Nu o trju̱u̱ e Diosi nge e Jehová, nee ra mama “Angeze kjapꞹ ra zⱥdʼⱥ o ra bʼꞹbʼꞹ”. Angeze me na zɇzhi ngekʼua o dyⱥtrʼⱥ texe. Angeze søø ra tsjaa texe kʼo mbeñe ñe kʼo nee.

Kja jñaa hebreo nu ja tʼopjꞹ o trju̱u̱ e Diosi bʼꞹbʼꞹtrjo nziyo letra. Kja jñangicha nujyo letra ngeje YHWH o JHVH. Kʼe Biblia ke o dyopjꞹji kja jñaa hebreo bʼɇxtrjo ro zøʼø 7.000 ba jñusʼꞹji o trju̱u̱ e Jehová. Texe yo ntee yo ka̱ra̱ kja ne xoñijomꞹ nⱥmbʼⱥji o trju̱u̱ e Jehová kʼua ja nzi ga ñaji kja o jñiñiji.

▸ Xørꞹ 1, párrafo 15, kja nu nota.

Yo jñaa yo junsʼꞹ kja ne Biblia je bi ñe̱je̱ kja e Disioyo. O juajnꞹ bʼɇzo ngekʼua ro dyopjꞹyo. Ngeje nzakja ma na guelo øtꞹ o bʼɇche ra dyopjꞹ na carta ngekʼua kʼo jñaa kʼo go dyopjꞹ nge o kjaja o guelo. O espíritu Mizhokjimi o ñʼꞹnbꞹ o mꞹbʼꞹ kʼo ntee ngekʼua ro dyopjꞹji kʼo mi mbeñe angeze. Nde nʼaño ba ñʼꞹnbꞹ o mꞹbʼꞹ kʼo bʼɇzo, bʼꞹma mi zopjꞹji kja trʼi̱ji̱ o ma jiyo mi kjapꞹ ro jñanrra kʼo mi nee e Diosi ke ro dyopjꞹji.

▸ Xørꞹ 2, párrafo 5.

Ngejyo junsʼꞹ kja ne Biblia kʼꞹ jitsʼkøji ja ga kjaa kʼo na kjuana. Nzakja ne jñaa nu mama akjaba: “Ma ri dyoji kʼo kjijñi na sʼoo, xo ri tsjijñiji a kjanu, y ri tsjaji kʼo na sʼoo”. Ga kjanu jitsʼkøji ke nujyo ntee yo ri dyokjøji søø ra mbøxkꞹji ra kjaji na joo o ra kjaji na sʼoo (1 Corintios 15:33). Ñe ne jñaa nu mama: “Nange kʼua ja ga tsjaa na ntee, je xo rga kjanu rga nzhopkʼꞹjikʼꞹ”. Jitsʼkøji ke texe yo ri kjaji nde ra nzhogꞹ (Gálatas 6:7).

▸ Xørꞹ 2, párrafo 12.

Ngejyo jñaa yo mama e Diosi kʼo xitsiji ja ga nee angeze, xitsiji ja rga minji, kʼo nee ke ra kjaji o ma kjo kʼo ra jñꞹnpꞹ nguenrra. Bʼꞹma xo nge dʼa jñaa kʼꞹ xitsiji pje ra kjogꞹ kʼo paa kʼo ra sⱥjⱥ. Na punkjꞹ jñaa kʼo junsʼꞹ kja ne Biblia ya zⱥdʼⱥ.

▸ Xørꞹ 2, párrafo 13.

Texe kʼo o tsjaa e Jesús ga kjanu ba zⱥdʼⱥ kʼo jñaa kʼo mi mama ja rba kjaa kʼe Mesías. Jñanrrage ja junsʼꞹ: “ Kʼo jñaa kʼo ro zⱥdʼⱥ kja e Mesías”.

▸ Xørꞹ 2, párrafo 17, kja nu nota.

E Jehová o dyⱥtrʼⱥ ne xoñijomꞹ me ma zøø ngekʼua ro mimi yo ntee yo sʼiyaji angeze. Dya jyombeñe kʼo mi mbeñe ro tsjaa. Dya kja ra mezhe ra chjotꞹ e Diosi texe yo na sʼoo, nuʼma ra unꞹ yo na jonte ra minji texe yo paa.

