Barua Mokwongo mar Johana 2:1-29
2 Nyithinda matindo, koro andikonu wechegi mondo kik utim richo. To ka ng’ato otimo richo, wan gi jakony* moa kuom Wuoro, ma en Yesu Kristo,+ ng’at makare.+
2 Kendo en misango ma loso winjruok+ nikech richowa,+ to ok mana richowa kende, to bende richo mag piny mangima.+
3 Kendo ka wamako chikene, wanyiso ni waseng’eye.
4 Jal ma wacho ni, “Aseng’eye,” to pod ok omak chikene, en jamiriambo, kendo adiera onge ei ng’atno.
5 To ng’at ma luwo wachne, kuom adier, hera ma ng’atno oherogo Nyasaye osebedo moromo chuth.+ Nikech mano, wang’eyo ni wan e winjruok achiel kode.+
6 Ng’at ma wacho ni osiko e winjruok achiel kode, ng’atno onego odhi nyime wuotho mana kaka jalo nowuotho.+
7 Andikonu un jo ma ahero, ok kuom chik moro manyien, to kuom chik machon ma usebedogo nyaka a chakruok.+ Chik machonno e wach ma usewinjo.
8 To sani andikonu kendo kuom chik manyien, ma nenore kuome kendo kuomu, nikech mudho kadho, to ler madier koro rieny.+
9 Ng’at ma wacho ni en e ler to koni otimo sigu gi owadgi,+ ng’atno pod ni e mudho.+
10 Ng’at mohero owadgi ni e ler,+ kendo onge gima nyalo miyo ochwanyre.
11 To ng’at ma timo sigu gi owadgi, ng’atno ni e mudho kendo owuotho e mudho,+ kendo ok ong’eyo ka ma odhiyoe+ nikech mudho osedino wengene.
12 Andikonu un nyithindo matindo, nimar osewenu richou nikech nyinge.+
13 Andikonu un wuone, nikech useng’eyo jalno mosebetie nyaka a chakruok. Andikonu un chwo matindo, nikech useloyo ng’at marach.+ Andikonu un nyithindo matindo, nikech useng’eyo Wuoro.+
14 Andikonu un wuone, nikech useng’eyo jalno mosebetie nyaka a chakruok. Andikonu un chwo matindo, nikech un gi teko+ kendo wach Nyasaye siko e iu,+ kendo useloyo ng’at marach.+
15 Kik uher piny kata gik manie piny.+ Ka ng’ato ohero piny, to hera mar Wuoro onge e iye;+
16 nikech gik moko duto manie piny—gombo mag ringruok,+ gi gombo mag wang’,+ kod nyisruok nikech gik ma ng’ato nigo e ngima—ok a kuom Wuoro, to gia e piny.
17 E wi mano, piny kadho gi gombone,+ to ng’at ma timo dwach Nyasaye siko nyaka chieng’.+
18 Un nyithindo matindo, ma e sa mogik, kendo mana kaka usewinjo ni jasik Kristo biro,+ to kata mana gie sani nitie jowasik Kristo mang’eny ma osesieko,+ mano e momiyo wang’eyo ni koro en sa mogik.
19 Ne gia kuomwa, to ne ok gichal kodwa;+ nimar ka dine bed ni gichal kodwa, dine gisiko kodwa. To ne giwuok mondo onenre malong’o ni ok ji duto ma gin jo ma chal kodwa.+
20 Bende, ng’at malerno osewirou+ kendo uduto un gi ng’eyo.
21 Andikonu, ok nikech pok ung’eyo adiera,+ to en nikech ung’eyogo, bende, nikech onge miriambo ma wuok kuom adiera.+
22 Jamiriambo en ng’a, ka ok mana jal ma kwer ni Yesu ok en Kristo?+ Jalo e jasik Kristo,+ en e ng’at ma kwedo Wuoro kod Wuoyi.
23 Ng’at ma kwedo Wuoyi, ng’atno onge gi Wuoro bende.+ Ng’at ma hulo ni ong’eyo Wuoyi,+ ng’atno nigi Wuonwa bende.+
24 To un, gik ma usewinjo nyaka a chakruok onego osik e iu.+ Ka gik ma usewinjo nyaka a chakruok osiko e iu, un bende unusik e winjruok achiel gi Wuoyi kendo e winjruok achiel gi Wuoro.
25 E wi mano, gima nosingonwa en ngima ma nyaka chieng’.+
26 Andikonu wechegi nikech jo ma dwaro lalou.
27 To un, wir ma ne owirougo siko kuomu,+ kendo ok onego obed ni ng’ato puonjou; to wir moa kuome puonjou gik moko duto,+ kendo en adier to ok en miriambo. Mana kaka roho osepuonjou, sikuru e winjruok achiel kod jalo.+
28 Omiyo, un nyithindo matindo, koro sikuru e winjruok achiel kode mondo e kinde fwenyruokne wabedie gi chir mar wuoyo+ ka wan thuolo, kendo mondo e kinde ma biro yudo ka koro entie, kik wawuog e nyime gi luoro nikech wich-kuot.
29 Ka ung’eyo ni en ng’at makare, ung’eyo bende ni ng’ato ang’ata ma timo gik makare en ng’at moseyudo nyuol moa kuom Nyasaye.+
Weche Moler Piny
^ Kata, “jal ma chung’nwa e bura.”
