Samuel Mokwongo 27:1-12
-
Jo-Filistia miyo Daudi gweng’ mar Ziklag (1-12)
27 Kata kamano, Daudi nowacho e chunye niya: “Chieng’ moro Saulo biro nega. Mondo atony+ e lwete, abiro ringo nyaka e piny Jo-Filistia eka Saulo biro ol gi manya e Israel duto.”+
2 Omiyo, Daudi gi jolweny 600+ ma ne ni kode nodhi ir Akish+ wuod Maok, ruodh Gath.
3 Daudi gi joge ne odak gi Akish e piny Gath. Ng’ato ka ng’ato kuom joge ne odak gi joode. To Daudi bende ne odak gi mondene ariyo ma gin Ahinoam+ nya Jezreel kod Abigail+ ma ne chi Nabal Ja-Karmel.
4 Kuom mano, ka ne onyis Saulo ni Daudi oringo modhi Gath, ne oweyo manye.+
5 Daudi nowacho ne Akish niya: “Ka iyie, miya achiel kuom mier matindo mondo adagie. Ok owinjore adag gi ruoth e dalane.”
6 Akish nomiyo Daudi gweng’ mar Ziklag+ chieng’no. Mano e momiyo Ziklag en mar ruodhi mag Juda nyaka kawuononi.
7 Daudi ne odak e piny Jo-Filistia kuom higa achiel gi dweche ang’wen.+
8 Daudi gi joge ne dhiga monjo Jo-Geshur,+ Jo-Girzi, kod Jo-Amalek+ ma ne odak chakre Telam nyaka Shur+ kendo nyaka e tong’ piny Misri.
9 Ka ne Daudi odhi monjo pinjego, ne ok owe ng’ama dichwo kata ng’ama dhako ka ngima.+ Kata kamano, nokawo rombe, diek, dhok, punde, ngamia, kod lewni kae to odok ir Akish.
10 To ka ne Akish openje ni, “Kawuono ne imonjo kanye?” Daudi ne dwoke kama: “Kawuono ne amonjo milambo* mar piny Juda”+ kata “Kawuono ne amonjo milambo mar piny Jerameel”+ kata “Kawuono ne amonjo milambo mar piny Keni.”+
11 Daudi ne ok we ng’ama dichwo kata ng’ama dhako ka ngima mondo giduoggo Gath nimar nowacho kama: “Di po ka gifulowa ka giwacho ni, ‘Ma e gima Daudi notimo.’” (Kamano e kaka Daudi ne jatimo kinde duto ma ne odak e piny Jo-Filistia.)
12 Akish ne yie gi weche Daudi kendo nowacho e chunye niya: ‘Adier, Jo-Israel duto osin kode ahinya, omiyo obiro bedo jatichna kinde duto.’
Weche Moler Piny
^ Kata, “Negeb.”