▸ Xørꞹ 3, párrafo 1.

E Satanás ngeje nu anxe kʼꞹ otrʼꞹ dya go dyⱥtⱥ e Mizhokjimi. Xiji Satanás nange dya nee ra dyⱥtⱥ e Jehová. Xo xiji Diablo nange xosbʼꞹ bʼɇchjine e Jehová ñe jichi bʼɇchjine yo ntee.

▸ Xørꞹ 3, párrafo 4.

E Jehová o dyⱥtrʼⱥ yo anxe ma dya bʼe mi ⱥtrʼⱥ ne xoñijomꞹ. O tsjapꞹ ro mimiji ajensʼe. Bʼꞹbʼꞹ na punkjꞹ millón o anxe (Daniel 7:10). Nrre pɇsʼiji o trʼu̱ji ñe nrre nʼaño ja ga kjaji, dya kjapꞹji na nojo ngekʼua dya sⱥji ma yo ntee nee ra matrʼꞹji. Nrre nʼaño ba ñʼesʼeji ñe nʼaño bʼɇpji kʼꞹ kjaji. Ka̱ra̱ kʼo pɇpi a jmii e Jehová, jꞹnꞹji o jñaa Mizhokjimi, pjøsʼꞹji ñe pjørꞹji yo o mbɇpji e Jehová yo ka̱ra̱ kja ne xoñijomꞹ, ma pje kʼo mbeñe ra tsjaa e Jehová angezeji kjaji kʼe bʼɇpji xo pjøsʼꞹji yo kjuarma ma jizhiji o Jñaa e Diosi (Salmo 34:7; Apocalipsis 14:6; 22:8, 9). Dya xo ra mezhe ma ra mbøsʼꞹji e Jesús kja kʼe chu̱ʼu̱ ke ni chju̱u̱ Armagedón, ra kjuatꞹji texe yo na sʼoo (Apocalipsis 16:14, 16; 19:14, 15).

▸ Xørꞹ 3, párrafo 5; xørꞹ 10, párrafo 1.

Nge kʼo pje nrre ri mbeñeji o pje nrre ri neji ke dya nge ja ga nee e Jehová, ne nzhubꞹ o ne pekado dya jɇzgiji ra joji na joo e Jehová, ngekʼua o dyakꞹji o Jñaa kʼo junsʼꞹ kja ne Biblia kʼꞹ pjøxkꞹji ngekʼua dya ra nee ra kjaji kʼo na sʼoo. Ma e Jehová o dyⱥtrʼⱥ e Adán ñe e Eva dya mi pɇsʼibi e nzhubꞹ. Ma dya kja nee ro dyⱥtⱥbi Mizhokjimi o mbɇsʼibi e pekado. Nza yejebi o mbꞹrꞹ o titabi kjanu o nrru̱bi, ngeje in mboxpaleji ngekʼua nde ri pɇsʼiji e nzhubꞹ ñe ri tu̱ji.

▸ Xørꞹ 3, párrafo 7; xørꞹ 5, párrafo 3.

Nge kʼe chu̱ʼu̱ kʼꞹ ra tsjaa e Jehová ma ra chjotꞹ texe yo na sʼoo yo bʼꞹbʼꞹ kja ne xoñijomꞹ nu ja manda e Satanás.

▸ Xørꞹ 3, párrafo 13; xørꞹ 8, párrafo 18.

O Reino Mizhokjimi nge dʼa gobierno ke e Jehová o ñʼeme ajensʼe, ngeje e Jesucristo kʼꞹ mandanu. Kja yo paa yo ra sⱥjⱥ ne Reino ngeje nu ra chjotꞹ texe yo na sʼoo. Ndeze ajensʼe ra manda texe kja ne xoñijomꞹ.

▸ Xørꞹ 3, párrafo 14.

E Mizhokjimi o dyⱥtrʼⱥ e Jesús ma dya bʼe mi trʼⱥtrʼⱥ e jensʼe ñe ne xoñijomꞹ. E Jehová o pejñe o trʼii kja ne xoñijomꞹ ngekʼua ro e ngꞹsʼꞹ yo ntee kja e nzhubꞹ. Ma o mbøtrʼꞹji angeze, e Jehová o xosꞹ na yeje. Nudya je manda ajensʼe kja o Reino e Diosi.

