Agostinho ma wuok e piny Brazil wacho kama: “Nadongo e piny Brazil kendo ne wadak kuonde ma ne nitie puothe mang’eny. Ne wadhier ahinya. Nochuna weyo skul mondo amany tich ma nanyalo timo mondo akonygo joodwa.” Agostinho nopuonjore somo gi ndiko mana bang’e ka ojahigni 33. Owacho kama: “Bang’ ng’eyo somo gi ndiko, nawinjo ka koro an be an ng’ato e ogandawa.”

Agostinho en achiel kuom ji ma dirom 250,000 ma Joneno mag Jehova osekonyo ng’eyo somo gi ndiko kuom higni 70 mosekalo. Ang’o momiyo Joneno mag Jehova osebedo gi chenro mar konyo ji ong’e somo gi ndiko? To gin ber mage ma joma osepuonj somo gi ndiko oseyudo?

Chop higa mar mag 1935, Joneno mag Jehova ne lendo e pinje mokalo 115. Mondo olend ne ji ma ne wacho dhok mopogore opogore, jomisonari ma ne lendo kindeno ne tugoga ne ji twege mag Muma ma nosemaki, to seche moko bende ne gimiyo ji buge ma wuoyo e wi Muma e dhok miwacho e alwora ma ne gilendoeno. Ne nitie ji mathoth ma norwako wach, kata kamano, ne tek mondo gipuonjre weche momedore nikech ne gikia somo gi ndiko.

Ka ng’ato ok nyalo somo Muma en owuon, ok yot ahinya mondo oti gi gik ma Muma puonjo e ngimane. (Joshua 1:8; Zaburi 1:2, 3) Bende, nyalo bedo matek mondo ng’ato ochop ting’ne kaka Jakristo. Kuom ranyisi, ka jonyuol ok ong’eyo somo, ok yot ahinya mondo gipuonj nyithindgi Muma. (Rapar mar Chik 6:6, 7) Bende, ne ok yot ne Joneno ma ne ok ong’eyo somo puonjo jomamoko weche ma ni e Muma.

E higni mag 1940 kod 1950, Nathan H. Knorr gi Milton G. Henschel, ma ne gin moko kuom joma ne tayo tij Joneno mag Jehova e kindeno, nowuotho e pinje mopogore opogore mondo gichan tij lendo kuondego. Nitie pinje ma ne giyudo ka thoth ji ne ok ong’eyo somo gi ndiko, kendo ne gijiwo ofisewa ma ni e pinjego mondo gichak klese mag puonjo ji somo gi ndiko.

Ofisewa mopogore opogore nooro ne kanyakla ma ni e bwogi program ma ne nyiso kaka ne ginyalo puonjo ji somo gi ndiko. E pinje moko, sirkal ne nigi program ma ne inyalo tigo e puonjo ji somo gi ndiko. Kuom ranyisi, e piny Brazil, ofis noyudo buge kowuok kuom sirkal ma ne nyalo konyogi kendo nokow bugego e kanyakla mopogore opogore. To e pinje mamoko, Joneno noloso program ma margi giwegi ma ne ginyalo tiyogo.

Ji duto ne nyalo dhi e klesego moriwo chwo, mon, joma dongo, kod joma tindo. Dwach Joneno mag Jehova ne en puonjo jogo ng’eyo somo kendo ndiko dhok ma ne giwacho, kata ka mano ne dhi chuno ni otim klese mag dhok mopogore opogore e kanyakla achiel.

Ere kaka program mar puonjo ji somo gi ndiko osekonyo? Janeno moro ma wuok Mexico wacho kama: “Koro anyalo winjo weche tiend Muma kendo weche ma asomo nyalo mulo chunya. Ng’eyo somo osekonya wuoyo gi jirendena ka an thuolo kendo koro anyalo lando ne ji mang’eny wach maber ma wuok e Muma.”

Program mar puonjo ji somo gi ndiko osekonyo ji e yore mamoko bende to ok mana e winjo tiend Muma kende. Isaac ma a Burundi wacho kama: “Ng’eyo somo gi ndiko osekonya puonjora tije mamoko. Kuom ranyisi, asepuonjora tij gedo kendo sani atayo tije mag gedo kuonde mopogore opogore e okang’ malach.”

Jesusa ma wuok Peru nochako puonjore somo gi ndiko ka en jahigni 49. Owacho kama: “Kaka miyo monego orit ode maber, ne dwarore ni ang’e nying gik ma ne iuso e chiro kod nengogi bende. Chon, mano ne ok en gima yot nikech ne ok ang’eyo somo. Kata kamano, sani to koro an gadier gi gik ma ang’iewo e chiro, nikech anyalo somo kendo ng’eyo nengogi.”

E higni mosekalo, jotelo ma a e pinje mopogore opogore osepwoyo Joneno mag Jehova nikech kinda ma gisebet ka gitimo mondo gikony ji ng’eyo somo gi ndiko. E kindegi bende, Joneno mag Jehova pod dhi nyime konyo ji ng’eyo somo gi ndiko, kendo gisemedo bero yore mopogore opogore ma gitiyogo e puonjo ji. Giseloso brosua mopogore opogore ma romo milion 224 e dhok 720 mondo okonygi e puonjo ji somo gi ndiko. *