Owete gi nyimine ma kwan-gi okalo pasent 60 ma tiyo gi thuologi duto e tij loko dhok, tiyo e ofise milokoe dhok mong’ere kaka RTO, to ok e bad ofise manie pinje mopogore opogore. Ang’o momiyo tiyo e ofis milokoe dhok en chenro mosekonyo? Gin gige tich mage ma dwarore ma jolok dhok onego obedgo mondo okonyogi e tij loko dhok ka gin e ofise kaka mago? Ere kaka keto ofis milokoe dhok e alwora miwachoe dhokno konyo e tij loko dhokno?

 Ofise milokoe dhok miyo jolok dhok thuolo mar dak gi thoth joma wacho dhokno. Karin ma tiyo e ofis milokoe dho Low German lero kama: “Nikech ne wadar ma wadhi e ofis milokoe dhok man Cuauhtémoc, e taon mar Chihuahua e piny Mexico, tinde wajawacho ahinya dho Low German gi jolok dhok wetewa ka wan e tij lendo kata sama wadhi ng’iepo. Joma wacho dhokno olworowa kamoro amora. Wajowinjo ji ka tiyo gi weche ma wasebudhonegi, kendo mano konyowa ng’eyo weche ma ji hinyo tiyogo ma wan be wanyalo tiyogo sama waloko.”

 James ma tiyo e ofis milokoe dho Frafra e piny Ghana, wacho ni en adier ni seche moko owinjoga kogombo Jo-Bethel ma ne gin-go e bad ofis ma Ghana. Omedo wacho kama: “Tiyo e ofis kae moraga ahinya. Lendo e alwora miwachoe dhok ma waloko kendo neno kaka ji rwako wach maber e dhokno moraga ahinya.”

 Ere kaka owete ng’eyoga alwora maber ketoe ofise milokoe dhok? Joseph ma en achiel kuom owete manie Migawo Mochung’ ne Tij Gedo e Piny Mangima e ofis ma Warwick, New York, e piny Amerka wacho kama: “Achiel kuom pek ma waromogago en ni nitie alwora ma sitima, pi, kod intanet thekoega kendo mano nyalo kelo pek moko e tij loko dhok. Omiyo, sama wadwa keto ofis milokoe dhok e alwora moro, wanonoga alwora mopogore opogore miwachoe dhokno.”

 Thothne, yo mayot kendo mapiyo mar chako ofis milokoe dhok kamoro en kete e Od Chokruok mar Alwora, Od Romo, kata e od jomisonari, kama jolok dhok nyalo wuok e utegi ka gidhi e ofis. To ka ute kaka mago onge, inyalo yiene owete mondo ging’iew ute moko kata ofis moseger chuth kama jolok dhok nyalo dakie ka gitiyo e ofis kanyo. Ka jolok dhok koro ok nyal dhi nyime tiyo e utego nikech weche mamoko, inyalo us utego kae to itiyo gi pesago e konyo tije ma dwarore moloyo.

 E higa mar tijwa ma 2020, ne watiyo gi dola milion 13 mag Amerka e siro tije ma dhi nyime e ofise mopogore opogore milokoe dhok. E ofisego, jolok dhok ne dwarore ni obed gi kompyuta, programbe mitiyogo e kompyuta, gige mako dwol, intanet, kod gik mamoko kaka mago. Keto ne jalok dhok achiel kompyuta gi gik moko duto ma dwarore, nyalo kawo pesa ma dirom siling’ 75,000 ma Kenya. Kompyutago nigi programbe mopogore opogore kaachiel gi program miluongo ni Watchtower Translation System (WTS), ma konyo jolok dhok chano kendo timo tijgi e yo maber.

 Bende, imiyoga jolok dhok gige mako dwol ma nyalo konyogi mako dwol e ofis ma gintiereno. Gige mako dwolgo nokonyo ahinya ka tuo mar COVID-19 nochakore nikech joloko mang’eny ne nyalo ting’ogi ma dhi kodgi e utegi kendo mano ne konyogi mako dwondgi kata sama gin e utegi kuno.

 Owete gi nyimine modak e alwora ma ofisego nitie chiworega konyo e nono weche ma oselok kendo rito ofisego mondo osik ka ber. Owadwa Cirstin ma tiyo e ofis milokoe dho Afrikaans mayudore Cape Town, e piny South Africa wacho kama: “Jolendo mang’eny kod jopainia mapile oseyudo thuolo mar tiyo gi lony ma gin-go e ofis kae.”

 Owete gi nyimine mochiworego morga ahinya gi thuolo makendeno. Nyaminwa moro ma konyo e ofis milokoe dhok wacho ni tiyo e ofise milokoe dhok chal mana gi “yueyo muya moro mayom ma a e got.” Nitie owete gi nyimine modak e alwora milokoe dhok mosemak dwondgi mondo otigo e vidio mopogore opogore. Juana ma tiyo e ofis milokoe dho Totonac man Veracruz e piny Mexico wacho kama: “Nikech tinde wadak machiegni gi taonde miwachoe dhok ma waloko, yot ahinya yudo owete gi nyimine ma wanyalo mako dwondgi mondo watigo e vidio mopogore opogore.”

 Be keto ofise milokoe dhok e alwora miwachoe dhokgo osekonyo e tij loko dhok? Ji tara gi tara ma somoga bugewa wacho en kamano. Owadwa Cédric ma tiyo e ofis milokoe dho Kongo e piny Democratic Republic of Congo wacho kama: “Nitie owete gi nyimine moko ma nochako luongo dho Kongo ma ne watiyogo e bugewa ni ‘Dho Kongo mar jo Watch Tower’ nikech ne ok walokga dhokno e yo ma ji ne wachego pile. Kata kamano, tinde giwacho ni bugewa iloko e dho Kongo miwacho sani, tiende watiyo gi weche ma ji tiyogo pile.”

 Andile ma tiyo e ofis milokoe dho Xhosa e piny South Africa bende wacho mana kamano. Owacho kama: “Ji mang’eny osenyisowa ni gisefwenyo ni nitie pogruok e yo ma tinde walokogo bugewa. Kata nyithindo ma ne josomoga Ohinga mar Jarito e dho Kisungu tinde somogi e dho Xhosa. To moloyo, gihero kaka tinde weche winjore e yo mayot kendo maler e Muma mar New World Translation ma notimne lokruoge moko.”

 Pesa duto mitiyogo e chako ofise milokoe dhok, ritogi, kendo siro owete gi nyimine ma tiyo e ofisego, wuok kuom chiwo migolo mag tij piny mangima moriwo nyaka chiwo migolo e websaitwa mar donate.dan124.com.