▸ Xørꞹ 4, párrafo 2.

Ne Biblia ya bi nⱥdʼⱥ jingua ro sⱥjⱥ e Mesías. Ngeje ma ro kjogꞹ kʼo xiji 69 ngoʼo, nujyo ngoʼo o mbꞹrꞹ kja kʼe kjɇɇ 455 a.C. ñe o nguarꞹ kja kʼe kjɇɇ 29 d.C.

¿Ja rga pa̱rgøji ke nge kʼe kjɇɇ 29 d.C. ma o zⱥdʼⱥyo? Yo 69 ngoʼo o mbꞹrꞹ kja kʼe kjɇɇ 455 a.C. ma e Nehemías o zⱥtrʼⱥ a Jerusalén ngekʼua o yepe o xosꞹ kʼe jñiñi (Daniel 9:25; Nehemías 2:1, 5-8). Yo ngoʼo yo nⱥdʼⱥba dya ngeje yo ngoʼo yo pɇsʼi yencho paa, nujyo ngoʼo ni jyɇtsʼpi yencho kjɇɇ, jakʼo ga mama o Jñaa e Diosi ke na paa ngeje na kjɇɇ (Números 14:34; Ezequiel 4:6). Nujyo nee ra mama ke na ngoʼo dya kja nge 7 paa, nge 7 kjɇɇ, ma ri tsibʼi nguenrra, kʼo 69 ngoʼo søø 483 kjɇɇ (69 x 7). Ma ri pjꞹrꞹ ri pezhe yo 483 kjɇɇ ndeze kʼe kjɇɇ 455 a.C. je ra zoo kja kʼe kjɇɇ 29 d.C. Nge kʼe kjɇɇ ma o jii e Jesús kja nrreje akjanu go mbɇzhi e Mesías (Lucas 3:1, 2, 21, 22).

 Ne Biblia mama ke xe ro bʼɇzhi na ngoʼo o yencho kjɇɇ. Kja yo kjɇyo ro mbøtrʼꞹji kʼe Mesías, nujyo go zⱥdʼⱥ kja kʼe kjɇɇ 33 d.C. Nuʼma, ma o ngichʼi kʼe kjɇɇ 36 d.C. o mbꞹrꞹ o jichiji pje ra tsjaa o Reino e Diosi kʼo dya mi menzumꞹ a Israel (Daniel 9:24-27).

▸ Xørꞹ 4, párrafo 7.

Ne Biblia mama ke e Jehová o dyⱥtrʼⱥ texe yo bʼꞹbʼꞹ ñe kʼꞹ o dyⱥtrʼⱥ e Jesús ma dya bʼe mi ⱥtrʼⱥ e jensʼe ñe ne xoñijomꞹ (Colosenses 1:15, 16, TNM). E Jesús dya ngeje e Diosi kʼꞹ søø ra tsjaa texe. Angeze dya o mama ke ri chjenjui e Diosi ngekʼua ba mama ga kjaba: “mi Tatago xenda na nojo ke na ngezgo” (Juan 14:28; 1 Corintios 15:28). Pe bʼꞹbʼꞹ yo religión yo jizhi kʼe Trinidad, ga kjanu manji ke e Tata, e Trʼii ñe nu espíritu santo nrre chjentrji. Pe ne jñaa “Trinidad” dya ri chøtrʼꞹ kja ne Biblia. Dya kjuana yo jizhiji ga kjanu.

Nu espíritu santo ngeje nu o zɇzhi e Diosi, nge nu ni tsjaa ja nzi ga mbeñe ñe ja nzi ga nee Angeze. Dya ngeje na ntee. Nzakja ga mama ne Biblia ke o espíritu Mizhokjimi “o kjogꞹ amboo o mꞹbʼꞹ texeji” kʼo otrʼꞹ mi teñeji e Jesús. Xo mama e Jehová ra tsjaa ke nu espíritu santo “ra ma bʼꞹbʼꞹ kja o mꞹbʼꞹ yo ntee yo ka̱ra̱ texe kja ne xoñijomꞹ” (Hechos 2:1-4, 17).

▸ Xørꞹ 4, párrafo 12; xørꞹ 15, párrafo 17.

