Ngeche 13:1-25
13 Wuoyi mariek winjo puonj mag wuon mare,+To jasunga ok winj kikwere.+
2 Olemo ma dho ng’ato nyago miye gima ber monyalo chamo,+To jo andhoga gombo mana timbe gero.
3 Ng’at ma rito dhoge reso ngimane,+To ng’at ma ng’amo dhoge malach ochomo kethruok.+
4 Jasamuoyo gombo gimoro gi chunye duto, to oonge gimoro,+To jakinda noyud gima chunye dwaro.+
5 Ng’at makare osin gi miriambo,+To timbe joricho kelonegi wich-kuot kod achaya.
6 Tim makare rito ng’at ma yorene ni kare,+To richo e ma goyo ng’at marach piny.
7 Nitie ng’at ma wuondore ni en jamwandu, to oonge gimoro;+To nitie ng’at ma wuondore ni en jachan, to en gi mwandu mathoth.
8 Mwandu ma ng’ato nigo e ma waro ngimane,+To jachan onge kata gima bwogo.+
9 Ler mar jo makare rieny maler,+To tach jo maricho ibiro negi.+
10 Sunga kelo mana dhawo,+To jo ma manyo rieko kuom ji nobed mariek.*+
11 Mwandu moyud mayot lal piyo,+To mwandu michoko mos mos medore ameda.
12 Ka gima igeno obudho, chuny bedo matuo,+To ka gima igeno ochopo, en yath mar ngima.+
13 Ng’at ma ochayo puonj* biro chandore,+To ng’at ma rito chik noyud gueth.+
14 Puonj mar ng’at mariek en soko mar ngima+Ma reso ng’ato e obadho mag tho.
15 Rieko makare miyo ng’ato yudo ng’wono,To yor ja andhoga rach.
16 Ng’at mariek paro ka pok otimo gimoro,+To ng’at mofuwo elo mana fupe.+
17 Jaote marach donjo e chandruok,+To jaote ma ja adiera kelo konyruok.*+
18 Ng’at ma tamore siem yudo dhier kod wich-kuot,To ng’at ma winjo ka ikwere, nomi duong’.+
19 Gima ogen kochopo omiyo ng’ato bedo mamor,+To jo mofuwo tamore a e richo.+
20 Ng’at ma wuotho gi jo mariek nobed mariek,+To osiep jo mofuwo biro hinyore.+
21 Masira lawo joricho,+To gik mabeyo biro ne jo makare.+
22 Ng’at maber weyo pok ne nyikwaye,To mwandu jaricho biro dong’ ne ng’at makare.+
23 Puoth jachan nyago cham mang’eny,To tim ma ok kare tieke te.
24 Ng’at ma ok chwad wuode ok ohere,+To ng’at mohero wuode ok we ma ok orieye.*+
25 Ng’at makare chiemo ma yieng’,+To i ng’at marach ni nono.+
Weche Moler Piny
^ Kata, “jo ma winjo king’adonegi rieko nobed mariek.”
^ Kata, “chik.”
^ Kata, “chang.”
^ Kata nyalo bedo, “rieye mapiyo.”
