E kinde Muma, Nyasaye noyie ni ji otue chiemo mana ka ne otime gi paro mowinjore. Kata kamano, ne ok omor ka otime e yo ma ok owinjore. E kindegi, Muma ok wuo achiel kachiel e wi tueyo chiemo, to bende ok okwer timo kamano.

• Sama gikwayo mondo Nyasaye okonygi kendo otagi. Joma ne dhi Jerusalem ne tueyo chiemo mondo ginyis ayanga ni ne gin gadier kuom gik ma ne gikwayo Nyasaye e lamo. (Ezra 8:21-23) Paulo kod Barnaba bende kinde moko ne jatueyo chiemo ka ne gidwaro yiero jodong-kanyakla.​—Tich Joote 14:23.

• Sama giparo matut timo dwach Nyasaye. Bang’ batiso, Yesu notueyo chiemo kuom odiechienge 40 koikore ne migawo ma nodhi timo mar lando wach maber.​—Luka 4:1, 2.

• Sama giloko chunygi mi giweyo richo. Nyasaye notiyo gi janabi Joel mondo onyis Jo-Israel niya: “Lokreuru uduog ira gi chunyu duto, ka utueyo chiemo, kuywak kendo kugoyo nduru.”​—Joel 2:12-15.

• Sama ne gitimo nyasi e Odiechieng Loso Winjruok. Chike ma ne Nyasaye omiyo oganda Jo-Israel noriwo tueyo chiemo e Odiechieng Loso Winjruok. * (Tim Jo-Lawi 16:29-31) Tueyo chiemo ne en gima owinjore ahinya e kindeno, nikech mano ne parone Jo-Israel ni gin joricho kendo ne dwarore ni Nyasaye owenegi richogi.

• Mondo gimor jomoko. Yesu ne opuonjo ni jomoko ok onego ong’e ni ng’ato tueyo chiemo, to Nyasaye kende e ma onego ong’e.​—Mathayo 6:16-18.

• Mondo ng’ato onyisgo ni en ng’at makare. Tueyo chiemo ok mi ng’ato obed makare e wang’ Nyasaye moloyo jomoko.​—Luka 18:9-14.

• Mondo ng’ato oum-go richo motimo goyiem. (Isaya 58:3, 4) Nyasaye noyie gi joma tueyo chiemo mana ka ne gitime kaka nodwaro kendo ka ne giloko chunygi gadier kuom richo ma ne gitimo.

• Gitimo kamano nikech en chik mar din margi. (Isaya 58:5-7) Nyasaye en kaka janyuol ma bedo mamor sama nyithinde ohere gi chunygi duto, to omor ka gihere mana nikech en chik moketnegi.

Ooyo. Nyasaye ne dwaro ni Jo-Israel otue chiemo e Odiechieng Loso Winjruok, kata kamano, chikno norumo ka ne Yesu ochiwo misango ma miyo joma oloko chunygi gadier iweyonegi richogi chuth. (Jo-Hibrania 9:24-26; 1 Petro 3:18) Jokristo ok nie bwo Chik Musa. Chik Musa e ma ne wuoyo achiel kachiel e wi Odiechieng Loso Winjruok. (Jo-Rumi 10:4; Jo-Kolosai 2:13, 14) Omiyo, Jakristo nyalo timo yierone owuon e wach tueyo chiemo.​—Jo-Rumi 14:1-4.

Jokristo madier ong’eyo ni lamo margi ok otenore kuom tueyo chiemo. Muma ok nyiswa ni nitie tudruok moro amora e wi tueyo chiemo kod mor. Kata kamano, joma lamo Nyasaye gadier mor nikech Jehova Nyasachgi en “Nyasaye mamor.”​—1 Timotheo 1:11; Eklesiastes 3:12, 13; Jo-Galatia 5:22.

Paro ma ok kare: Jokristo onego utue chiemo sama gitimo nyasi miparogo tho mar Yesu.

Adiera: Yesu ne ok ochiko jopuonjrene mondo gitue chiemo sama giparo thone. (Luka 22:14-18) Kata obedo ni Yesu nowacho ni jolupne ne dhi tueyo chiemo ka otho, mano ok nyis ni ne ogolo chik mar tueyo chiemo. Notemo mana wacho gima ne dhi timore. (Mathayo 9:15) Muma ne oparo ne Jokristo ma ne kech kayo ni ne onego gichiem mondi kapok gidhi e nyasi miparogo tho Kristo.​—1 Jo-Korintho 11:33, 34.