Be Ne Ing’eyo?

“Kar bura” ma ne oterie jaote Paulo ne en kanye?

▪ Tich Joote 18:⁠12, 13 wacho ni Jo-Yahudi ma ne ni Korintho ne odonjo ne Paulo kuom lendo maonge rusa kendo ne gitere “kar bura,” kata beʹma (ma en wach e dho-Grik matiende en “ndiri”). Dala mar Korintho machon ne nigi kamoro moting’ore malo kata ndiri e chuny chiro manyalo bedo ni ne ni machiegni gi sunagogi. Nikech ne oger ndirino kama owinjore, ne gijotiyo kode sama iwuoyo gi oganda. Ndiri mar jagol-twak ne oger gi kite marambulu kod marochere kendo ne ochanie gik mopa mabeyo beyo; ne en-gi ute matindo ariyo ma ne nigi kombe molos gi kite ma nengogi tek koda dier ot mogor ogor.

Nenore ni ndirino ema ne en kar bura ma ne jaote Paulo ochung’ie e nyim jaduong’ Gallio, ma ne en gavana ma ja-Rumi e wi dala mar Akaya. Ofisa mag sirkal ne jobedo kanyo sama giwinjo bura kendo ne gilando ne oganda mochokore kanyo bura moseng’ad.

E gwenge mag Grik, ne en gima pile mondo ji ochokre kuonde ma kamago ma ne iluongo ni beʹma, mondo giwinj lendo mag sirkal. Kaluwore gi bura ma ne otim ne Yesu, Ndiko mag dho-Grik mayudore e Mathayo 27:19 gi Johana 19:13 nyiso ni Pontio Pilato ne wuoyo kochung’ e beʹma mare kata e ndiri.​​—⁠Tich Joote 12:21.

Ang’o momiyo Jo-Yahudi moko ne ochwanyore gi yo ma Yesu ne othogo?

▪ Jaote Paulo nowacho niya kuom Jokristo mokwongo: “Wan wayalo Kristo mogur. Kuom jo Yahudi en rachwany, kendo kuom jo ma ok jo Yahudi en wach mofuwo.” (1 Jo Korintho 1:​23) Ang’o momiyo yo ma Yesu ne othogo ne nyalo chwanyo jomoko?

Jal moro manono weche Muma, miluongo ni Ben Witherington III, wacho niya kuom yo ma Yesu ne othogo koda kit oganda ma ne odak e piny mar Middle East e senchari mokwongo: “Ne en tho mar wich kuot maduong’ie moloyo e ogandano. Ne ok gikawe kata matin kaka ng’at motho nikech yie mare.” Witherington medo wacho ni: “E kindego, ji ne neno ni kit tho mar ng’ato ne nyiso ayanga ni ne en ng’at manade. Nikech mano, ne one Yesu kaka ng’at ma ne en jendeke, ng’at ma ne ondhogo sirkal, kendo ma ne owinjore okum kaka misumba mong’anjo.” Nikech kit ogandano ne chalo kamano, ok wanyal wacho ni Jokristo mokwongo ne ochuogo weche e wi tho koda chier mar Yesu.