Ngeche 15:1-33
15 Dwoko mamuol kueyo mirima,+To wach makwiny jimbo ich-wang’.+
2 Lep ng’at mariek tiyo maber gi ng’eyo,+To dho ng’at mofuwo golo mana fuwo.
3 Wang’ Jehova ni kuonde duto,Orango jo maricho kod jo mabeyo.+
4 Lep mokuwe mos* en yadh ngima,+To weche ma ok oriere nyoso chuny.
5 Ng’at mofuwo ochayo puonj mar wuon mare,+To ng’at mariek winjo wach sa ma ikwere.+
6 E od ng’at makare nitie mwandu mang’eny,To ohala mar ng’at marach kelone masira.+
7 Dho ng’at mariek miyo ng’eyo landore,+To ok en kamano ngang’ gi chuny ng’at mofuwo.+
8 Chuny Jehova osin gi misango mar joricho,+To lamo mar ng’at matir moro chunye.+
9 Chuny Jehova osin gi yor jaricho,+To ohero ng’at ma luwo tim makare.+
10 Kum ok mor chuny ng’at moweyo yo,+To ng’at ma sin kikwere biro tho.+
11 Liel* gi kar kethruok* oelore e nyim Jehova.+
Chuny ji to koro oelore moloyo!+
12 Ja ajara ok ohero ng’at ma rieye.+
Ok odwar ni jo mariek ong’adne rieko.+
13 Chuny mamor miyo wang’ ng’ato bedo mamor,To parruok nyoso chuny dhano.+
14 Chuny mong’eyo pogo tiend wach dwaro ng’eyo,+To dho ng’at mofuwo chamo* mana fuwo.+
15 Ndalo duto mag ng’at ma chandore rach,+To ng’at ma chunye mor, nigi mor mosiko.*+
16 Ber bedo gi gik matin to iluoro Jehova+Moloyo mwandu mang’eny gi parruok.*+
17 Ber chamo alot ka ma nitie hera+Moloyo chamo ruath machwe ka ma nitie sigu.+
18 Ng’at ma iye wang’ piyo jimbo miero,+To ng’at ma tero mirimbe mos kueyo dhawo.+
19 Yor jasamuoyo chalo gi chiel mar kuthe,+To yor ng’at matir chalo gi ndara mopie maber.+
20 Wuoyi mariek miyo wuon mare mor,+To ng’at mofuwo ochayo min mare.+
21 Ng’at ma riekone tin omor gi weche mofuwo,+To ng’at mong’eyo pogo weche wuotho kodhi nyime tir.+
22 Ka ji ok wuo,* chenro ok chopi,To chenro chopo ka nitie jong’ad rieko mang’eny.+
23 Ng’ato bedo mamor kochiwo dwoko mowinjore,+To mano kaka wach mowach e kinde mowinjore ber!+
24 Yor ngima tero ng’at mariek malo,+Ogeng’e mondo kik odhi mwalo e Liel.*+
25 Jehova biro muko od jasunga,+To obiro rito kiewo mar chi liel.+
26 Jehova osin gi chenro mar ng’at marach,+To weche mabeyo e ma more.+
27 Ng’at ma yudo ohala e yor mibadhi kelo ne ode chandruok,*+To ng’at ma osin gi asoya biro dak aming’a.+
28 Chuny ng’at makare paro matut ka pok odwoko wach,+To dho jaricho golo mana weche maricho.
29 Jehova ni mabor ahinya gi jo maricho,To owinjo kwayo mag ng’at makare.+
30 Wang’ mamor miyo chuny mor;Wach maber tego choke.+
31 Ng’at ma chiko ite kimiye siem ma kelo ngimaBedo thuolo e kind jo mariek.+
32 Ng’ato ang’ata ma dagi kum* ochayo ngimane,+To ng’ato ang’ata ma winjo kikwere, weche donjone.+
33 Luoro Jehova puonjo dhano rieko,+Kendo bolruok e ma kelo duong’.+
Weche Moler Piny
^ Kata, “Wach ma hoyo chuny; Wach maber.”
^ Hibrania, “Sheol.” Som Tiend Weche.
^ Kata, “Abadon.”
^ Kata, “luwo.”
^ Kata, “timo nyasi pile.”
^ Kata, “chochni.”
^ Kata, “Ka ma ji ok wach weche ma ling’ ling’.”
^ Hibrania, “Sheol.” Som Tiend Weche.
^ Kata, “wich-kuot.”
^ Kata, “puonj.”
