Mana kaka chokruoge mamoko mag kanyakla, romo mar dhi lendo bende en achiel kuom gik ma Jehova ochiwo mondo okonywa jiwo hera kod timbe mabeyo. (Hib 10:24, 25) Romo mar dhi lendo onego otim kuom dakika abich to kodhi ahinya to dakika abiriyo, to mano oriwo pogo ji e grube, chiwo alwora mar dhi lendo, kod lamo. (To kapo ni en romo ma itimo bang’ chokruok, onego obed machuok moloyo.) Owadwa ma tayo romono onego oik gima biro konyo joma dhi lendo e odiechiengno. Kuom ranyisi, e odiechieng’ mar Ngeso ma en odiechieng’ ma ji mang’eny biroga e tij lendo bang’ juma mangima, nyalo bedo maber nono mana wach ma jolendo biro wuoye gi weg udi. Gin weche kaka mage ma inyalo wuoye e romo mar dhi lendo?

• Weche mwanyalo chako wuoyogo gi ji ma yudore e Ngimawa kod Tijwa Kaka Jokristo​—Chenro mar Chokruok

• Kaka wanyalo chako lendo ka watiyo gi wach moro motimore e alworawa kata ma oland e redio kata e TV

• Kaka wanyalo chiwo dwoko e wi wach moro ma ji kwedowago mondo kik walendnegi

• Kaka wanyalo lendo ne joma ok oyie ni Nyasaye nitie, joma oyie ni gik moko nosieko kendgi, joma wacho dhok mopogore gi marwa, kata ng’at ma nie din ma ok ong’ere ahinya e alworawa

• Kaka wanyalo tiyo gi gimoro manyien ma omed e jw.org, JW Library^®, kata e Muma

• Kaka wanyalo tiyo gi achiel kuom Gik Mwatiyogo e Puonjo Ji Muma

• Kaka wanyalo lendo e yore mopogore opogore kaka lendo ka watiyo gi simu, ndiko barupe, lendo gi troli, timo dok limbe, kata tayo puonjruok mag Muma

• Paro ne jolendo gik monego gitang’go sama gilendo, bedo ng’at ma nyalo timo lokruok, bedo gi timbe mabeyo, bedo gi paro mowinjore e wi tij lendo, kata wach machielo

• Somo moro kata vidio moro ma yudore e brosua ma wiye wacho ni Ket Chunyi Kuom Somo kod Puonjo

• Kaka inyalo jiwo kendo konyo owadwa kata nyaminwa ma opogugo e tij lendo

• Somo ndiko moro motudore gi tij lendo kata wuoye e wach moro mosetimore ma nyalo jiwo jolendo