Kʼo o discípulo e Jesús dya mi jꞹ̱ji ne ngronsi ma mi matrʼꞹji Mizhokjimi, ¿pjenga?

1. Ya mezhe ke yo religión yo dya ga kjuana pɇsʼiji ne ngronsi. Mi jꞹ̱ji ne ngronsi mi jingua ma mi matrʼꞹji yo o dyⱥtrʼⱥ Mizhokjimi. Xo mi jꞹ̱ji ne ngronsi kʼo ntee kʼo dya mi pa̱ra̱ji Mizhokjimi ma mi chjansʼaji kʼo bʼɇzo ñe kʼo nrrinxu ma mi matrʼꞹji o tsʼitaji. Zø ya bi kjogꞹ 300 kjɇɇ ke a bi nrru̱u̱ e Jesús, ni ri dʼaja kʼo mi enchʼe o mꞹbʼꞹ angeze mi matrʼꞹ ne ngronsi. Xe go kjogꞹ na punkjꞹ kjɇɇ ma dʼa bʼɇzo kʼꞹ mi manda a Roma kʼꞹ mi chju̱u̱ Constantino, o tsjapꞹ ro matrʼꞹji ne ngronsi kja kʼo religión kʼo dya kjuana. Ga kjanu xe ro chɇzhi na punkjꞹ ntee kja kʼo religión kʼo mi kjapꞹ mi teñeji e Cristo. Pe e Jesús dya o nrru̱u̱ kja ngronsi. Na skuama kʼꞹ go dyopjꞹji yo religión católica mama: “Kʼo ntee mi pɇsʼiji ne ngronsi ma dya bʼe ma e̱je̱ e Cristo, xo pɇsʼiji ne ngronsi kʼo ntee kʼo dya teñe e Cristo” (New Catholic Encyclopedia).

2.   E Jesús dya o ndu̱u̱ kja na ngronsi. Ja kʼo ma dyopjꞹji griego, ne jñaa “ngronsi” nee ra mama na “dyaxꞹ”, na “morio” ñe na “zaʼa”. Na Biblia mama ga kjaba: “Yo jñaa kʼo go dyopjꞹji kja griego [kja Nuevo Testamento] dya bʼꞹbʼꞹ ni ri na jñaa ke ri nⱥdʼⱥ yee zaʼa” (The Companion Bible). E Jesús go nrru̱u̱ kja na zaʼa.

3. E Jehová dya nee ke ra xørpꞹji yo tsʼita ñe yo pje nrre jꞹ̱ji yo ntee ngekʼua ra matrʼꞹji angeze (Éxodo 20:4, 5; 1 Corintios 10:14).

▸ Xørꞹ 5, párrafo 12.

E Jesús o manda kʼo discípulo ro mbeñeji kʼe paa ma o ndu̱u̱ angeze. Tsjɇma kjaji akjanu kja kʼe paa 14 ne zana nisán xo nge kʼe paa ma kʼo mi menzumꞹ a Israel mi kjaji kʼe mbaxkua kʼꞹ mi xiji Pascua. Kjokꞹji vino ñe tjomechʼi kja o dyɇɇ yo ntee, nujyo ni jyɇspi o cuerpo (nzero) ñe o kjii e Jesús. Kʼo ra manda ajensʼe nzakja e Jesús nge kʼo ra zii kʼe trjomechʼi ñe kʼe vino. Yo ntee yo tebʼe ra mimiji kja ne xoñijomꞹ kʼꞹ me rga zøø ra ma dyⱥrⱥtjoji, dya siji kʼe tjomechʼi ni ri nge kʼe vino.

▸ Xørꞹ 5, párrafo 21.

Kja ne Traducción del Nuevo Mundo kʼꞹ go dyopjꞹji kja inglés, ma nⱥdʼⱥ “alma” nge (1) na ntee, (2) na añimale ñe (3) o zakꞹ (o nu bida) na ntee o na añimale. Ra nuji ja ga kjaa yo jñii jñaa:

• Na ntee. “Kja kʼo paa ma mi bʼꞹbʼꞹ e Noé, [...] ma mi ⱥtrʼⱥji kʼe arca, nu ja ngichʼi janzitrjo ntee, jñincho alma, ngekʼua dya o nrru̱ji kja nrreje” (1 Pedro 3:20, TNM). Ma go dyopjꞹji ne jñaa “alma” nee ra mama ke mi ngeje kʼo ntee, nzakja e Noé, nu suu, kʼo jñii o trʼii ñe kʼo o kjøø angeze.

