E Jesús o mama ke ma ri neji ra ngeji cristiano, ni jyodʼꞹ ra jiji (xørꞹ Mateo 28:​19, 20). ¿Ja rgi jige? ¿Ñe pje ni jyodʼꞹ ra tsjaa na ntee ngekʼua ra jii?

1. ¿Ja rgi jige?

Ne jñaa jii ba e̱je̱ kja na jñaa griega ke nee ra mama ri “tsibʼi na joo kja nrreje”. Ma go jii e Jesús go ngibʼi kja kʼe ndare a Jordán, nukʼua “o mbesʼe kja kʼe ndeje” (Marcos 1:​9, 10). Yo na kjuana ngeji cristiano, ma jiji xo kibʼiji na joo kja nrreje.

2. Ma jii na ntee ¿pje ñetse ke nee ra tsjaa?

Ma kjo jii, ñetse ke a xipji e Jehová ke nee ra pɇpi. ¿Pje ni jyodʼꞹ ra kjaji ngekʼua ra xiji e Jehová ke ri nee ra pɇpiji? Ra kjaji na oración nu ja ra xiji ke ri nee ra pɇpiji texe yo paa. Ni jyodʼꞹ ra kjajiyo ma dya bʼe ri jiji. Kja kʼe oración, kʼe ntee kʼꞹ nee ra pɇpi e Jehová xipji ke ngextrjo angeze ra matrʼꞹ ñe ke pama pama ra dyⱥtⱥ. Xo ñe nee ra xⱥkⱥ ñe ra tsjaa kʼo go mama e Jesús, kʼꞹ go mama: “Ma kjo kʼo nee ra ndengegø ra tsjaa kʼua ja nzi rga kjagø, ni jyodʼꞹ dya kja ra tsjaa kʼo netsjɇ angeze [...] I ra tsjakjuana ra ndengegø” (Mateo 16:​24). Ma na ntee o xipji e Jehová ke nee ra pɇpi ñe go jii, nudya søø ra jobi ko e Jehová ñe ko yo xo matrʼꞹ angeze.

3. ¿Pje ni jyodʼꞹ ri tsjaa ngekʼua ri jii?

Ma nutsʼkʼe gi nee ri jii, otrʼꞹ ri pa̱ra̱ kjo nge e Jehová ñe ri jñuntrʼꞹ in mꞹbʼꞹ angeze (xørꞹ Hebreos 11:6). Ma mazi ri pjechi ñe ri jñuntrʼꞹ in mꞹbʼꞹ e Jehová mazi ri sʼiya angeze. Nukʼo ra tsjaa ke ri nee ri jichi yo ntee o Jñaa angeze ñe ri mimi jango ga nee (2 Timoteo 4:2; 1 Juan 5:3). Ma “ri nzhodʼꞹge na joo kʼua ja nzi ga nee”, nuʼma a ri søø ri xipji ke gi nee ri pɇpi ñe ri jii (Colosenses 1:​9, 10). a

 TEXE YO JÑAA KE ME NI MUBI RA PA̱RA̱JI

4. Kʼo jitsiji kʼꞹ e Jesús o jii

Ma xi gi nee ri pa̱ra̱ ma go jii e Jesús, xørꞹbi Mateo 3:​13-​17. Kjanu ri chjꞹrꞹbi yo trʼønꞹ yo ba e̱je̱:

• Ma o jii e Jesús, ¿mi ngeje na tsʼilele?

• ¿Ngextrjo o xispiji tsʼikʼe ndeje a ñiʼi? Nuʼma, ¿ja ba jii?

Ma o jii e Jesús o tsjaa kʼe bʼɇpji ke bi chɇchpi Mizhokjimi. Xørꞹbi Lucas 3:​21-​23 ñe Juan 6:​38, ñe ri chjꞹrꞹbi ne trʼønꞹ nu ba e̱je̱:

• Ma o jii e Jesús ¿pje ma bʼɇpji dya go jyɇzi bo tsjaa?

5. Ma gi nee, søø ri jii

Bʼꞹma gi su̱u̱ ri xipji Mizhokjimi kʼꞹ gi nee ri pɇpi ñe ri jii. Pe ma mazi ri pa̱ra̱ angeze ri pjechi kʼo nee, nukʼo ra mbøxkʼꞹ ri nee ri dyⱥtⱥ. Ñuu ja ba tsjaji janzi ntee, jñanrrabi ne VIDEO.

Xørꞹbi Juan 17:3 ñe Santiago 1:5, ñe ri chjꞹrꞹbi ne trʼønꞹ nu ba e̱je̱:

• ¿Pje ra mbøsʼꞹ na ntee ngekʼua ra søø ra jii?

1. Ri kjaji na oración nu ja ri xipjiji e Jehová ke ri nee ra pɇpiji texe yo paa.

2. Ma ri jiji, na punkjꞹ ntee unꞹji nguenda ke a ro xipjiji e Diosi ke ri nee ra pɇpiji.

 6. Ma ri jiji ri ngeji o pjamilia e Jehová

Ma ri jiji, ri ngeji na pjamilia ke na joo ga nga̱ra̱ji kja texe nu xoñijomꞹ. Zø nʼaño ja ri menzumꞹji ñe pje go kjogꞹzꞹji mi jingua, texe ri kreoji ñe ri kjaji yo mama ne Biblia. Xørꞹbi Salmo 25:​14 ñe 1 Pedro 2:​17, ñe ri chjꞹrꞹbi ne trʼønꞹ nu ba e̱je̱:

• Jango ga mama yo a ro xørꞹji kja ne Biblia, ¿ja ga mbøxkꞹji kʼꞹ ri jiji?

 KʼO YA RO NUJI

E Jesús o mama ke ma ri nee ra ngeji cristiano ni jyodʼꞹ ra jiji. Ma ri nee ra kjaji akjanu, pɇskʼꞹ ra ejmeji e Jehová ko texe in mꞹbʼꞹji, ra ⱥtⱥji texe kʼo xitsiji ñe ra xiji ke ri nee ra pɇpiji.

Pje gi mbeñege

• ¿Ja rgi jige, ñe pjenga me na joo ri tsjaa?

• ¿Pjenga ni jyodʼꞹ ri xipji e Jehová ke gi nee ri pɇpi, kjanu ri jii?

• ¿Pje ni jyodʼꞹ ra tsjaa na ntee kʼꞹ nee ra pɇpi e Jehová ñe nee ra jii?