XORꞸ 13
¿Pje ra tsjapꞹ e Mizhokjimi yo relijion kʼo dya ga kjuana?
1. ¿Nrrexe yo relijion kjaji kʼo na kjuana?
Nrrexe kja yo relijion bʼꞹbʼꞹ ntee kʼo nee ra tsjaji kʼo na joo. E Jehová ra mbøsʼꞹkʼo. Pe na punkjꞹ ntee kʼo otrʼꞹ axojñi kja o relijion kjaji kʼo na sʼoo (2 Corintios 4:3, 4, TNM; 11:13-15). Kja telebision ñe kja periodiko bʼꞹma gi ⱥrⱥ ke yo relijion dya pje manji ma kʼo mbøkjimi kjapꞹji kʼo dya ga joo yo tsʼitrʼi. Xo bʼꞹbʼꞹ relijion kʼꞹ pjøsʼꞹji yo ntee kʼo kjaji chu̱ʼu̱ kja yo pais, ma bʼꞹbʼꞹ ntee kʼo ꞹmbꞹji potrʼꞹji. Na punkjꞹ ntee kʼo nee ra tsjaji kʼo na joo, ma ga dyⱥrⱥji jaga kjaa kʼꞹ na kjaa o relijion ꞹdʼꞹji, nange pa̱ra̱ji ke Mizhokjimi dya nee ke ra tsjajikʼo. Xorꞹge kja Mateo 24:4,5, 11, 12.
E Jehová nee kʼe relijion kʼꞹ kjaa kʼo na joo, dya nee yo relijion kʼo kjaa kʼo na sʼoo. Na punkjꞹ relijion dya jichiji kʼo na kjuana, manji ke e Mizhokjimi kjakoji ra kjogꞹji kʼo na sʼoo, manji ke e Mizhokjimi pa̱ntrʼa̱ kja ñixua yo ntee kʼo kjaa na sʼoo. Dya ga kjuanakʼo ngekʼua Mizhokjimi nee ke ra xorꞹji ne Biblia ngekʼua ra pa̱ra̱ji jaga kjaa angeze. Xorꞹge kja Ezequiel 18:4; 1 Timoteo 2:3-5.
2. ¿Pje ra tsjapꞹ e Jehová yo relijion kʼo dya ga kjuana?
Yo relijion manji ke kjaji kʼo mama ne Bibliani, pe e Mizhokjimi janrra ke dya kjaji kʼo na joo, kjaji kʼo na sʼoo jaga nee e Satanás (Santiago 4:4). Kʼo paa ma dya mi bʼꞹbʼꞹ e Noé, kʼo ntee kʼo mi bʼꞹnji a Babilonia go mbꞹrꞹ bo tsjaji kʼo dya ga joo, dya mi kjaji kʼo mi nee e Jehová. Ngekʼua kja o Jñaa e Mizhokjimi mama yo relijion kʼo dya kjaji jaga nee e Jehová nge nzakja jama kjaa kʼe “ndajñiñi a Babilonia”. Dya kja ra mezhe kʼe paa ma e Jehová ra chjotꞹ yo relijion kʼo kjaa kʼo dya ga joo ñe ompꞹ yo ntee. Xorꞹge kja Apocalipsis 17:1, 2, 5, 16, 17; 18:8.
E Jehová dya jyombeñe yo ntee kʼo na jonte kʼo jmurꞹji kja kʼo relijion kʼo dya ga kjuana, ngekʼua pejñe o ntee ra ma jyodʼꞹji yo ntee kʼo na jonte ngekʼua ra jichiji kʼo na kjuana. Xorꞹge kja Miqueas 4:2, 5.
3. ¿Pje ni jyodʼꞹ ra tsjaa kʼo ntee kʼo nee ra dyⱥtⱥ Mizhokjimi?
Kʼe relijion kʼꞹ na kjuana pjøsʼꞹ yo ntee ngekʼua ra tsjaji kʼo na joo
E Jehová me nee yo ntee yo kjaji kʼo na joo, nee ra mbøsʼꞹjikʼo, dya nee ke ra nrru̱ji ngekʼua xipji yo ntee ra mbedyeji kja kʼo relijion kʼo dya kjaji kʼo na kjuana. Ma yo ntee sʼiyaji e Jehová dya kja ra tsjaji kʼo na sʼoo kʼo kjaji yo relijion. Xorꞹge kja Apocalipsis 18:4.
Kja kʼe siglo dʼaja, ma kʼo ntee mi ⱥtⱥji kʼo mi jizhi kʼo apostole me mi mⱥji, mi pjechiji kʼo na joo ke ro tsjaji xo mi pjechiji pje ra tsjaa o Reino e Mizhokjimi. Ngekʼua dya kja mi kjaji kʼo na sʼoo, mi ⱥtⱥji e Jehová. Ngekʼua ma ra jitsʼkoji kʼo mama ne Biblia, na joo ke ra kjaji jagua tsjaji angezeji. Xorꞹge kja 1 Tesalonicenses 1:8, 9; 2:13.
E Jehová nee ke ri jyɇzge kʼe relijion kʼꞹ dya ga kjuana, ma ri tsjage ga kjanu ri jobige na joo ko angeze xo ri pɇsʼige na punkjꞹ kju̱ʼu̱ ñe kjuarma kʼo ra netsʼkʼe ñe ri minkʼe nrrexe yo paa kja ne Xoñijomꞹ ma me rga zøø. Xorꞹge kja Marcos 10:29, 30; 2 Corintios 6:17, 18.
4. ¿Pje nge kʼo na joo kʼo ra tsjaa Mizhokjimi?
Na joo ma dya kja ra bʼꞹbʼꞹ relijion kʼo dya ga kjuana, yo ntee ra nga̱ra̱ji na joo ko o minte, dya kja ra chu̱ji, nrrexeji ra dyⱥtⱥji ñe ra tsjaji kʼo mama e Jehová. Xorꞹge kja Apocalipsis 18:20, 21; 21:3, 4.
