Ne Biblia mama ke e Jehová * o dyⱥtrʼⱥ nu primer ndinxu, kjanu go zimbi kʼe bʼɇzo kʼꞹ mi chju̱u̱ Adán ngekʼua ro chjꞹntꞹbi. Me ko mⱥjⱥ e Adán ma go jñanda kʼe ndinxu, o mama ga kjaba: “Nujnu nge in nrrodyegodyajnu, nge in tsʼingegodyajnu” (Génesis 2:22, 23). E Jehová mⱥjⱥ ma ga jñanda ke ndexe yo ya chjꞹntꞹ me mⱥji ga minji.

Ma bi chjꞹntꞹge, bʼꞹma mi mbenkʼe rgui mⱥjⱥ, mi mbenkʼe dya rgui chu̱ge ko ni xira o ni suu. Pe dya nge ga kjanu, zo me ri sʼiyage ni xira o ni suu ra bʼꞹbʼꞹ paa ma ri chu̱gebi (1 Corintios 7:28). Kja ne skuama ri chøtrʼꞹ kʼo mama ne Biblia kʼꞹ ri tsjage ngekʼua ri mⱥjⱥ rgi minkʼe ko ni xirage o ni suge ñe in pjamiliage (Salmo 19:8-11).

NE BIBLIA MAMA KE: Yo bʼɇzo mandaji kja o pjamilia (Efesios 5:23).

Nutsʼkʼe bʼɇzo mꞹ a gui chjꞹntꞹge, e Jehová nee ke ri pjørꞹge na joo ni suge (1 Pedro 3:7). E Mizhokjimi o dyⱥtrʼⱥ yo ndinxu ngekʼua ro mbøsʼꞹ o xira. Ngekʼua angeze nee ke ri sʼiyage ñe ri respetao ni suu (Génesis 2:18). Ri unꞹ ndexe kʼo ni jyodʼꞹ angeze, xo ga kjanu ma pje kʼo gi nee ri tsjage, ri dyønbʼꞹ ja ga nuu kʼo gi nee ri tsjage, kjanu ri tsjapꞹ nguenda kʼo ra xitsʼi. Ma ri tsjagekʼo ra ñetsʼe me ki nege na punkjꞹ ni suge (Efesios 5:25-29).

Nutsʼkʼe ndinxu ma ya gui chjꞹntꞹ, e Jehová nee ke ri respetao ni xira ko texe in mꞹbʼꞹ, ri pjøsʼꞹ ngekʼua ra mbørꞹ na joo in pjamilia (1 Corintios 11:3; Efesios 5:33). Ma pje kʼo ra mama ni xira ke ri tsjagebi, ri dyⱥtⱥ, ri mⱥjⱥ rgi tsjage kʼo mama angeze (Colosenses 3:18). Ma ri tsjagekʼo, me rgi mubitsʼꞹ a jmii e Jehová ñe ni xirage ra netsʼe na punkjꞹ (1 Pedro 3:1-6).

TSJAGE KʼO MAMABA:

• Dyønꞹ ni xirage o ni suge pje bʼɇxtjo ri tsjage ngekʼua ri minkui na joo. Dyⱥrⱥ na joo kʼo ra xitsʼi ngekʼua ri tsjagekʼo

• Ri pɇspʼi paciencia, jmanchʼa jmanchʼa ri pjechi pje ri tsjage ngekʼua ri mⱥpⱥ ni suge o ni xira

NE BIBLIA MAMA KE: Dya ngextrjo ri tsjage kʼo gi nee, ri ñage ko ni suu ri tsejmebi pje ri tsjabi (Filipenses 2:3, 4). Dya ri guɇnchʼi ni suge o ni xira, e Jehová janrra me na mubikʼꞹ, nee ke ra jonteji, ke “ra sʼiya[ji] texe yo ntee” (2 Timoteo 2:24, NTD). Zopjꞹge na joo ni suge o ni xira ngekʼua dya ra zichʼi o mꞹbʼꞹ, nange ne Biblia mama ga kjaba: “Bʼꞹnkʼo ntee kʼꞹ dya mbeñeji na joo pje ma jñaa ra mbedye kja o nee, ngeje nzakja kʼꞹ ra dyʼɇchi ko na espada in minte, pe yo ntee yo trjꞹmbeñe na joo ma pje kʼo ra manji ngeje nzakja dʼa ñechje” (Proverbios 12:18). E Jehová ra mbøxkʼꞹ ngekʼua ri pa̱rge ja rgi ñage na joo (Gálatas 5:22, 23; Colosenses 4:6, NTD).

TSJAGE KʼO MAMABA:

• Ma ri pɇsʼi dʼa nrrumꞹ, ri dyøtꞹ Mizhokjimi ra mbøxkʼꞹ ngekʼua dya ri chu̱bi ni suge o ni xirage ma ri ñabi, dya nrrajme ri mbɇkuɇbi

• Pjønguenrra pje kʼo ri xipji ñe ja rgi zopjꞹ ni suu o ni xira

NE BIBLIA MAMA KE: Ma a gi chjꞹntꞹge, nutsʼkʼe ñe ni suge o ni xirage “a ri natrjo tsʼingebi” nza yetsʼkui (Mateo 19:5). Pe dya ri jyombeñe ke ni xira o ni suu dya mbeñe kʼua ja gi mbenkʼe. Ngekʼua, nutsʼkʼe bʼɇzo nesta ri tsjapꞹ nguenda ja ga soʼo ñe pje mbeñe ni suge, xo ñetsʼkʼe ndinxu ri tsjagekʼo, ga kjanu ri natrjo in pjeñegebi (Filipenses 2:2). Pɇski ri ñabi ri nubi pje ri tsjabi. Ne Biblia mama ke ma ri dyøtꞹ consejo, kʼo gi nee ri tsjage ra mbedye na joo (Proverbios 20:18). Ma pje gi nee ri tsjage, dyønꞹ ni suu o ni xira ma nuu na joo kʼo gi nee ri tsjage, xo ri jyodʼꞹbi kʼo mama ne Biblia ngekʼua ri pa̱rgebi pje nge kʼo mazi na joo ke ri tsjagebi (Proverbios 8:32, 33).

TSJAGE KʼO MAMABA:

• Ma ri ñabi ni suge o ni xirage dya ngextjo ri xipji kʼo bi tsjage, ri xipji ja gi soge amboo kja in mꞹnkʼe

• Ma gi nee ri tsjage dʼa compromiso, otrʼꞹ ri ñaa ko ni suge o ni xira