Ezekiel 19:1-14
-
Wer ma iywagogo jodong Israel (1-14)
19 “Iniywag jodong Israel gi wend ywagruok
2 kiwacho niya,‘Minu ne chalo nade? Sibuor ma dhako e kind sibuoche.
Ne onindo e kind sibuoche ma roteke, kendo ne opidho nyithinde.
3 Ne opidho nyathine moro mi obedo sibuor ma ratego.+
Ne opuonjore kidho le,To kata mana dhano bende nochamo.
4 Ogendni nowinjo humbe mi gimake e bur ma ne gikunyo,Ne giketo ramaki e ume mi gitere e piny Misri.+
5 Min-gi ne paro ni odhi duogo, to ne ok oduogo.
Omiyo, ne otiego nyathine machielo mi obedo sibuor ma ratego.
6 Ne owuotho e kind sibuoche mamoko mi obedo sibuor ma ratego.
Ne opuonjore kidho le, kendo en bende nochamo nyaka dhano.+
7 Ne owuotho e kind ohinga maggi motegno mi ne oketho miechgi,Dwonde ne okwako piny ma nodong’ gundano.+
8 Ogendni manie alworano ne obiro kedo kode mi ne gichikone obadho mondo gimakego,
Kendo ne gimake e bur ma ne gikunyo.
9 Ne gimake gi ramaki mi gitueye e od tuech kendo ne gitere ir ruodh Babulon.
Ne gitueye kuno mondo kik winj dwonde kendo e gode mag Israel.
10 Minu ne chalo ka mzabibu+ e rembi,* ee, mzabibu mopidh e bath pige.
Ne onyago olemo kendo bedene ne ng’eny nikech pi ne ng’eny.
11 Ne odongo mi obedo gi bede motegno, bede moromo loso ludh-loch.
Ne odongo mi ohingo yiende mamoko duto,Ji duto ne nyalo nene nikech borne kod obokene mang’eny.
12 To nopudhe gi mirima+ mi owite piny,Yamb ugwe ne omiyo olembene otwo.
Bedene motegno notur mi otwo,+ kendo mach ne owang’ogi.+
13 To koro osepidhe e thim,E piny motwo, ma onge pi.+
14 Mach nolandore mi owang’o bedene gi olembene,Kendo notieko bedene motegno, mi oweye ma onge ludh-loch.+
“‘Mano e wend ywagruok, ee, enobed wend ywagruok.’”
Weche Moler Piny
^ Kata nyalo bedo, “ka mzabibu e puothi mar mzabibu.”
