Kowuoyo e wi gik mane otimore e ngima Yesu, jaote Johana nondiko niya: “Jal ma oseneno mae osechiwo neno, kendo nende en madier, bende jalno ong’eyo ni gik mowacho gin adier mondo eka un bende uyie.”—Johana 19:35.

Achiel kuom gik momiyo onego wagen Ndiko mag Injili ma nondik gi Mathayo, Mariko, Luka kod Johana en ni nondikgi ka ji mang’eny ma noneno ka gigo timore ne pod ngima. Kaluwore gi nonro moro, wachore ni Injili mar Mathayo ne ondik chiegni higni aboro bang’ tho Kristo, to mano nyiso ni nondike e higa mar 41 E Ndalowa. Josomo moko to wacho tarik mopogore matin, kata kamano, en gima ong’ere ni Ndiko mag Dho-Grik nondik e kinde Jokristo mokwongo.

Joma noneno Yesu kane pod en e pinyka, joma noneno kinege kod joma noneno kochier, ne nyalo chiwo neno e wi ndiko mag Injili. Bende, ne ginyalo kwedo wach moro ma ok kare ma dine ondik e buge mag Injiligo. Profesa moro miluongo ni F. F. Bruce nowacho niya: “Achiel kuom gik mane miyo tij lendo bedo maber e kinde joote, en ni ne nitie gik ma jowinjo bende nong’eyo maler. Omiyo jootego ne nyalo nyiso jowinjo niya: ‘Wan joneno e wi wechegi’ “mana kaka un uwegi ung’eyo” (Tich Joote 2:22).”