Mi jingua ma e Jehová o ñɇme nu primer bʼɇzo ñe nu primer ndinxu kja ne Xoñijomꞹ, o chɇchpibi dʼa bʼɇpji kʼꞹ me mi mubi: ke ro mbørꞹbi o trʼibi (Colosenses 3:20). Nutsʼkʼe tata ñetsʼkʼe nana ma ri jichige na joo in chʼigebi, ma ra nokʼꞹji ra søø ra tsjaji kʼo mama e Jehová, xo ñe ra jonteji, ra pjechiji ra tsjaji o bʼɇpji (2 Timoteo 1:5; 3:15). Para ke ri tsjagebikʼo, pɇski ri dyønbʼꞹbi in chʼige ja ga zoʼo, pje mbeñe, pje nee ra tsjaa, ga kjanu ri søø ri pa̱rgebi je nge kʼo bʼꞹbʼꞹ amboo kja o mꞹbʼꞹ. Dya ngextrjokʼo, ma ri minkʼebi ja ga nee e Mizhokjimi, yo in chʼigebi ra unꞹji nguenda i kjagebi kʼo na joo, ma ra kjogꞹ yo paa, angezeji xo ra nee ra tsjaji nzakjatsʼkʼebi (Salmo 40:8).

NE BIBLIA MAMA GA KJABA: “Texe yo bʼɇzo yo na joo, ndajmetjo ra dyⱥrⱥji, ra ndebʼe kja ra ndꞹrꞹ” (Santiago 1:19, NTD). Ma gi nee ke in chʼige me ra jyonkʼꞹ ri ñabi, jyɇzi kʼo i kjage, ri dyⱥrⱥ na joo yo ra xitsʼi, dya ri guɇnchʼi, jyɇzige ke ra ñaa, ma ra nguarꞹ ra ñaa ri zopjꞹ na joo (Santiago 3:18). Ma ri ñage ko in chʼige, dya ri xipji dya ga joo texe yo na kjaa ñe yo ga mbeñe, ma ri tsjage akjanu, dya kja ra xitsʼi yo na kjuana. Dya tsʼi rgi mbɇkuɇ, xipjige ke i sʼiya na punkjꞹ (Mateo 3:17; 1 Corintios 8:1, TNM).

TSJAGE KʼO MAMABA:

• Ma in chʼige nee ke ri ñage ko angeze, jyɇzi yo i kjage ñe dyⱥrⱥ na joo yo ra xitsʼi

• Ma gi søø, ri ñaa ko in chʼige pama pama, dya ri chebʼe ma kja ra mbɇsʼi dʼa nrrumꞹ

NE BIBLIA MAMA GA KJABA: “Kʼe ntee kʼꞹ trjꞹmbeñe na joo, ra mbedye na joo kʼo nee ra tsjaa” (Proverbios 16:20). Ma ri ñage ko yo in chʼige, ri dyⱥrⱥ na joo ngekʼua ri chunꞹ nguenda kʼo nee ra xitsʼiji, akjanu ri søø ri pa̱rge ja ga zoji. Bʼꞹbʼꞹ paa ma yo trʼii ñe yo xuntrʼi nee ra ñaji dabadiji ke dya mbeñeji kʼo manji. Ne Biblia mama: “Dya ga joo yo kjaa kʼe ntee kʼꞹ dabadiji nee ra ñaa ma dya bʼe ⱥrⱥ yo nee ra xipjiji, yo ntee yo kjaji ga kjanu dya trjꞹmbeñeji” (Proverbios 18:13). Otrʼꞹ ri dyⱥrⱥ na joo, dya tsʼi rgi mbɇkuɇ (Proverbios 19:11).

TSJAGE KʼO MAMABA:

• Ma ri ñaa ko in chʼige, jyɇzi ra ñaa, ri chebʼe ra nguarꞹ. Zo pje nde ra xitsʼi kʼo na sʼoo kʼꞹ go tsjaa, dya tsʼi rgi mbɇkuɇ

• Ma mi ɇnkʼe yo kjɇɇ yo ɇdyi in chʼige, ¿ja ma kjatsʼkʼe?, ¿ja mi soge? ñe ¿pje mi nege? Ma ri tsjatsjɇ yo trʼønꞹ, ri søø ri pjøsʼꞹ in chʼige

NE BIBLIA MAMA GA KJABA: “In chʼigo, ma ra guɇnchʼkʼi ni tatage, ri dyⱥtⱥge, xo ri dyⱥtⱥge na joo yo xitsʼige ni nanage” (Proverbios 1:8). E Jehová nee ke yo tata ñe yo nana ra mbørꞹji na joo o trʼiji, nee ke ra jichiji na joo ja rga minji. Nza yejebi, pɇski ra jichibi yo in chʼii ra dyⱥtⱥji ñe ra respetaoji (Efesios 6:1-3). Yo in chʼige søø ra unꞹji nguenda yo na kjogꞹ kja in nzunge, ngekʼua na joo ke “ri natjo pjeñe kʼꞹ ri tsjijñige[bi] ñe kʼꞹ ri tsjage[bi]” (1 Corintios 1:10). Ma dya ri nuu na joo kʼo mama ni xira o ni suu, dya ri chu̱gebi a jmii yo in chʼige, ma jiyo, dya ra respetaotsʼꞹgebi.

TSJAGE KʼO MAMABA:

• Ri ñaa ko ni xira o ni suu, ri mangebi ja rgi zopjꞹbi in chʼigebi

• Ma dya gi mbeñe kʼua ja ga mbeñe ni xira o ni suu ja rgi jichibi yo in chʼige, dya ri mbɇkuɇ, ri tendio ja ga kja kʼꞹ ga mbeñe angeze ñe pjenga ga mbeñe ga kjanu

NE BIBLIA MAMA GA KJABA: “Jichige na joo in chʼige ngekʼua ra nzhodʼꞹ kja nu ñʼiji kʼꞹ na joo” (Proverbios 22:6). Ma gi nee ke yo in chʼige me ra jonteji, ri jichige na joo pje nge kʼo gi nee ke ra tsjaji ñe pje nge kʼo dya gi nee ke ra tsjaji (Salmo 127:4; Proverbios 29:17). Ma ra bʼꞹbʼꞹ dʼa paa ke ra tsjaji kʼo na sʼoo, dya ngextjo ri yabꞹ, kʼo ri tsjage ri pjøsʼꞹ ra tendioji pjenga gi nee ke ra tsjaji kʼo na joo (Proverbios 28:7). Xo ri jichige ra sʼiyaji e Jehová, pjøsʼꞹge ra tendioji pje nee ra mama yo jñaa yo junsʼꞹ kja nu Biblia (Salmo 1:2). Ga kjanu ra mba̱ra̱ji pje nge kʼo na joo kʼꞹ ra tsjaji ñe pje nge kʼo na sʼoo kʼꞹ dya ra tsjaji (Hebreos 5:14).

TSJAGE KʼO MAMABA:

• Jichige yo in chʼige pje mama ne Biblia ngekʼua ra mba̱ra̱ji na joo ja ga kjaa e Mizhokjimi, ri xipjiji ke ma pje kʼo ra kjogꞹji kʼo na sʼoo, e Mizhokjimi søø ra mbøsʼꞹji

• Jichi yo in chʼige ja rga mbørꞹtsjɇji ngekʼua dya ra jñanrraji kʼo na sʼoo, nzakja ma pje jodʼꞹji kja Internet ñe kja yo redes sociales. Xipji ra pjønguenrra yo ntee kʼo nee ra dyobʼꞹji ko yo tsʼitrʼi ñe yo tsʼixutrʼi