WACH MADUONG’ MA GASET WUOYOE | KAKA INYALO BEDO OSIEP NYASAYE
Be Iwinjo ka In-gi Winjruok Machiegni gi Nyasaye?
Dichwo moro e piny Ghana miluongo ni Christopher, wacho kama: “Bedo gi winjruok machiegni gi Nyasaye miyo iwinjo ka in-gi chuny mokuwe, kendo ngimani dhi maber. Chal ka gima Nyasaye dwaroni ngima maber ndalo duto.”
Hannah ma en jahigni 13, ma a Alaska, e piny Amerka wacho kama: “Nyasaye neno chandruoge duto ma in-go, kendo onyiso ni oheri kendo odewi moloyo kaka inyalo paro.”
Dhako moro ma jahigni 40 kama miluongo ni Gina, ma a e piny Jamaica wacho kama: “Ng’eyo ni in-gi winjruok machiegni gi Nyasaye en gima duong’ kendo ma hoyo chuny ahinya.”
Nitie ji mang’eny ma nigi paro kaka mar Christopher, Hannah, kod Gina. Ji mang’eny e piny ngima nigi adier ni Nyasaye nenogi kaka osiepene. To nade in? Be iwinjo ka in-gi winjruok machiegni gi Nyasaye? Koso diher bedo machiegni kata machiegni ahinya gi Nyasaye? Samoro isegapenjori kama: ‘Be en adier ni dhano adhana nyalo bedo gi winjruok machiegni gi Nyasaye Manyalo Duto? Ka en adier, mano nyalore nade?’
BEDO GI WINJRUOK MACHIEGNI GI NYASAYE EN GIMA NYALORE
Kaluwore gi Muma, ng’ato ka ng’ato nyalo bedo gi winjruok machiegni gi Nyasaye. Muma wacho ni Nyasaye ne oluongo jaduong’ Ibrahim ni “osiepna.” (Isaiah 41:8) Ne bende weche ma jiwowa ma yudore e Jakobo 4:8 ma wacho kama: “Suduru machiegni gi Nyasaye, to en bende nosud iru.” Omiyo, nenore maler ni wanyalo bedo gi winjruok machiegni gi Nyasaye, tiende ni wanyalo bedo osiepene. To nikech ok wanyal neno Nyasaye, ere kaka inyalo ‘sudo machiegni’ gi Nyasaye kendo bedo gi winjruok maber kode?
Mondo wadwok penjono, wanon ane kaka dhano chakoga mako osiep. Osiep chakorega sama ng’ato hulo ne nyawadgi nyinge. Kae to, kaka gimedo tudore kendo goyo mbaka kuom weche manie chunygi, e kaka osiep manie kindgi medo dongo. Kendo kaka gimedo konyore, e kaka osiep manie kindgi medo bedo motegno. Wanyalo wacho ni bedo gi winjruok machiegni gi Nyasaye bende chalo kamano. We wanon ane wachno.
Samoro Inyalo Hero Magi Bende
OHINGA MAR JARITO
Be Ing’eyo Nying Nyasaye Kendo Itiyogo?
Nyasaye owuon nyisowa nyinge kowachonwa kama: “An Jehova; ma e nyinga.”
