Muma wacho ni “Jehova ok bi tuono jo ma yorgi ochikore tir gimoro amora maber.” (Zaburi 84:11) “Jo ma yorgi ochikore tir” gin joma chalo nade? Gin joma odak ka luwore gi singruok ma ne gitimo sama ne gichiwore ne Jehova. (Eklesiastes 5:4, 5) Ere kaka inyalo makori gi timni matir bang’ batiso?

E sulani

•  Dhi nyime nano e chandruoge

•  Dhi nyime kwedo tembe

•  Dhi nyime timo kinda e luwo chike Jehova

 Ndiko maduong’: “Nyaka wadonj e Pinyruodh Nyasaye ka wakalo e sand mang’eny.”​—Tich Joote 14:22.

 Tiend wachno: Jokristo duto biro romo gi chandruoge moko e ngimagi. Nitie chandruoge moko ma iyudo mana nikech bedo Jakristo, kuom ranyisi, ajara kod akwede. Thoth chandruoge to yudo ji duto, kuom ranyisi, pek mag yuto kod tuoche.

 Pek ma nyalo betie: Kinde ka kinde, ngimani biro lokore, kendo lokruoge moko ok bi mori. Muma wacho ni gik maricho nyalo timore ne ji duto, bed ni gin Jokristo kata ooyo.​—Eklesiastes 9:11.

 Gima inyalo timo: Nikech iseng’eyo ni ibiro romo gi chandruoge, inyalo chako ikorinegi. Ne chandruogego kaka thuolo mar tego yieni kendo medo geno Jehova. (Jakobo 1:2, 3) Mosmos, in be ibiro wacho gima jaote Paulo nowacho niya: “E weche duto, an gi nyalo kokalo kuom jal ma miya teko.”​—Jo-Filipi 4:13.

 Gima nyalo konyi: Puonjri kuom Josef. Inyalo somo sigande e bug Chakruok sula mar 37 kod 39 nyaka 41. Non weche kaka: Gin chandruoge mage ma apoya ma Josef noromogo, to ere kaka nonyagore kodgi? Ere kaka Jehova nokonye?

 Be diher gik mamoko ma nyalo konyi?

•   Som:

   “Naweza Kukabilianaje na Msiba?”

   “Be Anyalo Nyagora gi Chandruok?”

   “Jinsi ya Kukabiliana na Mabadiliko”

•   Download:

   “Mzazi Anapokuwa Mgonjwa”

 Ndiko maduong’: “Ng’ato ka ng’ato itemo ka iywaye kendo ka iyondhe gi gombone owuon.”​—Jakobo 1:14.

 Tiend wachno: Kinde ka kinde, wabedoga gi gombo moko ma ka ok wageng’o, to wanyalo donjo e richo.

 Pek ma nyalo betie: Bang’ batiso, pod ibiroga bedo gi “gombo mag ringruok.” (2 Petro 2:18) Inyalo kata gombo timbe mag nindruok ka pok idonjo e kend.

 Gima inyalo timo: Ng’ad e chunyi sani ka pok iromo gi tem moro, ni ok ibi yie mondo gombogi e mochik yiero mitimo. Par ni Yesu nowacho niya: “Onge ng’at ma nyalo bedo misumba ruodhi ariyo.” (Mathayo 6:24) In e minyalo yiero ruodhi. Yier Jehova. Kata kiromo gi gombo motegno manade, pod inyalo yiero ni ok ibi luwo gombono.​—Jo-Galatia 5:16.

 Gima nyalo konyi: Puonjri fwenyo tekoni kod nyawoni. Mak osiep gi joma jiwi mondo itim gik mabeyo. Bed mabor gi joma nyalo miyo itim gik maricho, kendo tem kik iyudri kuonde ma nyalo keti e obadho, kata e chal moko ma nyalo rwaki e tem.​—Zaburi 26:4, 5.

 Be diher gik mamoko ma nyalo konyi?

•   Som:

   “Ninaweza Kupinga Vishawishi Jinsi Gani?”

   “Nifanye Nini Ili Niache Kufikiria Kuhusu Ngono Muda Wote?”

   “Jinsi ya Kuepuka Kushinikizwa na Marafiki”

   “Be Itemo Matek Mondo Pachi Ochal gi Pach Jehova?”

 Ndiko maduong’: “Ng’ato ka ng’ato kuomu oti matek . . . nyaka giko, mondo kik ubed josamuoyo.”​—Jo-Hibrania 6:11, 12.

 Tiend wachno: Ng’at ma ok ket pache duto e gima otimo nyalo ol mi obed ja samuoyo.

 Pek ma nyalo betie: Nyaka bed ni bang’ batiso, nimor matek kendo kindani ne liel ka mach. Nihero Jehova gi chunyi duto. Kata kamano, bang’ kinde, inyalo yudo ka ok yotni luwo chike Jehova duto, to mano nyalo goyo chunyi mi kindani dog chien.​—Jo-Galatia 5:7.

 Gima inyalo timo: Dhi nyime timo gik makare, kata ka seche moko chunyi ok dwar timo kamano. (1 Jo-Korintho 9:27) Bende, dhi nyime sudo machiegni gi Wuonu manie polo kuom puonjori e wiye kendo wuoyo kode ding’eny e lamo. E wi mago, dhi nyime loso osiep gi joma ohero tiyo ne Jehova.

 Gima nyalo konyi: Par kinde duto ni Jehova oheri ahinya, kendo oikore konyi. Ka po ni kindani odok chien kuom kinde, kik ipar ni Jehova koro iye owang’ kodi. Muma wacho kama e wi Jehova: “Omiyo ng’at ma ool teko, kendo omiyo jo ma onge teko, teko momedore.” (Isaya 40:29) Mosmos, obiro guedho gik moko duto mitimo mondo kindani odog e wang’e.

 Be diher gik mamoko ma nyalo konyi?

•   Som:

   “Un Rowere—‘Sikuru ka Utiyo Matek ne Warruok Maru Uwegi’”

   “Ninaweza Kufanya Nini ili Nifurahie Kumwabudu Mungu?”

•   Ne:

   Gik ma Mbeseni Wacho—Ngima Maberie Moloyo

 Wach maduong’ en ma: Kimakori gi timni matir, ibiro moro chuny Jehova! (Ngeche 27:11) Obiro mor ahinya ni iyiero makori kode, kendo obiro konyi e yore duto mondo idhi nyime kwedo monj mag Satan.