Nitie gik mang’eny ma miyo ji milionde mathoth e piny mangima timo nyasi mar Krismas. Jomoko tiyo gi thuolono e bedo gi kinde mag mor gi joodgi kaachiel gi osiepegi. Jomoko tiyo gi thuolono e paro Nyasaye kata chiwore mondo gikony joma odhier kata mochando gimoro. Onge kiawa ni mago gin gik ma owinjore watim ne jomamoko. Kata kamano, gitudore gi weche ma ok kare e wi nyasino.

Mokwongo, ji mang’eny ma timo nyasi mar Krismas paro ni odiechiengno ema ne onyuolie Yesu. Kata kamano, joma nono weche machon oyie ni onge ng’at mong’eyo tarik ma ne onyuolie Yesu. Buk miluongo ni The Christian Book of Why wacho ni “Jokristo mokwongo ne otamore keto tarik ma giparoe nyuol mar Yesu” nikech ne gidwaro “ni mondo giwere chuth gi timbe mag joma ne lamo nyiseche manono.” Ber ng’eyo ni onge kamoro amora e Muma ma nyisowa ni Yesu ne otimo nyasi mar paro chieng’ nyuolne kata mar ng’ato ang’ata. Mopogore gi mano, ne ochiko jopuonjrene opar chieng’ thone.—Luka 22:19.

Mar ariyo, josomo mang’eny oyie ni thoth gik ma Jokristo timo ne ochakore kuom timbe mag joma ne ok gin Jokristo kendo ma ne lamo nyiseche manono. Gigo oriwo Father Christmas, maupe kod yiende ma itiyogo e Krismas, chiwo mich, moko msuma kod kek mag Krismas, kod wende mag Krismas. Buk moro miluongo ni The Externals of the Catholic Church ne olero kama kuom timbego: “Sama wachiwo kata wakawo mich mag Krismas, kendo ng’awo maupe e utewa kod e kanisewa, gin ji adi kuomwa mong’eyo ni watimo nyasi mag joma ne lamo nyiseche manono?”

Kata kamano, pod inyalo penjori kabe nitie rach moro amora mar luwo timbe ma nenore ni ok richogo. Non ane wach mar adekni. Nyasaye ok oyie mondo wariw timbe mag joma ne lamo nyiseche manono gi lamo madier. Kokalo kuom janabi Amos, Jehova Nyasaye ne owacho ne Jo-Israel ma ne obalo ne lamo madier niya: ‘Achayo kendo asin kod sepeu, weuru mak uting’na dwond wende magu.’—Amos 5:21, 23.

Ang’o momiyo Nyasaye ne omiyogi siem motegno kamano? Non ane gima joma ne odak e pinyruoth ma masawa mar Israel ne timo. Ruodhgi mokwongo miluongo ni Jeroboam, noketo roya mar dhahabu e mier mag Dan kod Bethel kendo ne ochiko ji mondo gilam royano kar lamo Jehova Nyasaye e yo makare e hekalu ma ne ni Jerusalem. Ruodhno bende ne ochako sawo moko manyien kendo yiero jodolo mondo ota ji e timo sawogo.—1 Ruodhi 12:26-33.

Gik ma Jo-Israelgo ne timo ne nenore ni beyo. Donge ne gitimo gigo duto mondo gilam Nyasaye kendo gimore? Siem motegno ma ne Nyasaye ochiwo kokalo kuom Amos kod jonabi mamoko nyiso maler kaka Nyasaye neno timbe ma kamago. Nyasaye nowacho kokalo kuom janabi Malaki kama: “An Jehova ok alokora.” (Malaki 3:6) Donge mano konyowa ng’eyo kaka Nyasaye neno nyasi mag Krismas mitimo e ndalowagi?

Bang’ nono adierago, milionde mang’eny mag ji oseng’ado mar were gi wach timo nyasi mag Krismas. Kar timo nyasino, giyudo mor madier kuom kawo thuolo mar bedo kanyachiel gi joodgi kod osiepegi, kendo konyo joma odhier kata mochando gimoro e kinde moro amora e higa.