Joshua 11:1-23
11 Ka ne Jabin ruodh Hazor owinjo kamano, nooro wach ne Jobab ruodh Madon,+ kendo ne ruodh Shimron, gi ruodh Akshaf,+
2 gi ruodhi ma ne ni yo nyandwat e piny motimo gode, gi ruodhi ma ne ni yo milambo mar Kinereth, gi ma ne ni Shefela, gi ma ne ni e gode mag Dor+ yo podho chieng’,
3 gi ruodhi Jo-Kanaan+ ma ne ni yo wuok chieng’ gi yo podho chieng’, kendo ne ooro wach ne Jo-Amor,+ gi Jo-Hiti, gi Jo-Perizi, gi Jo-Jebus ma ne nie piny motimo gode, gi Jo-Hivi+ ma ne nie tiend god Hermon+ e piny Mizpa.
4 Ruodhigo duto nowuok gi jolwenjgi ma ne ng’eny mana ka kuoyo manie dho nam. Ne gibiro kaachiel gi farese kod geche lweny modhuro.
5 Ruodhigo ne oromo e dho pige mag Merom ma gigoyo kambi kanyo mondo gimonj Jo-Israel.
6 Bang’ timo kamano, Jehova nonyiso Joshua niya: “Kik iluorgi,+ nimar kiny seche ma kamagi biro yudo ka aseketogi e lwetu munegogi giduto. Ne ni ung’ado leche mag tiende faresegi,+ kendo uwang’o e mach gechegi mag lweny.”
7 Bang’ mano, Joshua gi jolweny duto ne omonjo wasigugo apoya e dho pige mag Merom.
8 Kendo Jehova nochiwo jogo e lwet Jo-Israel+ mi Jo-Israel oloyogi molawogi nyaka Sidon+ gi Misrefoth-maim+ nyaka Paw Mizpa yo wuok chieng’, ma ginegogi giduto ma onge kata mana ng’at achiel ma ne otony.+
9 Kendo Joshua notimonegi mana kaka Jehova nochike. Nong’ado leche mag tiende faresegi kendo nowang’o gechegi mag lweny.+
10 Bang’ mano, Joshua nodok mokawo piny Jo-Hazor monego ruodhe gi ligangla,+ nimar piny Hazor e ma ne otelo ne pinjeruodhi mamokogo duto.
11 Ne onego ji duto e pinyno gi ligangla,+ ma onge kata mana ng’ato achiel ma ne oweyo ka ngima.+ Kae to ne owang’o Hazor gi mach.
12 Ee, Joshua nokawo mier mag ruodhigo duto monego ji duto ma ne ni kuno gi ligangla.+ Ne otieko jogo duto+ mana kaka Musa jatich Jehova nochike.
13 Kata kamano, Jo-Israel ne ok owang’o mier ma ne ni kuonde moting’ore mak mana Hazor. Pinyno kende e ma ne Joshua owang’o.
14 Jo-Israel nopeyo mwandu kod jamni duto mag miergo.+ Dhano duto to ne ginego gi ligangla.+ Onge kata mana ng’at achiel ma ne giweyo ka ngima.+
15 Joshua notimo mana kaka Jehova nosechiko Musa jatichne.+ Onge gimoro kata achiel ma Jehova nochiko Musa ma Joshua ne ok otimo.+
16 Piny ma Joshua nokawo nokwako piny motimo gode, Negeb duto,+ piny Goshen duto, Shefela,+ Araba,+ kaachiel gi kuonde motimo gode mag Israel kod Shefela,
17 chakre Got Halak ma omanyore gi Seir, nyaka Baal-gad+ manie Hoho mar Lebanon e tiend Got Hermon.+ Noloyo pinjego kendo nomako ruodhigi duto monegogi.
18 Kata kamano, Joshua nokedo gi ruodhigo kuom kinde mogwaro.
19 Onge piny ma ne oloso kuwe gi Jo-Israel, mak mana Jo-Hivi ma ne odak Gibeon.+ Pinje modong’ duto, Jo-Israel nokawo gi lweny.+
20 Jehova e ma ne omiyo weg pinjego obedo gi wich-teko+ mar kedo gi Jo-Israel. Notimo kamano mondo omi otiekgi ma onge ng’wono.+ Ne dwarore ni otiekgi chuth mana kaka Jehova nosechiko Musa.+
21 Kindeno e ma Joshua notiekoe Jo-Anakim+ ma ne odak e piny motimo gode, chakre Hebron, nyaka Debir, nyaka Anab, gi kuonde gode duto mag Juda, gi kuonde gode duto mag Israel. Joshua nonego wasigugo duto moketho pinjegi.+
22 Kendo onge Jo-Anakim ma ne odong’ e piny Israel; ne gidong’+ mana e piny Gaza,+ piny Gath,+ gi piny Ashdod.+
23 Omiyo, Joshua nokawo pinyno duto mana kaka Jehova nosesingo ne Musa.+ Mi omiyo dhoudi duto mag Israel pokgi mondo gipogre e kindgi.+ Kamano piny nobedo gi kuwe ma onge lweny.+
