E piny mangima, ji mang’eny odak e ngima mar Vegan. Joma kamago ok cham ring le, kendo ok giti gi gimoro amora mowuok kuom le.

•   “Veganism en kit ngima ma joma odakie ok dwarga hinyo le nikech wach moro amora, bed ni en wach chiemo, lewni, kata nikech gimoro machielo.”​—The Vegan Society.

 Mopogore gi dewo le, jomoko oseyiero dak e ngima ma kamano nikech ok gidwar ketho alwora, ngimagi, kata nikech weche mag din.

•   “Ngima mar veganism opogore gi ngima ma ng’ato nyalo yieroe ni ok obi chamo chiemo moro, nimar joma odak e ngima mar veganism timo kamano nikech weche din, gidwaro kelo lokruok e piny, kata gineno ni mano en tim maler.”​—Britannica Academic.

 Be ngima mar veganism nyalo loko piny obed maber? Ang’o ma Muma wacho?

 Jachuechwa ma en Jehova Nyasaye, a neno ni dhano nigi duong’ moloyo le kendo osemiyo dhano teko e wi le. (Chakruok 1:27, 28) Kinde moko bang’e ka ne Nyasaye osechueyo dhano, noyienegi chamo le. (Chakruok 9:3) Kata kamano, ok noyienegi.​—Ngeche 12:10.

 Ka luwore gi Muma, ng’ato ka ng’ato nigi thuolo mar yiero ka obiro chamo ring’o kata ooyo. b Yiero ma watimo e wi wachno ok nyal miyo wabed joma beyo moloyo jomamoko e wang’ Nyasaye. (1 Jo-Korintho 8:8) Ng’ato ok onego ojar yiero ma nyawadgi nyalo timo e wi kit chiemo mobiro chamo.​—Jo-Rumi 14:3.

 Muma fwenyonwa ni kit ngima ma wanyalo yiero dakie ok bi tieko chandruoge mag pinyni. Chandruoge mang’eny mag pinyni ikeloga gi ywaruok e kind ogendni, weche mag siasa, kaachiel gi pek mag yuto, ma gin gik ma dhano ok nyal tieko. Muma wacho kama:

•   “Gima obam ok nyal rie.”​—Eklesiastes 1:15.

 Jachuechwa e ma biro tieko chandruoge duto mag dhano. Muma tiyo gi ranyisi moko ma konyowa ng’eyo gima obiro timo.

•   “Eka ne aneno polo manyien gi piny manyien; nimar polo machon gi piny machon kargi ne oselal nono, bende nam koro ne onge.”​—Fweny 21:1.

 Nyasaye biro golo sirkende mag dhano, tiende ni “polo machon,” kae to okelo “polo manyien,” ma en Pinyruodhe mar polo. Pinyruodheno biro golo “piny machon,” moriwo dhano duto maricho, kae to obiro kelo “piny manyien,” ma gin joma biro yie bolore e bwo lochne.

 E bwo Pinyruodh Nyasaye kende e ma dhano biro dakie gi kuwe kod le, kendo rito alwora e yo makare chuth.​—Isaya 11:6-9.