaka janyuol maber, ok omi nyithindo gigo ma gikwayo manyalo hinyogi.

“Iwenwa gopewa.”

Be kuom adier in gi gop Nyasaye? Be dwarore mondo oweni richoni? Ji mathoth ndalogi ok ong’eyo gima richo en, kendo ok ging’eyo ni richo en gima pek ahinya e wang’ Nyasaye. Kata kamano, Muma puonjo ni richo e kar chakruok mar chandruogewa maricho miwuoro, nimar en ema omiyo dhano tho. Nikech onyuolwa e richo, waduto waketho kinde ka kinde, kendo geno kende ma wan-go mar kinde mabiro mochwere otenore kuom Nyasaye weyonwa richowa. (Jo Rumi 3:⁠23; 5:⁠12; 6:⁠23) En gima hoyo chunywa ng’eyo ni Muma wacho kama: “In, Jehova, iber, kendo iyikori weyo richo.”​​—⁠Zaburi 86:5.

“Ireswa kuom Ng’a Marachno.”

Be ineno kaka dwarore ahinya ni iyud rit mar Nyasaye mapiyo? Ji mathoth tamore yie ni ‘ng’a marachno,’ ma en Satan, nitie. Kata kamano, Yesu to nopuonjo ni Satan nitie, kendo noluonge ni “jaloch pinyni.” (Johana 12:31; 16:11) Satan osenjawo piny ma olochoeni, kendo ogombo ahinya njawi, mondo kik ibed gi winjruok machiegni gi Wuonu ma en Jehova. (1 Petro 5:8) Kata kamano, Jehova nigi teko mang’eny ahinya moloyo Satan kendo omor rito jogo mohere.

Puonj madongo mayudore e lamo mar ranyisi ma Yesu nochiwo mwakaloego, ok wuo kuom weche duto mowinjore wakwa e lemo. Ng’e ni 1 Johana 5:14 wachonwa kama kuom Nyasaye: ‘Kwakwayo gimoro kaka dwaro mare obet, to owinjowa.’ Omiyo, kik ibed gi paro ni gik machandi gin gik matindo ahinya maok onego iket e nyim Nyasaye e lamo.​—1 Petro 5:7.

To nade kuom seche mag lemo koda kama onego walemie? Be Nyasaye dewo ni walemo seche mage kendo ni walemo kanye?