Ne Jo-Rumi 16:1-27
16 Aketo Fibi nyaminwa e lwetu, ma en jatich e kanyakla man Kenkrea,+
2 mondo urwake kuom Ruoth e yo mowinjore gi jo maler, kendo ukonye e wach moro amora ma dodwar,+ nikech en owuon osekonyo ji mang’eny, moriwo an bende.
3 Mosnauru Priska gi Akula,+ jotich wetena kuom Kristo Yesu,
4 ma ne oikore kata mana thona,+ kendo aduokonegi erokamano, to ok mana an kenda, to bende kanyakla duto mag ji moa e ogendni mamoko.
5 Mosnauru bende kanyakla ma romo e odgi.+ Mosnauru Epaineto owadwa ma ahero, ma en nyak mokwongo mar Kristo e Asia.
6 Mosuru Maria ma osetiyonu matek.
7 Mosuru Androniko kod Junias ma gin wedena+ kendo jotuech wetena. Gin jo mong’ere maber e nyim joote kendo gisebedo jolup Kristo kuom kinde malach moloya.
8 Mosnauru Ampliato, owadwa ma ahero kuom Ruoth.
9 Mosuru Urbano, ma en jatich wadwa kuom Kristo, kod Stakis jal ma ahero.
10 Mosuru Apele, jal malong’o kuom Kristo. Mosuru jo ma oa e od Aristobulo.
11 Mosuru Herodian ma watna. Mosuru jo ma oa e od Narkiso, ma luwo Ruoth.
12 Mosuru Trufena kod Trufosa, ma gin mon ma tiyo matek kuom Ruoth. Mosuru Persi nyaminwa ma wahero, nimar notiyo matek kuom Ruoth.
13 Mosuru Rufus jal moyier kuom Ruoth kod min-gi ma bende en minwa.
14 Mosuru Asunkrito, gi Flegon, gi Herme, gi Patroba, gi Hermas, kod owete man kodgi.
15 Mosuru Filologo kod Julia, gi Nereas kod nyamin-gi, gi Olumpa kod jo maler duto man kodgi.
16 Mosreuru gi nyoth maler. Kanyakla duto mag Kristo omosou.
17 Owetena, koro asayou ni utang’ gi jo ma kelo pogruok kod gik ma kelo chwanyruok ma kwedo puonj ma useyudo, kendo uweru kodgi.+
18 Nimar jo ma kamago gin wasumbni, ok mag Ruodhwa Kristo, to mag igi giwegi, kendo giywayo chuny jo ma ok otang’ ka gitiyo gi dhok mamit kod weche mag pak.
19 Chuny ma un-go mar timo kaka Nyasaye chiko oseng’ere ne ji duto, omiyo amor kodu. To adwaro ni ubed jo mariek korka gik mabeyo, to ubed jo ma onge lony korka gik maricho.+
20 To Nyasaye ma chiwo kuwe biro ng’inyo Satan+ e bwo tiendeu machiegni. Ng’wono mogundho mar Ruodhwa Yesu Kristo mondo obed kodu.
21 Timotheo, ma en jatich kanyachiel koda omosou. Lukio, gi Jason, kod Sosipatro, ma gin wedena bende omosou.+
22 Amosou kuom Ruoth, an Tertio, jal mondiko baruani.
23 Gayo+ jal ma orwaka e ode kendo ma kanyakla duto romo e ode, omosou. Erasto ma en jarit mochung’ ne mwandu mag taondni omosou, Kwarto owadgi bende omosou.
24 *—
25 Koro Nyasaye nyalo tegou. Mano en kokalo kuom wach maber ma alando kod wach ma ji yalo e wi Yesu Kristo. Wach maberno otudore gi elo wach maler moseum+ kuom kinde malach ahinya.
26 To koro oseele. Kendo kokalo kuom Ndiko mokor, ogendni duto oseng’eyo wach moumno. Mano luwore gi chik mar Nyasaye mochwere. Dwarone en ni ogendni duto oyie kuome kendo giwinje.
27 Duong’ mondo obed ne Nyasaye ma e jal mariek,+ kokalo kuom Yesu Kristo nyaka chieng’. Amin.
Weche Moler Piny
^ Som Apendiks A3.
