Richo en gimoro amora ma waparo kata ma watimo mopogore gi dwach Jehova. Oriwo timo gik maricho ma ketho chike Nyasaye, kata gik ma ok kare e wang’ Nyasaye. (1 Johana 3:4; 5:17) Muma bende wacho ni ka ng’ato ong’eyo gima kare monego otim to ok otime, mano en richo.​—Jakobo 4:17.

E dhok ma nokwong ndikgo Muma, richo tiende en “weyo dimbo gimoro e wang’e,” kata bayo yo. Kuom ranyisi, nitie jolweny mag Israel machon ma nolony ahinya e bayo kidi gi orujre kendo ne ‘gidimbo’ ka ma ne gibayono. Wechego kolok aching’ to tiendgi en, weyo ma ok itimo richo. (Jong’ad Bura 20:16) Omiyo, timo richo tiende en bayo yo ka waweyo luwo chike makare mag Nyasaye.

Nikech Nyasaye e Jachuech, en gi ratiro mar keto ne dhano yore makare monego giluw. (Fweny 4:11) Wabiro chiwo dwoko ne Nyasaye e wi gimoro amora ma watimo.​—Jo-Rumi 14:12.

Be nyalore mondo kik watim richo chuth chuth?

Ooyo. Muma wacho ni “ji duto osetimo richo kendo girem kuom duong’ mar Nyasaye.” (Jo-Rumi 3:23; 1 Ruodhi 8:46; Eklesiastes 7:20; 1 Johana 1:8) Nikech ang’o?

Adam gi Hawa ma ne gin dhano mokwongo, ne onge gi richo ka ne ochuegi. Mano en nikech ne ochuegi e kido mar Nyasaye ka gin joma kare. (Chakruok 1:27) Kata kamano, ne gibedo joricho ka ne gitamore winjo Nyasaye. (Chakruok 3:5, 6, 17-19) Ka ne ginyuolo nyithindo, nyithindgigo bende nobedo joricho. (Jo-Rumi 5:12) Ruodh Israel miluongo ni Daudi nowacho niya: “Ne onyuola e richo.”​—Zaburi 51:5.

Be nitie richo moko madongo moloyo mamoko?

Ee. Kuom ranyisi, Muma nyisowa ni Jo-Sodom ne gin “jo maricho ahinya” ma ne timo “richo madongo.” (Chakruok 13:13; 18:20) Wanon ane gik moko adek ma nyalo miyo richo obed mapek kata maduong’.

1. Pek mar richo. Muma siemowa ni wawere gi richo madongo kaka terruok, lamo sanamu, kuo, mer, mecho, neko, kod timbe juok. (1 Jo-Korintho 6:9-11; Fweny 21:8) Muma konyowa ng’eyo pogruok mantie e kind richo madongogo kod richo moko ma nyalo pore ne ng’ato kaka wacho weche kata timo gik ma nyalo chwanyo jomoko. (Ngeche 12:18; Jo-Efeso 4:31, 32) Kata kamano, Muma jiwowa ni kik wane richo moko kaka richo matindo, nikech ginyalo miyo waketh chike Nyasaye ka girwakowa e richo madongo moloyo.​—Mathayo 5:27, 28.

2. Paro ma ng’ato nigo ma miyo otimo richo. Nitie richo moko ma ng’ato nyalo timo nikech ok ong’eyo chike Nyasaye. (Tich Joote 17:30; 1 Timotheo 1:13) Kata obedo ni mago bende gin richo, Muma pogogi gi richo mamoko ma ng’ato timo goyiem, kokethogo chike Nyasaye. (Kwan 15:30, 31) ‘Chuny mopong’ gi richo’ e ma miyo ng’ato timo richo goyiem.​—Jeremia 16:12.

3. Nwoyo richo. Muma bende konyowa ng’eyo pogruok mantie e kind richo motim dichiel kod richo motim nyadinwoya. (1 Johana 3:4-8) Joma ‘ong’iyo gi timo richo goyiem,’ kata mana bang’ ka gisepuonjore timo gik makare, yudo kum mowuok kuom Nyasaye.​—Jo-Hibrania 10:26, 27.

Joma otimo richo madongo nyalo bedo gi chuny machandore ahinya nikech richo ma gisetimogo. Kuom ranyisi, Ruoth Daudi nondiko niya: “Kethona opong’o wiya, gitura ka osigo mapek.” (Zaburi 38:4) Kata kamano, Muma miyowa geno. Owacho niya: “Ng’at marach mondo owe yorene kendo jaricho owe parone; oduog ir Jehova mi nokeche, ee, oduog ir Nyasachwa, mi nong’wonne e yo malach.”​—Isaya 55:7.