Ere Kaka Inyalo Bedo Osiep Nyasaye?

TUGE

Dwoko ma Muma chiwo

Inyalo bedo osiep Nyasaye ka ikawo thuolo mar ng’eye kendo timo gik ma more. Kitimo kamano, to Nyasaye biro ‘sudo machiegni kodi.’ (Jakobo 4:8) Muma nyisowa ni ok en “mabor gi ng’ato ka ng’ato kuomwa.”—Tich Joote 17:27.

Gik ma wanyalo timo mondo wang’e Nyasaye

Som Muma

Gima Muma wacho: “Ndiko duto okudh gi much Nyasaye.”—2 Timotheo 3:16.
Tiend Ndikono: Nyasaye e Wuon Muma. Noketo wechego e pach joma nondiko Muma. Jehova osenyisowa dwache kokalo kuom buk makendeni. Osenyisowa kido mage kaka herane, timne makare, kod ng’wonone.—Wuok 34:6; Rapar mar Chik 32:4.
Gima inyalo timo: Som Muma pile ka pile. (Joshua 1:8) Par matut gik misomo ka ipenjori penjo kaka: ‘Gima asomoni puonja wach mane e wi Nyasaye?’—Zaburi 77:12.

Kuom ranyisi, inyalo somo ndiko mar Jeremia 29:11, kae to ipenjori niya: ‘Nyasaye dwaro ni ngimana obed ma chalo nade? Odwaro ni abed gi kuwe koso masira? Be en Nyasaye ma chulo kuor koso odwaro ni abed gi ngima maber e kinde ma biro?’

Non chuech

Gima Muma wacho: ‘Kido ma Nyasaye nigo ma dhano ok nyal neno, tiende ni, tekone mochwere kod duong’ ma en-go kaka Nyasaye, osebedo ka nyisore maler chakre chuech piny ka dhi nyime, nimar ginenore e gik ma nochueyo.’—Jo-Rumi 1:20.
Tiend Ndikono: Gik ma Nyasaye ochueyo nyisowa kido mage mana kaka gima ogor nyalo konyowa fwenyo gik mang’eny e wi ng’at mogore, kata kaka masin moro molos maber nyalo konyowa ng’eyo gimoro e wi ng’at ma ne olose. Kuom ranyisi, yo miwuoro ma ochuego obwongo dhano nyiso rieko Nyasaye, to yo ma ochueyogo chieng’ kod sulwe nyiso tekone.—Zaburi 104:24; Isaya 40:26.
Gima inyalo timo: Kaw thuolo mar rango chuech. Sama itimo kamano, penjri niya, ‘Gik miwuoro ma waneno e chuech nyisowa ang’o e wi Nyasaye?’ * En adier ni nitie gik mang’eny ma gik mochue ok nyal nyisowa e wi Jachuech. Mano e momiyo Nyasaye omiyowa Muma.

Ti gi nying Nyasaye

Gima Muma wacho: “Abiro rite nikech ong’eyo nyinga. Obiro luonga kendo anadwoke.”—Zaburi 91:14, 15.
Tiend Ndikono: Nyasaye ma nyinge Jehova ogeno ahinya joma ong’eyo nyinge kendo ma miyo nyingeno luor. * (Zaburi 83:18; Malaki 3:16) Nyasaye dwaro ni wang’eye, to mano e momiyo onyisowa nyinge. Isaya 42:8 wacho kama: “An Jehova. Mano e nyinga.
Gima inyalo timo: Ti gi nying Jehova.

Wuo gi Jehova e lamo

Gima Muma wacho: “Jehova chiegni gi ji duto ma luonge.”—Zaburi 145:18.
Tiend Ndikono: Jehova sudo machiegni gi joma wuoyo kode e lamo kendo ma nigi yie kuome. Lamo en achiel kuom gik ma nyiso ni wamiyo Nyasaye luor matut.
Gima inyalo timo: Lem kinde duto. (1 Jo-Thesalonika 5:17) Nyise gik ma chandi kod kaka iwinjo.—Zaburi 62:8. *

