Jeremia 41:1-18
41 E dwe mar abiriyo, Ishmael+ wuod Nethania wuod Elishama ma ne wuok e anyuola mar joka ruoth, kendo achiel kuom jodong ruoth, ne odhi Mizpa+ kaachiel gi ji apar ir Gedalia wuod Ahikam. Sa ma ne oyudo gichiemo kanyachiel ka gin Mizpa,
2 Ishmael wuod Nethania gi joge apargo, ne oa malo monego Gedalia wuod Ahikam wuod Shafan gi ligangla. Ne onego ng’at ma ruodh Babulon ne oketo mondo oloch e wi pinyno.
3 Ishmael bende ne onego Jo-Yahudi duto ma ne ni Mizpa gi Gedalia kaachiel gi jolwenj Jo-Kaldea ma ne oyudo ni kuno.
4 Kinyne ka ne pok ng’ato ang’ata ong’eyo ni Gedalia osenegi,
5 ji 80 ne obiro koa Shekem,+ Shilo,+ kod Samaria.+ Yie tikgi ne oliel, lepgi ne oyiechi, kendo ne gisaro dendgi.+ Ne giting’o chiwo mag cham kod ubani+ ma ne gikelo e od Jehova.
6 Eka Ishmael wuod Nethania ne oa Mizpa mondo oromnegi. Ne odhi romonegi koywak. Ka ne ochopo irgi ne owachonegi niya: “Wadhiuru ir Gedalia wuod Ahikam.”
7 To ka ne gichopo dier dalano, Ishmael wuod Nethania ne onegogi, kae to owito ringregi e i bugo.
8 To ji apar kuomgi ne owacho ne Ishmael niya: “Kik inegwa, nikech wan gi gik moko ma wasepando e puodho. Wan gi ngano, shairi, mo, kod mor kich.” Omiyo, ne ok onegogi gi jowetegi.
9 Koro, Ishmael ne owito ringre jo ma ne onegogo e bugo moro maduong’ ma Ruoth Asa nokunyo e ndalo ma ne okedo gi Baasha ruodh Israel.+ Mano e bugo ma Ishmael wuod Nethania ne opong’o gi ringre jogo.
10 Ishmael ne omako ji duto ma ne ni Mizpa,+ moriwo nyaka nyi ruoth kod ji duto ma ne odong’ Mizpa, ma Nebuzaradan jatend jorit noketo e bwo Gedalia+ wuod Ahikam moterogi e tuech. Ishmael wuod Nethania ne okawo jo ma ne omakogo, mong’ado kodgi nyaka e piny Jo-Amon.+
11 To ka Johanan+ wuod Karea, kod jotend jolweny ma ne ni kode owinjo gik maricho duto ma ne Ishmael osetimo,
12 ne gikawo chwo duto mi gidhi kedo kod Ishmael wuod Nethania. Ne giyude e but pige mang’eny* man Gibeon.
13 Ka ne ji duto ma ne ni kod Ishmael oneno Johanan wuod Karea kod jotend jolweny ma ne ni kode, ne gimor ahinya.
14 Eka ji duto ma ne Ishmael omako Mizpa+ mondo otergi e tuech, ne olokore mi gidok gi Johanan wuod Karea.
15 To Ishmael wuod Nethania kod joge aboro, ne otony e lwet Johanan mi giringo nyaka ir Jo-Amon.
16 Eka Johanan wuod Karea kod jotend jolweny ma ne ni kode ne oreso jo ma Ishmael wuod Nethania ne omako Mizpa, bang’ ka nosenego Gedalia+ wuod Ahikam. Ne giduoko chwo, jolweny, mon, nyithindo, kod jodong od ruoth ma ne gigolo Gibeon.
17 Ne gia kuno mi gibworo Kimham but Bethlehem,+ nimar ne gichano dhi piny Misri+
18 nikech ne giluoro Jo-Kaldea. Ne giluor nikech Ishmael wuod Nethania ne osenego Gedalia wuod Ahikam, jal ma ne ruodh Babulon oketo mondo oloch e wi pinyno.+
Weche Moler Piny
^ Kata nyalo bedo, “e but yawo maduong’.”
