Jeremia 27:1-22
27 Ka ne Jehoyakim wuod Josia ruodh Juda ochako locho, wach Jehova ne obiro ne Jeremia niya:
2 “Jehova owachona ni, ‘Kaw tonde molir kod yiende, mondo ilosgo jok kae to irwak e ng’uti.
3 Kendo inimigi joote mobiro Jerusalem ir Zedekia ruodh Juda mondo gikowgi ne ruodh Edom,+ ruodh Moab,+ ruodh Jo-Amon,+ ruodh Turo,+ kod ruodh Sidon.+
4 Kendo ichikgi mondo giwach wachni ne ruodhigi:
“‘“Ma e gima Jehova Nyasach oganda lweny, Nyasach Israel owacho mondo unyis ruodhiu,
5 ‘An e ma ne achueyo piny, dhano, kod le duto manie piny gi tekona maduong’, kendo gi bada moriere. Omiyo, anyalo chiwe ne ng’ato ang’ata ma adwaro.+
6 To koro sani aseketo pinjego duto e lwet jatichna Nebukadnezar+ ruodh Babulon. Bende, asemiye le duto mondo otine.
7 Ogendni duto biro tiyone, kendo giniti ne wuode kod nyakware, nyaka chieng’ ma pinye nopodhi.+ E ndalogo, obiro bedo misumba ogendni mang’eny kod ruodhi madongo.’+
8 “‘“‘To ka oganda kata pinyruoth moro otamore tiyo ne Nebukadnezar ruodh Babulon, kendo otamore soyo ng’ute e majoko mar ruodh Babulon, abiro kumo ogandano gi ligangla,+ kech, kod tuo malich, nyaka chop atiek ogandano chuth gi lwet Nebukadnezar ruodh Babulon,’ Jehova owacho.
9 “‘“‘Kuom mano, kik uchik itu ne jo ma nyisou ni, “Ok ubi tiyo ne ruodh Babulon,” bed ni gin jonabiu, jo ma lokonu fweny, jo ma lokonu lek, ajuokeu, kata jo ma koronu wach.
10 Nimar jogo duto koronu mana weche mag miriambo, kendo gibiro miyo omaku mi teru mabor gi pinyu. Abiro keyou kendo unulal nono.
11 “‘“‘To oganda ma biro yie rwako majoko mar ruodh Babulon kendo tiyone, e ma abiro weyo mondo odong’ e pinye, kendo puro puothene,’ Jehova owacho.”’”
12 Kamano bende e kaka ne awuoyo gi Zedekia+ ruodh Juda ka anyise niya: “Rwakuru e ng’utu majoko mar ruodh Babulon, kendo utine kaachiel gi joge, e ka unubed mangima.+
13 Ere tiende mondo in kod jogi utho gi ligangla,+ gi kech,+ kendo gi tuo+ mana nikech utamoru tiyo ne ruodh Babulon kaka Jehova ochiko?
14 Kik uchik itu ne jonabi ma koronu ni, ‘Ok ubi tiyo ne ruodh Babulon,’+ nikech gikoronu mana miriambo.+
15 “‘Nimar an awuon ok aorogi,’ Jehova owacho, ‘to gikoro mana miriambo gi nyinga, kendo mano biro miyo akeu mi ulal nono, un kaachiel gi jonabi ma koronu miriambogo.’”+
16 Ne anyiso jodolo kod ogandani duto kama: “Ma e gima Jehova owacho, ‘Kik uchik itu ne weche mag jonabiu ma koronu miriambo+ niya: “Neuru! Machiegnini,+ ibiro kel sende mag od Jehova koa Babulon!”
17 Kik uchiknegi itu ngang’. Tiuru ne ruodh Babulon to ubiro bedo mangima.+ Ere gimomiyo diketh dalani nono?
18 To ka gin jonabi madier kendo gikoro weche Jehova, we gikwa Jehova Nyasach oganda lweny mondo sende modong’ e od Jehova, kendo e od ruodh Juda kaachiel gi Jerusalem, kik ter Babulon.’
19 “Nimar ma e gima Jehova Nyasach oganda lweny owacho e wi sirni,+ Nam,*+ geche,+ kod sende duto ma nodong’ e dalani,
20 ka ne Nebukadnezar ruodh Babulon otero Jekonia wuod Jehoyakim ruodh Juda, kaachiel gi jodong Juda gi Jerusalem+ e tuech e piny Babulon,
21 ee, ma e gima Jehova Nyasach oganda lweny, Nyasach Israel owacho e wi sende duto ma nodong’ e od Jehova, e od ruodh Juda kendo e Jerusalem:
22 ‘“Ibiro tergi Babulon+ kendo ginidong’ kuno nyaka chieng’ ma anabinegi,” Jehova owacho. “Bang’ mano, abiro duokogi mi aketgi kaeri.”’”+
Weche Moler Piny
^ Tiende ni, karaya maduong’ mar mula ma ne itiyogo e hekalu.
