Joshua 4:1-24
-
Kite bedo rapar (1-24)
4 Bang’ ka Jo-Israel duto noseng’ado Aora Jordan, Jehova nowacho ne Joshua niya:
2 “Yier ji 12 kuom oganda, kiyiero ng’ato achiel e dhoot ka dhoot,+
3 kendo ichikgi niya: ‘Kawuru kite 12 e chuny Aora Jordan ka ma tiend jodolo ne onyono,+ kendo uting’ kitego nyaka ka ma ubiro nindoe kawuono.’”+
4 Kuom mano, Joshua noluongo ji 12 ma ne oseyiero e dhout Jo-Israel,
5 mowachonegi niya: “Dhiuru e nyim Sandug Singruok mar Jehova Nyasachu e chuny Aora Jordan, kendo ng’ato ka ng’ato kuomu okaw kidi achiel mondo oting’ e goke. Moro ka moro kuom kitego ochung’ ne dhoot ka dhoot mar Israel,
6 kendo gibiro bedonu kaka rapar. To ka nyithindu chieng’ openjou ni, ‘Kitegi gin mag ang’o?’+
7 Ubiro nyisogi niya: ‘Kitegi paro ne Jo-Israel+ ni ka ne sandug singruok+ mar Jehova ochopo e dho Aora Jordan, pi ne ochung’. Kendo pi ne ok omol ka ne sandugno ng’ado aorano.’”
8 Omiyo, Jo-Israel notimo mana kaka Joshua nochikogi. Ne gikawo kite 12 e dier Aora Jordan mana kaka Jehova nonyiso Joshua. Kitego ne rom gi kwan mag dhout Israel. Ne giting’ogi nyaka ka ma ne gidhi nindoe chieng’no, kae to giketogi kanyo.
9 Joshua bende nopango kite 12 e chuny Aora Jordan ka ma jodolo ma ne oting’o sandug singruok ne ochung’ie,+ kendo kitego pod ni kanyo nyaka kawuononi.
10 Jodolo ma ne oting’o sanduk ne ochung’ e dier Aora Jordan nyaka ne otiek timo gik moko duto ma Jehova nochiko Joshua mondo onyis oganda ni otim, kaluwore gi kaka Musa ne osechiko Joshua. Gie sechego, oganda to ne ng’ado aora piyo piyo.
11 Ka ne oganda duto osetieko ng’ado Aora Jordan, jodolo nowuok e aorano ka giting’o Sandug Singruok mar Jehova ka ogandago ng’iyogi.+
12 Jo-Reuben, gi Jo-Gad, kod nus Jo-Manase nong’ado aora motelo ne Jo-Israel wetegi ka giikore ne lweny+ mana kaka Musa nosechikogi.+
13 Jolweny ma dirom 40,000 nong’ado aora e nyim Jehova ma gidhi e paw Jeriko.
14 Chieng’no, Jehova nomiyo Joshua duong’ e nyim Jo-Israel duto,+ kendo e ngimane duto, Jo-Israel ne omiyo Joshua luor ahinya mana kaka ne gimiyo Musa luor.+
15 Eka Jehova nonyiso Joshua niya:
16 “Nyis jodolo ma oting’o sandug Chik+ mondo giwuog e Aora Jordan.”
17 Omiyo, Joshua nowacho ne jodolo niya: “Wuoguru e Aora Jordan.”
18 Ka ne jodolo ma ne ting’o sandug singruok+ mar Jehova osewuok e Aora Jordan ma ginyono lowo motuo, pi Aora Jordan ne odok e wang’e mi ochako mol ka opong’+ mana kaka ne en.
19 Oganda ne ong’ado Aora Jordan tarik 10 dwe mokwongo, kendo ne gigoyo kambi Gilgal+ e tong’ man yo wuok chieng’ mar Jeriko.
20 Joshua nokawo kite 12 ma ne gigolo e Aora Jordan mopangogi Gilgal.+
21 Kae to nowacho ne Jo-Israel niya: “Kinde mabiro ka nyithindu nopenju ni, ‘Kitegi gin mag ang’o?’+
22 ubiro dwokogi niya: ‘Jo-Israel nong’ado Aora Jordan ka en piny motwo+
23 nikech Jehova Nyasachwa ne oduononwa pi Jordan ka waneno gi wang’wa mi wang’ado aorano. To kamano bende e kaka Jehova Nyasachwa notimonwa e Nam Makwar ma ne oduononwa ka waneno gi wang’wa mi wang’ado.+
24 Notimo kamano mondo ji duto e piny ong’e ni Jehova nigi teko mang’eny,+ kendo mondo uluor Jehova Nyasachu kinde duto.’”