• Yo añimale. “E Diosi o mama ga kjaba: ʽRa nga̱ʼa̱ kja yo ndeje yo pje nde ma añimale [“alma”] xo ra nga̱ra̱ yo añimale [“alma”] yo ra chjinsʼapjꞹ a ndee ajensʼeʼ. Nukʼua o mama  e Diosi: ‘Ra nga̱ra̱ yo pje nde ma añimale [“alma”] yo ra bʼꞹbʼꞹ a jmii yo ntee, yo ra ngꞹtrʼꞹ o pjeme a jomꞹ ñe yo ra nga̱ra̱ kja trʼejeʼ. Je ba kjanu ba zⱥdʼⱥ” (Génesis 1:20, 24).

• O zakꞹ na ntee o na añimale. E Jehová o xipji e Moisés: “Ya nrru̱u̱ texe kʼo bʼɇzo kʼo mi jodʼꞹ ro mbøtrʼkʼꞹgeji [o kʼo mi jonkʼꞹji in alma]” (Éxodo 4:19). Ma e Jesús mi bʼꞹbʼꞹ kja ne xoñijomꞹ o mama: “Ngetsʼkø na mbørꞹ kʼꞹ me na joo; na mbørꞹ kʼꞹ na joo, unꞹ o bida [“alma”] ga mbørꞹ o tsʼime” (Juan 10:11, TNM).

  Ma na ntee kjaa na bʼɇpji ko texe o zakꞹ (o “alma”), nee ra mama ke me nee ra tsjaa na joo ne bʼɇpji (Mateo 22:37; Deuteronomio 6:5). Kja ne Biblia ne jñaa “alma” xo nge kʼo nepe o mꞹbʼꞹ na ntee. Søø ra mangøji ke na añima nge na alma kʼꞹ ya nrru̱u̱ (Números 6:6; Proverbios 23:2; Isaías 56:11; Ageo 2:13).

▸ Xørꞹ 6, párrafo 5, kja nu nota; xørꞹ 15, párrafo 17.

Ne jñaa “kjimi” o “espíritu” kʼꞹ go dyopjꞹji kja hebreo ñe griego, kja ne Traducción del Nuevo Mundo kja inglés nrre nʼaño ma kjaa ne jñaa. Pe nge yo dya søø ra jandaji, nzakja ne ndajma ñe o jñꞹꞹ na ntee o na añimale. Xo nge yo anxe o yo demonio ñe o espíritu Mizhokjimi kʼꞹ nge o zɇzhi kʼꞹ pɇsʼi angeze. Kja ne Biblia dya mama ke ma ra nrru̱u̱ na ntee pje kʼꞹ pɇsʼi amboo kʼꞹ ra mbesʼe ñe ra bʼꞹbʼꞹtrjo (Éxodo 35:21; Salmo 104:29; Mateo 12:43; Lucas 11:13).

▸ Xørꞹ 6, párrafo 5, kja nu nota; xørꞹ 15, párrafo 17.

Kʼꞹ mi xiji Gehena mi ngeje na kotʼꞹ kʼꞹ bʼɇchi mi bʼꞹbʼꞹ a Jerusalén nu ja mi trjꞹtʼꞹji kʼo kañabꞹ. Dya kjo søø ra mama ke mi kjapꞹji ro supjre o ro nrrꞹtrʼꞹji kʼo ntee ñe kʼo añimale kja kʼe kotrʼꞹ kja kʼo paa ma mi bʼꞹbʼꞹ e Jesús. Ngekʼo ne Gehena dya nge nu ja kjapꞹji ra supjre o ra nrrꞹtrʼꞹji yo añima texe yo paa. Ma e Jesús go nⱥdʼⱥ kʼo ntee kʼo ro  pa̱ntrʼa̱ji kja Gehena mi nee ro mama ke ixto chjotꞹji (Mateo 5:22; 10:28, TNM).

▸ Xørꞹ 7, párrafo 20.

