Samuel Mokwongo 9:1-27
-
Samuel romo gi Saulo (1-27)
9 Ne nitie Ja-Benjamin ma nyinge Kish.+ Ne en wuod Abiel ma wuod Zeror, wuod Bekorath, ma wuod Afia Ja-Benjamin,+ kendo ne en gi mwandu mang’eny ahinya.
2 Ne en gi wuoyi ma jachia miluongo ni Saulo,+ kendo ne onge wuoyi moro amora e Israel ma ne jachia ma loye. Ne orabora moloyo ji duto kendo onge ng’at ma ne kalo goke.
3 Chieng’ moro, punde mag Kish wuon Saulo ne olal mi Kish onyiso Saulo niya: “Kaw jatich achiel mondo udhi umany punde molal.”
4 Ne giwuotho e piny gode mag Efraim kod e piny Shalisha duto, to ne ok giyudogi. Ne gidhi e piny Shaalim kendo kuno bende ne ok giyudogi. Ne giwuotho e piny Benjamin duto, to ne ok giyudogi.
5 Ka ne gichopo e piny Zuf, Saulo ne owacho ne jatijno niya: “Wadog dala ka pok chuny wuonwa ochako chandore ni wan bende walal.”+
6 To jatijno ne odwoke niya: “Nitie ng’at Nyasaye moro ma odak e taondni kendo en ng’at ma omi luor ahinya. Gimoro amora ma owacho timorega.+ Wadhi ire sani, di po ka onyisowa yo monego waluw.”
7 Saulo nodwoke kama: “To ka wadhi, ang’o ma dwamiye? Waonge makate e ofukewagi. Waonge kata gima wanyalo tero kaka mich ne ng’at Nyasaye. Ang’o ma wan-go ma dwamiye?”
8 Jatijno ne odwoko Saulo niya: “Ne! An gi shekel* akuota e lweta ka. Abiro miye mondo onyiswa yo monego waluw.”
9 (Chon ka ne Ja-Israel dwaro penjo Nyasaye gimoro, ne owacho niya: “Bi wadhi ir janen.”+ Nimar kamano e kaka ne iluongo janabi e kindego.)
10 Eka Saulo nowacho ne jatije kama: “Gima iwachono ber. We wadhi.” Omiyo, ne gidhi e dala ka ma ng’at Nyasaye ne nitie.
11 Sa ma ne giidho ka gidhi e dalano, ne giromo gi nyiri moko ka dhi omo pi, mi gipenjogi niya: “Be janen+ nitie kae?”
12 Ne gidwoke niya: “Ee, en mana nyimu kanyo. Returu, nimar obiro e dala kawuono nikech ji dwaro chiwo misango+ ka ma oting’ore malo.+
13 Ka ureto, to ubiro yude ka pok odhi chiemo kar lamono. Ji ok bi chiemo ka pok ochopo nikech en e ma oguedhoga misango. Ka oseguedho misango, e ka jo ma ogwel biro chiemo. Kuom mano, dhiuru mana sani to ubiro yude.”
14 Omiyo, ne gidhi e dalano. Ka ne gichopo e chuny dala, Samuel ne oromonegi mi odhi kodgi nyaka kar lamo moting’ore malo.
15 To odiechieng’ motelo ka ne Saulo pok obiro, Jehova nonyiso Samuel niya:
16 “Kiny, sa ma ka ma, abiro oroni ng’at moro moa e piny Benjamin.+ Ibiro wale mondo obed jatelo ne joga+ kendo obiro resogi e lwet Jo-Filistia. Nimar aseneno kaka gichandore kendo asewinjo ywakgi.”+
17 Ka ne Samuel oneno Saulo, Jehova nowacho ne Samuel niya: “Ma e ng’at ma ne awacho ni biro bedo ruoth e wi joga.”+
18 Saulo ne odhi ir Samuel e dier dala ka ma ne entie mokwaye niya: “Kiyie, nyisae ka ma od janen nitie.”
19 Samuel nodwoke kama: “An e janen. Tel wadhi e kar lamo moting’ore malo mondo ichiem koda kawuono,+ eka kiny gokinyi nagonyi mondo idhi, kendo abiro nyisi gik moko duto midwaro ng’eyo.
20 Kik chunyi chandre e wi punde ma ne olal,+ nikech oseyudgi. En ng’ano ma nigi gik mabeyo duto e piny Israel? Donge en mana in kod od wuonu?”+
21 Eka Saulo ne odwoke niya: “Ma an mana Ja-Benjamin, dhoot matinie mogik e Israel,+ kendo anyuolawa e ma tinie mogik e dhood Benjamin, ang’o momiyo iwachona gik ma chalo kama?”
22 Samuel ne okawo Saulo gi jatije mi gidhi kar chiemo kendo noketogi ka ma oyiedhi e kind jo ma ne ogwel, ne gin ji ma dirom 30 kama.
23 Samuel ne odhi monyiso jatedo niya: “Kelna ring’o ma ne anyisi ni iketna tenge.”
24 Eka jatedo ne okelo ring’ono mi okete e nyim Saulo. Samuel nowacho niya: “Osekelni gima ne okanni. In e ma ne okannigo mondo ichame e romoni. Chame, nimar ne anyiso jotedo ni an gi welo.” Omiyo, Saulo nochiemo gi Samuel e odiechieng’no.
25 Bang’ mano, ne gia ka ma oting’ore+ mi gidhi e dala. Samuel ne odhi nyime goyo mbaka gi Saulo ka gibet e wi tado.
26 Kinyne, ne gimondo chiewo to sa ma piny ne chako yawore, Samuel noluongo Saulo e tado monyise niya: “Ikri, mondo akowi.” Omiyo, Saulo noikore mi giwuok.
27 Ka ne gichopo oko mar dalano, Samuel nowacho ne Saulo niya: “Nyis jatiji+ otel, to in rit mondo anyisi wach mowuok kuom Nyasaye.” Omiyo, jatijno notelo.
Weche Moler Piny
^ Shekel achiel ne romre gi gram 11.4. Som Apendiks B14.
