Dwe mar apar gariyo en dwe ma ji mang’eny e piny ngima nenoe piche kata kido mag Yesu ka en nyathi. Pichego nyiso ka opiel Yesu e sanduk mimiyoe dhok chiemo. Kata kamano, be onego wapar Yesu mana ka en nyathi matin?— * We wane ane kaka onego wanene. Wanyalo puonjore gimoro kuom gima ne otimore ne jokwath moko ma ne kwayo gotieno e pewe ma ne ni machiegni gi Bethlehem.

Apoya nono, jokwathgo neno malaika. Malaikano nyisogi niya: “Tinende onywolnu Jawar e dala Daudi, en Kristo Ruoth.” Malaikano bende nyisogi ni gibiro yudo ka Yesu ‘oum gi lep nyathi, konindo e kund dhok.’ Gie sechego, malaike moko nobiro kendo ne gichako ‘pako Nyasaye.’

Inyalo winjo nade kiwinjo ka malaike pako Nyasaye?— Jokwathgo ne mor sidang’! Ne giwacho niya: “Wadhiuru nyaka Bethlehem, mondo wane gino motimore.” Kane gichopo kuno, ne ginwang’o “Mariam kod Josef, kod nyathi makwar konindo e kund dhok.”

Matin nono, jomamoko bende biro Bethlehem kama Mariam gi Josef ne nitie. Kane jokwath onyisogi gima ne gineno, giduto ne gihum nono. Be imor ng’eyo weche mabeyogi?— Jomohero Nyasaye duto mor gi wechego. Koro we wane ane gimomiyo ji mor ahinya nikech ne onyuol Yesu. Mondo wang’e gimomiyo, nyaka wadog chien wane gima notimore kane pok okend Mariam.

Chieng’ moro, malaika miluongo ni Gabriel nolimo Mariam. Nonyiso Mariam ni Mariam ne dhi nyuolo nyathi ma “nobed maduong’, to enoluonge ni Wuod Ng’a Mamalo Chutho.” Gabriel nowacho ni nyathino ‘nolochi’ kaka ruoth kendo “pinyruodhe ok norum.”

Mariam nopenjo kaka mano ne nyalo timore nikech pok nonindo gi dichwo. Omiyo, Gabriel nonyise kama: “Teko mar Ng’a Mamalo Chutho noumi” kendo  “nyathi mibiro nywolo bende noluong ni maler, Wuod Nyasaye.” Nyasaye notimo hono maduong’ ahinya kuom daro ngima Wuode ma ne nie polo nyaka e i Mariam mondo odongi ka nyathi.

Be iseneno piche manyiso ka “joma riek” kaachiel gi jokwath limo Yesu?— Piche ma kamago ng’eny kinde Krismas. Kata kamano, pichego ok nyis gik ma ne otimore gadier. Adiera en ni “joma riekgo” gin ajuoke ma tiyo gi sulwe e koro, ma en tim ma Nyasaye okwedo. We wane ane gima ne otimore kane gichopo kama Yesu ne nitie. Muma wacho niya: ‘Ka ne gidonjo e ot, ne gineno nyathino kod Mariam min mare.’ Omiyo, gie kindeno Yesu ne dit moromo kendo nodak gi Josef kod Mariam e ot, to ne ok en e kul kaka nyathi mayom!

Ere kaka ajuokego nofwenyo kama Yesu ne nitie?— ne otagi gi “sulwe” nyaka Jerusalem ir Ruoth Herode eka bang’e sulweno notayogi Bethlehem. Muma wacho ni Herode ne dwaro ng’eyo kama Yesu ne nitie mondo onege. Koro par ane wachni. Iparo ni en ng’ano ma ne omiyo gima chalo sulwe otayo ajuokego nyaka ir Herode?— Ne ok en Nyasaye madier ma en Jehova, to ne en jasike ma en Satan Jachien!

Kindegi, Satan dwaro ni ji osik ka paro ni Yesu en mana nyathi mayom maok nyal konyo gimoro amora. Kata kamano, malaika Gabriel nonyiso Mariam niya e wi Yesu: ‘Nolochi’ kaka ruoth kendo “pinyruodhe ok norum.” Gie sani, Yesu locho ka en e polo kendo machiegnini noketh wasik Nyasaye duto. Mano e gima onego wapar e wi Yesu kendo onego wanyis jomoko wachno.