Nge nu jñaa nu go jichi e Jesús kʼo o discípulo ja rba dyøtꞹji e Mizhokjimi. E Jesús o jitsʼkøji pje søø ra øtꞹji e Diosi ma ra zopjꞹji:

• “Ni jyodʼꞹ kʼꞹ texeji ra respetao in chju̱ge”

  Ri ørꞹji ke e Jehová ra chjotꞹ yo bʼɇchjine kʼo kjapꞹ ra poxꞹ o trju̱u̱ ñe texe ja ga tsjaa. Ga kjanu ra kjogꞹ ngekʼo texe yo bʼꞹbʼꞹ a jensʼe ñe kja ne xoñijomꞹ ra tsjapꞹji ni mubi o trju̱u̱ e Diosi ñe ra respetaojikʼꞹ.

• “Penkejme in reino”

  Ri ørꞹji ke o Reino e Diosi ra kjuatꞹ texe yo na sʼoo yo bʼꞹbʼꞹ kja ne xoñijomꞹ nu ja manda e Satanás. Xo ri ørꞹji ke o Reino ra manda kja ne xoñijomꞹ, nukʼua ra tsjapꞹ ra mbɇzhi ne xoñijomꞹ me rga zøø.

• “Nrrexe yo ka̱ra̱ ajensʼe ñe kja ne xoñijomꞹ ra dyⱥtkʼⱥji”

  Ri ørꞹji ra zⱥdʼⱥ kʼo mi mbeñe e Diosi ro tsjaa kja ne xoñijomꞹ ngekʼua ra nga̱ra̱ ntee kʼo dya kja ra mbɇsʼiji e nzhubꞹ ñe ra mimiji texe yo paa kja ne xoñijomꞹ nu me rga zøø. Je ma kjanu ma nee angeze ma o dyⱥtrʼⱥ e Adán ñe e Eva.

▸ Xørꞹ 8, párrafo 2.

E Jehová o dyakꞹji kjo ro ngꞹxkꞹji kja e nzhubꞹ ngekʼo dya kja ro tu̱ji. Go pejñe o trʼii ngekʼo ro ngontrʼꞹ kʼe nzhubꞹ ga kjanu ro søø ro nzhokꞹzꞹji kʼo mi pɇsʼi e Adán ma dya bʼe mi tunsʼꞹ nzhubꞹ ñe ra joji na joo e Jehová. Xo go pejñe e Jesús kja ne xoñijomꞹ ngekʼo ro pⱥtrʼpⱥ yo ntee rba nrru̱u̱. Kʼꞹ bi nrru̱u̱ e Jesús o ngꞹsʼbʼꞹ e nzhubꞹ yo ntee yo ⱥtⱥ e Diosi ngekʼo ra mimiji texe yo paa.

▸ Xørꞹ 8, párrafo 21; xørꞹ 9, párrafo 13.

Ne jñaa kʼo bi mama e Daniel kja ne capítulo 4 jitsʼkøji ke e Yose ro ñʼesʼe ajensʼe o Reino kja nu kjɇɇ 1914.

Ro zⱥdʼⱥ kʼo bi nⱥdʼⱥji: Kʼo mi mbeñe ro tsjaa e Jehová, o tsjapꞹ ro nginchʼi kja dʼa trʼi̱ji̱ e Nabucodonosor, o nginchʼi dʼa zaʼa [o dʼa xijño] kʼꞹ me ma nrra̱a̱ kʼꞹ ro dyɇziji. Kja o trʼi̱ji̱ o jñanrra ja ba jyꞹtrʼbʼꞹji a nguaa nu zaʼa na yeje trʼezi, naja kʼꞹ mi nge cobre ñe naja kʼꞹ mi nge hierro ngekʼua dya kja ro teʼe, kja ro kjogꞹ yo yencho kjɇɇ. Nuʼma ro xⱥpkⱥji ngekʼua ro teʼe na yeje (Daniel 4:1, 10-16).