Ger yie mari kuom Nyasaye

Gima Muma wacho: “Ka ng’ato onge gi yie, ok onyal moro Nyasaye e yo malong’o.”—Jo-Hibrania 11:6.
Tiend Ndikono: Mondo wasud machiegni gi Nyasaye, nyaka wayie kuome. E Muma, bedo gi yie ok en aena yie ni Nyasaye nitie kae to iweyo gi kanyo. Oriwo gene gi chunywa duto kendo bedo gadier chuth ni gik moko duto mosingo biro timore kendo ni yorene ni kare. Geno Jehova en gima duong’ ahinya ma biro konyowa tego osiep manie kindwa kode.
Gima inyalo timo: Ng’ato bedo gi yie mana ka en gi ng’eyo malong’o chuth. (Jo-Rumi 10:17) Omiyo, puonjri Muma kendo bed gadier gi puonj ma Nyasaye miyi. Joneno mag Jehova biro bedo mamor puonji Muma. *

Tim gima moro Nyasaye

Gima Muma wacho: “Tiend hero Nyasaye e ma, ni waluw chikene.”—1 Johana 5:3.
Tiend Ndikono: Jehova bedo machiegni gi joma nyiso ni gihere kendo ma timo duto ma ginyalo mondo giluw chikene.
Gima inyalo timo: Sama ipuonjri Muma, ng’e gik ma Nyasaye ohero kod gik ma ok ohero. Penjri kama, ‘Gin lokruoge mage ma anyalo timo mondo amor Jachuech?’—1 Jo-Thesalonika 4:1.

Ne ber mar luwo puonj ma Nyasaye miyi

Gima Muma wacho: “Bil mondo ine kaka Jehova ber.”—Zaburi 34:8.
Tiend Ndikono: Nyasaye dwaro ni ine gi wang’i kaka en Nyasaye maber. Sama ineno kaka oheri kod kaka okonyi, mano biro miyo igomb sudo machiegni kode.
Gima inyalo timo: Sama isomo Muma, ti gi puonjgo nikech mano biro miyo iyud ber. (Isaya 48:17, 18) Bende, inyalo nono ranyisi mag joma Nyasaye nokonyo loyo chandruoge ma ne gin-go, ma giloko ngimagi kaachiel gi mar joodgi kendo giyudo mor madier. *

Miriambo ma ji wacho e wi ng’eyo Nyasaye

Miriambo: Nyasaye nigi teko mang’eny kendo olich miwuoro ma ok onyal gombo mondo wasud machiegni kode.

Adiera: Kata obedo ni Nyasaye nigi teko mang’eny kendo olich miwuoro, pod odwaro ni wasud machiegni kode. Muma oting’o ranyisi mag mon kod chwo ma ne obedo osiepe Nyasaye.—Tich Joote 13:22; Jakobo 2:23.

Miriambo: Ok wanyal ng’eyo Nyasaye nikech ng’eyo kore tek.

Adiera: Nitie gik moko e wi Nyasaye ma ok yotnwa winjo tiendgi; kaka bedo ni en Roho ma ok wanyal neno. Kata kamano, pod wanyalo ng’eye. Muma wacho ni ka wadwaro yudo ngima ma nyaka chieng’, to nyaka wang’e Nyasaye. (Johana 17:3) Muma tiyo gi weche ma wanyalo winjo sama oleronwa gik moko e wi Jachuechwa, kido ma en-go, kaka nodwaro ni piny kod dhano obedi, kaachiel gi chike ma odwaro ni waluw. (Isaya 45:18, 19; 1 Timotheo 2:4) Kendo mana kaka waseneno, Muma bende nyisowa nying Nyasaye. (Zaburi 83:18) Mano miyo wanyalo ng’eyo Nyasaye kendo sudo machiegni kode.—Jakobo 4:8.

^ par. 10 Mondo ine kaka chuech nyiso rieko mar Nyasaye, som sula ma wiye wacho ni, “Be Nosieko Kende Koso Nochueye?”

^ par. 13 Ji mang’eny ong’eyo ni tiend nying Jehova en ni “Omiyo Gima Odwaro Timore.” Sama Nyasaye nyisowa nyingeno, chal ka gima owacho ni, ‘abiro miyo dwarona otimre adier. Abiro chopo singona kinde duto.’

^ par. 18 Som sula ma wiye wacho ni “Ang’o Momiyo Onego Alem? Be Nyasaye Biro Dwoko Lamona?”

^ par. 22 Kidwaro yudo weche momedore, ne vidio ma wiye wacho ni, Ere Kaka Wapuonjoga Ji Muma?

^ par. 30 Som sula ma wiye wacho ni, “Muma Loko Kit Ngima Ji.”