Ndiko mag Dho-Grik (Muma Manyien) wuoyo nyadinwoya e wi jotend-askeche mag Jo-Rumi. Achiel kuomgi en jatend-askeche ma ne ochung’ ne joma ne onego Yesu, to machielo en Kornelio, ma ne en ng’at ma nokwongo bedo Jakristo kuom joma ok Jo-Yahudi. Ng’at ma ne ochung’ne joma ne ochwado Paulo, kod Julio ma ne okowo Paulo ka ne itere Rumi, bende ne gin jotend-askeche. —Mariko 15:39; Tich Joote 10:1, 22:25; 27:1.

Jatend-askeche ne ochung’ ne jolweny ma kwan-gi romo 50 kata 100. Tije ma ne otimo ne gin, tiego joma nie bwoye, rieyogi, nono lepgi kod gigegi mag lweny, kendo chikogi sama gidhi e lweny.

Bedo jatend-askeche ne en rang’iny ma malo moloyo ma jalweny ne nyalo chopoe. Joma ne imiyo tijni ne gin joma olony e lweny kendo ma ne nyalo telo ne jomoko e yo maber. Gin e ma ne gimiyo jolweny kedo maber e lweny. Buk moro wacho ni jotend-askeche “ne gin joma olony ahinya kendo ma ong’eyo weche ma dhi nyime.”

Rang’i ma kindegi iloso gi kio. Kata kamano, ma ne iloso e ndalo mag Muma ne iloso gi chuma, dhahabu, mula, kata fedha ma orudh mobedo maleny. Kama okwongo ma Muma wuoyo e wi rang’i en ka ne igero tabernakel, ma en kama Jo-Israel ne lamoe. Mon e ma ne ochiwo rang’i mondo obidhgo tawo mar mula kod tiendene. (Wuok 38:8) Nyalo bedo ni ne okwong oleny rang’igo mondi, eka oti kodgi e bidho gigo.

Rang’i ma osebed kikunyo e alwora mar piny Israel iyudo gi gik mamoko kaka tigo kod gik mamoko ma mon bidhorego. Rang’igo ne iloso molworore, kendo kuonde ma imakogigo ne iloso gi bao, chuma, kata tung liech ma ne opa e kit ng’ama dhako. Thothne tok rang’i ne iweyo aweya kamano.

Rang’i machon-go ne ok nyis gik moko e yo maler kaka ma kawuonogi. To mano konyowa ng’eyo tiend weche ma ne Paulo owacho ni: “Nimar sani waneno gik moko e yo ma tiptip kokalo kuom kio mar chuma.” —1 Jo-Korintho 13:12.