Ja rba zⱥdʼⱥ kʼo bi nⱥdʼⱥji: Nu zaʼa mi chjenjui o Reino e Yose. Na punkjꞹ kjɇɇ e Jehová o juajnꞹ kjo ro pⱥtrʼpⱥ rba manda kja kʼe menzumꞹ Israel (1 Crónicas 29:23). Kʼo bi ñʼeme e Diosi ro manda, o mbꞹrꞹ o tsjaji na sʼoo, ngekʼo e Jehová dya kjo xe go ñʼeme kjo ro pⱥtrʼpⱥ rba manda. O chjotꞹji kʼe jñiñi Jerusalén nu kjɇɇ 607 a.C., ga kjanu ba mbꞹrꞹ yo yencho kjɇɇ (2 Reyes 25:1, 8-10; Ezequiel 21:25-27). E Jesús o nⱥdʼⱥ yo yencho kjɇɇ ma o mama ke “kʼo dya menzumꞹ a Jerusalén, ngeje kʼo ra mandanu, asta ma ra zⱥdʼⱥ kʼꞹ ya mama Mizhokjimi kʼꞹ dya kja ra mandaji” (Lucas 21:24). Ngekʼo yo yencho kjɇɇ dya bʼe mi sⱥdʼⱥ ma e Jesús o e̱je̱ kja ne xoñijomꞹ. E Jehová o mama ke ro ñʼeme kjo ro manda ma ro nguarꞹ ro zⱥdʼⱥ yo yencho kjɇɇ. Kʼꞹ ro ñʼeme ro manda ngeje e Jesús, angeze ra mbøsʼꞹ texe o menzumꞹ e Yose kʼo ri ka̱ra̱ kja ne xoñijomꞹ texe yo paa (Lucas 1:30-33).

¿Janzi o mezhe kʼo yencho kjɇɇ? Nujyo o mezhe 2.520 kjɇɇ, o mbꞹrꞹ kja kʼe kjɇɇ 607 a.C. ñe o zⱥdʼⱥ ma ya nge ro nguarꞹ nu kjɇɇ 1914 d.C. Nuʼma e Jehová o ñʼesʼe e Jesús kʼꞹ mi nge e Mesías ro manda kja o Reino angeze ajensʼe.

 ¿Ja ga mbezheji yo 2.520 kjɇɇ? Kja ne Biblia mama ke jñii ndee kjɇɇ nge 1.260 paa (Revelación [Apocalipsis] 12:6, 14, TNM). Ga kjanu ma ri tsibʼi nguenrra yo yencho kjɇɇ sⱥsʼⱥ 2.520 paa. Yo 2.520 paa ngeje 2.520 kjɇɇ ma ri tsibʼi nguenrra yo mama ne Biblia ke na paa chjenjui na kjɇɇ (Números 14:34; Ezequiel 4:6).

▸ Xørꞹ 8, párrafo 23.

Ne jñaa “arcángel” nee ra mama “kʼꞹ manda kja yo anxe”. Ne Biblia mama ke dʼatrjo arcángel kʼꞹ bʼꞹbʼꞹ ñe ni chju̱u̱ Miguel (Daniel 12:1; Judas 9).

E Miguel ngejnu otrʼꞹ axojñi kja texe yo anxe yo pɇpi e Diosi. Kja Apocalipsis 12:7 mama ga kjaba: “E Miguel ñe kʼo o anxe Mizhokjimi kʼo mi dyoji, o chu̱ji ko kʼe kʼijmi ñe kʼo anxe kʼo mi dyoji kʼe kʼijmi”. Kja Apocalipsis mama ke e Jesús ngeje kʼꞹ otrʼꞹ axojñi kja yo anxe, ngekʼua ri nuji ke e Jesús xo ni chju̱u̱ Miguel (Apocalipsis 19:14-16).

▸ Xørꞹ 9, párrafo 4, kja nu nota.

Ngejyo paa ma pje nrre ro kjogꞹ kja texe ne xoñijomꞹ ñe ro jñetsʼe ma o Reino Mizhokjimi ya nge ro chjotꞹ texe yo na sʼoo yo bʼꞹbʼꞹ kja ne xoñijomꞹ nu ja manda e Satanás. Yo paa xo xiji ga kjaba: “Yo paa ma ra nguarꞹ yo bʼꞹbʼꞹ kja nu xoñijomꞹ” ñe “ma ra bʼꞹbʼꞹ o Trʼii e bʼɇzo”, kja ne Biblia nde chjenjui yo jñaa (Mateo 24:3, 27, 37, TNM). Yo paa yo ri manji o mbꞹrꞹ ma e Jehová o ñʼesʼe e Jesús kja o Reino ajensʼe nu kjɇɇ 1914, ra nguarꞹ yo paa ma ra chjotꞹji nu ja manda e Satanás kja Armagedón (2 Timoteo 3:1; 2 Pedro 3:3).

