“NYASAYE en Roho” ma dhano ok nyal neno. (Johana 4:24) Kata kamano, Muma wacho ni nitie jomoko ma oseneno Nyasaye e yo moro. (Jo Hibrania 11:27) Mano nyalore nade? Be inyalo neno “Nyasaye ma ok ne”?—Jo Kolosai 1:15.

Tem ane pimo chal marwa gi ng’at ma ne onyuol ka en muofu. Be bedo ni en muofu nyalo mone ng’eyo gigo ma timore e alwora ma entieree? Ooyo. Nitie gik mopogore opogore ma konyo ng’ama muofu fwenyo ji, gik molwore, kod gigo ma timore bute. Muofu moro wacho kama: “Kata obedo ni ok anyal neno gi wang’a, pod anyalo tiyo gi pacha.”

Wan bende, kata obedo ni ok wanyal neno Nyasaye gi wang’wa ma sie, wanyalo tiyo gi ‘wang’ chunywa.’ (Jo Efeso 1:18) Wanon ane yore adek ma wanyalo timogo kamano.

Ng’ama muofu nigi nyalo mamalo mar winjo kod mar fwenyo gik moko kuom mulogi, kendo mano konye e ng’eyo gik ma ok onyal neno gi wang’e. In bende inyalo tiyo gi nyalo ma in-go mar nono gik manie piny mondo okonyi neno Nyasaye ma ok nyal ne gi wang’, ma e ma nochueyo gigo. “Nyaka a chuech piny gik ma ok ne mag Nyasaye . . . gi kite, mineno kuom gik ma en nochueyo, nenore ratiro.”—Jo Rumi 1:20.

Kuom ranyisi, par ane pinywani. Piny nochuenwa ok mana ni mondo wane gik manie iye kende, to ni mondo okonywa dak e ngima maber. Donge wamor ndi sama wawinjo yamo ma kutho mayom, sama waoyo chieng’ ma muol, sama wachamo olemo mamit, kata sama wawinjo dwond winy ma wer mamit? Donge mich mabeyogo nyisowa rieko ma Nyasaye nigo, hera mare, kod chuny mar chiwo ma en-go?

En puonj mane ma iyudo kuom Nyasaye sama inono chuechne minyalo neno gi wang’i? Mokwongo, polo nyiso tekone. Nonro ma josayans notimo machiegni nyiso ni sulwe mag polo medo kere kendo giringo e okang’ ma malo ahinya! Ka ing’iyo malo e polo gotieno, inyalo penjori kama: En ang’o ma chiko sulwego mondo gimed kere kamano kendo ringo matek kamano? Muma wachonwa ni Jachuech nigi teko mang’eny. (Isaiah 40:26) Chuech mag Nyasaye nyisowa ni en ng’at “Manyalo Duto” kendo “teko ma engo duong’ ahinya.”—Ayub 37:23.

Miyo moro ma min yawuowi ariyo ma muofni nowacho kama: “Achiel kuom yore madongo ma gipuonjorego en weche ma giwinjo. Wachnegi gimoro amora ma ineno kata ma iwinjo, kendo ikri mar leronegi gimoro amora ma ineno sama idhi kodgi kamoro. In e ma ibedonegi wang’.” Kamano bende, kata obedo ni “onge ng’a moseneno Nyasaye,” Yesu, Wuod Nyasaye “manie kor Wuoro, e ma ne ofwenye.” (Johana 1:18) Kaka ng’ama Nyasaye ne okwongo chueyo kendo Wuod Nyasaye ma miderma, Yesu nobedo “wang’wa” ma konyowa neno gik manie polo. En e ma onyalo nyisowa weche duto kuom Nyasaye ma ok ne.

Ne ane moko kuom gik ma Yesu nolero e wi Nyasaye kaka ng’ama nosedak kode kuom higni mogwaro:

• Nyasaye tiyo ma ok owe. “Wuora tiyo nyaka chil kawuono.”—Johana 5:17.

