Samuel Mokwongo 5:1-12
5 Jo-Filistia ne okawo Sandug Singruok+ mar Nyasaye madier, mi gigole Ebenezer ma gitere Ashdod.
2 Ne gitero sandugno e od* nyasachgi miluongo ni Dagon+ mi gikete e dir nyasachgino.
3 Kinyne ka ne Jo-Ashdod ochiewo gokinyi, ne giyudo ka Dagon opodho piny auma e nyim Sandug Singruok mar Jehova.+ Omiyo, ne gichungo nyasachgino ma gidwoke kare.+
4 E odiechieng’ maluwe, ne gichiewo gokinyi mi giyudo ka Dagon opodho piny kendo, e nyim Sandug Singruok mar Jehova. Wi Dagon kod lwetene ne ochot mi okere e dho ot. Kore* kende e ma ne odong’ ma ok otore.
5 Mano e momiyo jodolo mag Dagon kaachiel gi ji duto ma donjo e od Dagon man Ashdod ok nyon ka ma wi Dagon gi lwetene ne okere.
6 Jehova ne osando Jo-Ashdod mogoyo pinygi gi alworane gi tuo malich mar buche.*+
7 Ka ne Jo-Ashdod oneno gima ne otimoreno, ne giwacho niya: “Kik wawe Sandug Singruok mar Nyasach Israel obed kodwa, nikech osandowa malit, kendo osando Dagon nyasachwa bende.”
8 Ne gioro wach mi gichoko jotelo duto mag Jo-Filistia mi gipenjogi niya: “Watim ang’o gi Sandug Singruok mar Nyasach Israel?” Jotelogo ne odwokogi kama: “Teruru Sandug Singruok mar Nyasach Israel Gath.”+ Omiyo, ne gitero sandugno Gath.
9 Ka ne gitero sandugno kuno, Jehova ne osando jodalano, mi ne gibedo gi luoro maduong’. Ne ogoyo jodalano gi tuo malich mar buche,* chakre nyithindo nyaka jo ma dongo.+
10 Omiyo, Jo-Gad ne otero Sandug Singruok mar Nyasaye madier e piny Jo-Ekron.+ To ka ne Sandugno ochopo achopa Ekron ni i, Jo-Ekron ne ochako ywak ka giwacho ni: “Gikelonwa Sandug Singruok mar Nyasach Israel mondo onegwa waduto!”+
11 Omiyo, ne gioro wach mi gichoko jotend Jo-Filistia duto mi giwachonegi niya: “Goluru Sandug Singruok mar Nyasach Israel kae; dwokeuru ka ma onego obedie mondo kik negwa kaachiel gi jowa.” Dalano duto ne luor ni gibiro tho nikech Nyasaye ne sandogi malit.+
12 Buche ne okuodo ng’ato ang’ata ma ne ok otho, kendo ywak mar jodalano ne ochopo nyaka e polo.
Weche Moler Piny
^ Kata, “hekalu.”
^ Hibrania, “ka ma chalo gi rech.”
^ Buchego ne kuodo siandagi.
^ Buchego ne kuodo siandagi.
