Kamnie miluongo ni limpet dakga e bwo nam, kendo ode olwororega mana ka obwolo. Kamnieni nigi leke motegno ahinya. Lekenego nigi gimoro matek e igi miluongo ni goethite kendo e bwo lekenego nitie protein.

Par ane: Dho kamnieni nigi gimoro ma chalo lep moumo lekene man nyime. Lekenego tindo ahinya, kendo gichalo tupa. Dwarore ni lak ka lak obed motegno ahinya nikech chiemb kamniano en buya moro miluongo ni algae ma mokoga e lwendni. Omiyo, nyaka ogwen-gi matek mondo e ka ocham-gi.

Jotim nonro notiyo gi microscope ma tekone ng’eny mondo gimpigo teko ma leke kamnieno nigo. Ne gifwenyo ni leke kamnieno otegno ahinya moloyo kata tonde mag mbui. Jatend jotim nonrogo nowacho kama: “Onego wan be walosie gimoro ma nyalo tiyo kaka leke kamnieni.”

Jotim nonro wacho ni ginyalo kopo yo molosgo leke kamnieno mondo gilosgo mtokni, yiedhi, kod ndeke. Bende, giwacho inyalo ti gi yorno e loso lak ma inyalo chomne ng’ato ka mage omukore.

Ineno nade? Be leke limpet motegno kamano nosieko kendgi, koso nitie ng’ama nochueyogi?