•  Nyasaye ong’eyo gik ma wachando. “Wuonu ong’eyo gigo muchando ka pok ukwaye.”—Mathayo 6:8.

• Nyasaye chiwonwa gik moko gi ng’wono. ‘Wuonu me polo; miyo wang’ chieng’ mare wuok ni jo maricho kod jo mabeyo, kendo oolo koth ni jo makare kod jo ma ok kare.’—Mathayo 5:45.

• Nyasaye oherowa ng’ato ka ng’ato. “Oyundi ariyo ok ing’iewo gi hela achiel koso? Kata kamano achiel kuomgi ok nolwar piny ma ok Wuonu ong’eyo. To kata mana yie wiu osekwan duto. Kuom mano kik uluor; un uloyo winy mang’eny.”—Mathayo 10:29-31.

Joma muofni fwenyo gik moko e yore mopogore gi joma wengegi neno. Ng’ama muofu nyalo fwenyo tipo, ok kaka kama mudho ma ler mar chieng’ ongee, to ofwenye kaka kama okuwe ma liet mar chieng’ ongee. Mana kaka ng’ama muofu ok nyal neno tipo kata ler, e kaka wan bende ok wanyal ng’eyo Jehova ma ng’ato ok okonyowa ng’eye. Omiyo, Jehova ne omiyowa ng’at ma ne onyiso kido kaka mage e yo makare.

Ng’atno ne en Yesu. (Jo Filipi 2:7) Yesu ne owuoyo kuom Wuon mare kendo nyisowa kido ma Wuon mare nigo. Japuonjre Yesu miluongo ni Filipo ne openjo Yesu niya: “Ruoth, nyiswa Wuoro.” Yesu ne odwoke ni: “Ng’a mosenena, oseneno Wuoro.” (Johana 14:8, 9) Gin kido mage ma inyalo “neno” kuom Wuoro kaluwore gi gik ma ne Yesu timo?

Yesu ne muol, nobolore, kendo ne en ng’ama dhi ire mayot. (Mathayo 11:28-30) Kido mabeyo ma ne en-go ne miyo ji mang’eny dhi ire. Yesu ne winjo lit ma ji ne nigo, kendo nobedo ma mor gi joma mor. (Luka 10:17, 21; Johana 11:32-35) Sama isomo kata winjo sigendni mag Muma e wi Yesu, tem nono wechego matut mana ka gima gitimoreni. Ka iparo matut kuom kaka Yesu ne timo ne ji, ibiro neno malong’o kido mabeyo miwuoro ma Nyasaye nigo, kendo kidogo biro miyo isud machiegni kode.

Jandiko moro ma miyo nowacho kama e wi kaka muofni ng’eyo gik ma timore e piny: “Muofni yudo weche mosmos ma konyogi ng’eyo gimoro, gitiyo gi yore mopogore opogore kaka mulo gik moko, ng’ueyo, winjo, kod mamoko, kae to giriwo wechego kanyachiel mondo okonygi ng’eyo gimoro e yo maber.” Kamano bende, sama inono chuech mag Jehova, isomo gik ma Yesu nowacho e wi Wuon-gi, kendo nono kaka Yesu ne onyiso kido mag Nyasaye, ibiro neno e yo maler ng’ama Jehova en. Ibiro nene kaka ng’ato sie.

Ayub, ma ne odak kinde machon, noneno Jehova e yo ma kamano. Mokwongo nowuoyo ka ng’ama ok ‘ong’eyo’ Jehova. (Ayub 42:3) Kata kamano, bang’ nono mos chuech mabeyo mag Jehova, noduogo owacho kama: “Winjo to nawinjo wachni gi ita; to koro aneni gi wang’a.”—Ayub 42:5.

In bende inyalo timo kamano. ‘Kidwaro Jehova, iniyude.’ (1 Weche mag Ndalo 28:9) Joneno mag Jehova biro bedo ma mor konyi mondo imany Nyasaye ma ok ne, ma iyude. ▪