Ne onyuola e taon moro matin e piny Poland man machiegni gi tong’ mar piny Germany. Kanyo ne en kama okuwe nikech ne olwore gi puothe kod bunge. Jonyuolna nohera ahinya, kuom mano ne gijiwa mondo abed gi timbe mabeyo, atim maber e skul, kendo atim matek mondo ayud tich ma nigi nyadhi.

Nachako yudo chandruoge ka nadhi somo chik e yunivasiti moro e taon mar Wrocław. Kuno, ne achako mako osiep gi jomaricho nikech koro ne an mabor gi jonyuolna. Ne ahero opich tielo, kata kamano osiepenago ne omiyo adwahero opira mokalo tong’. Tim mar opira ma ne ahero ne nie taon mar Warsaw, kendo e giko juma ne ajaluwogi kamoro amora ma ne gidhi tuge. Kinde mang’eny, kuonde ma ne gidhi tuge ne ji merie ahinya, moko ne tiyo gi yedhe mamero, kendo kinde ka kinde ne wagore gi jo timbe mamoko. Ne aparo ni mano ne en yo ma ne anyalo loyogo parruok mapile, kata kamano nang’eyo ni ka polis omaka ne adhi ketho somba e yunivasiti.

An kaachiel gi osiepena ne wahero dhi e thum. Ka ne wan e kuonde thumgo ne wahero yawo lweny. Polis ne omaka ding’eny, kata kamano thothne natemo mondo kik gitueya, kendo samoro ne chuna chiwo asoya. Ne aparo ni nadak e ngima mopong’ gi mor. To e chunya ne ang’eyo ni kit ngimana ne ok ber. Jumapil ka Jumapil ne ajadhi e kanisa mondo atem umogo kit ngimana marachno.

E higa mar 2004, Joneno mag Jehova ariyo ne olima e oda, kendo ne ayie puonjora Muma kodgi. Chunya ne ochako chanda ahinya bang’ fwenyo kaka Jakristo madier onego odag. Ne ang’eyo ni ne onego awe mer, tiyo gi yedhe mamero ji, kendo ng’ado osiep gi joma ok luw puonj mag Muma. Bende, nafwenyo ni ne onego alok kita kendo weyo bedo ng’at mager. Kata obedo ni ne ang’eyo ni onego alok kit ngimana, ne ok alokora.

Ngimana ne olokore otieno moro ka ne ayawo lweny gi ji aboro. Pod anyalo paro kaka jogo ne gweyo wiya kendo goya adhong’ ka anindo piny e ndara. Ne aparo ni nadhi tho, mi nalemo kama: “Jehova akwayi ni ing’wonna nikech ne ok aluwo Wachni. Kapo ni  atony, asingora ni abiro puonjora Muma gi Joneno mag Jehova kendo loko kit ngimana.” Gima ber en ni ne atony. Kendo ne apuonjora Muma mana kaka ne asingora.

E higa mar 2006, ne adar ma adhi England. Gima duong’ ma ne adwaro ne en yudo pesa ma ne nyalo roma dok Poland, mondo amed somba ayud digri manie rang’iny mamalo e weche mag chike. Kaka ne amedo puonjora Muma, nitie ndiko moro achiel ma nomako dhoga ahinya. Jaote Paulo nondiko kama: “Akwano bende gik moko duto kaka gik molal nikech ber mar ng’eyo Kristo Yesu Ruodha nigi ohala maduong’ moloyo. Nikech en, aseyie mondo alal gik moko duto kendo akwanogi kaka yugi lilo mondo eka anwang’ Kristo.” (Jo-Filipi 3:8) Ngimana ne chal gi mar jaote Paulo nikech en bende ne osomo weche mag chike, kendo chon nohero timbe gero ahinya. (Tich Joote 8:3) Kata kamano, bang’e nofwenyo ni kit ngima maberie moloyo en tiyo ne Nyasaye, kendo timo matek mondo waluw ranyisi ma Yesu noketonwa. Ka ne aparo matut kuom kit ngima Paulo, ne afwenyo ni yudo tich ma nigi nyadhi kod bedo ng’at mohero timbe gero ok kel ne ng’ato mor madier. Kuom mano, ne ang’ado ni onge gima ne nyalo mona timo lokruok nikech kata Paulo noloko ngimane. Mano nomiyo ang’ado ni nadhi dak England, kendo ne ok adhi medo somba kaka nasechano.

Kaka namedo puonjora kuom Jehova e kaka namedo sudo machiegni kode. Ne amor ahinya ka nang’eyo ni Jehova oikore weyo richo ne joma oyie loko kit ngimagi gadier. (Tich Joote 2:38) Kendo ka ne aparo matut kuom weche ma yudore e 1 Johana 4:16, ma wacho ni “Nyasaye en hera,” nafwenyo gimomiyo Nyasaye ok ohero timbe mag gero.

Timbe mabeyo mag Joneno mag Jehova nomora ndi! Ne anyalo neno maler ni ne gitemo ahinya luwo chike manie Muma. Ne adwaro bedo Janeno mar Jehova mondo abed mamor kaka gin. Bang’ timo kinda mathoth kaachiel gi lokruok ma ne dwarore, ne obatisa e higa 2008 ma abedo Janeno mar Jehova.

Muma osekonya timo lokruok e ngimana ma aweyo bedo ng’at ma dwaro nyadhi, mohero timbe gero, ma tiyo gi yedhe mamero ji, ma mer, kendo mohero opira e yo mokalo tong’. Sani koro an jatich Nyasaye mohero puonjo ji weche mag Muma. Pod ahero opira, kata kamano, atemoga mondo kik ahere mokalo tong’.

Ne akendo nyako ma jachia ma bende en Janeno wadwa miluongo ni Esther. An gi jaoda wahero puonjo joma wacho dho Poland Muma e piny England kae. Koro anyalo wacho ni an gi mor madier. Sani koro chunya ok chanda, kendo ang’eyo tiyo gi ngimana e yo maberie moloyo.