▸ Xørꞹ 9, párrafo 5.

Nge ma e Diosi ra xosꞹ kʼo ya nrru̱u̱. Kja ne Biblia nⱥdʼⱥ ke o xosꞹji nzincho añima. Nge o zɇzhi e Diosi o mbøsʼꞹ e Elías, e Eliseo, e Jesús, e Pedro ñe e Pablo ngekʼo ro xosꞹji kʼo a bi nrru̱u̱. E Jehová mama ke ra xosꞹ kʼo añima “kʼo o tsjaa na joo ñe kʼo o tsjaa na sʼoo” ngekʼo ra mimiji kja ne xoñijomꞹ (Hechos 24:15). Ne Biblia xo mama ke ra xosꞹji janzi ntee kʼo ra zidyiji ajensʼe. Nujyo nge yo go juajnꞹ Mizhokjimi ngekʼo ra ma mimiji ajensʼe nu ja bʼꞹbʼꞹ e Cristo (Juan 5:28, 29; 11:25; Filipenses 3:11, NTD; Apocalipsis 20:5, 6, NTD).

▸ Xørꞹ 9, párrafo 13.

Nge kʼꞹ kjaa yo ntee ma nee ra zopjꞹtsjɇji yo demonio, o jodʼꞹji kjo ra mbøsʼꞹji nzakja yo xiji sɇrø (sañimɇ), ñespete, yo pa̱ra̱ pje ra kjogꞹ, yo pa̱tʼpa̱ o pjeñe na ntee ñe yo zopjꞹ yo añima. Yo xøtrpꞹ yo seje, yo pa̱ra̱ pje ra kjogꞹ, yo kjaa magia, yo kjaa yo sɇrø, yo paa kja trjodʼꞹ ñe yo kreoji yo ni ñe̱je̱ kja o zɇzhi yo demonio, nge yo xo kjaji yo zopjꞹ yo demonio. Xo ngeje texe yo na sʼoo yo kreoji yo ntee ra kjogꞹ nzakja ma janrraji na bʼomixi, ja kjo nrre jꞹtrʼꞹji na mbatrjꞹmꞹ ngekʼua dya ra zobʼꞹji, ja kʼo nrre kuatꞹji ngronsi ngekʼo ra kʼueñe yo sʼondajma ñe pje kʼo nrre kreoji. Yo ntee yo kjaa ga kjanu, mbeñeji ke yo añima sido tetrjoji ñe pɇzhiji ra tsjapꞹji kʼo na sʼoo. Yo demonio me jodʼꞹ pje ra tsjaa ngekʼo yo ntee dya ra dyⱥtⱥji e Diosi. Bʼꞹbʼꞹ na punkjꞹ skuama, yo horóscopo, yo película, yo ja nrre kuatrʼꞹ ñe yo trjo̱njo̱ kʼꞹ pezhe pje nrre kjaa yo demonio, ne magia ñe yo ni ñe̱je̱ kja o zɇzhi yo demonio. Nujyo kjapꞹji ke yo ntee me joo rga zøji ma ra nuji o ra dyⱥrⱥjiyo ñe mbeñeji ke dya pje ra kjogꞹ. Bʼꞹbʼꞹ ntee yo pje nrre kjaa kʼe paa ma kjo kʼo ra nrru̱u̱ ñe ma ra dyøgꞹji, kjinsbʼiji o paa, søtpʼꞹji o kjɇɇ ñe pje kʼo nrre pⱥsʼbʼⱥji, pe bʼꞹbʼꞹ kʼo peskʼꞹ ra nuu yo demonio. Bʼꞹbʼꞹ kʼo ntee kʼo sii ñʼechje kʼꞹ kjapꞹ ra sʼodʼꞹ o pjeñe ngekʼua ra søø ra tsjaji kʼo mama yo demonio (Gálatas 5:20; Apocalipsis 21:8).

▸ Xørꞹ 10, párrafo 10; xørꞹ 16, párrafo 4.

Ngextrjo e Mizhokjimi Jehová me na zɇzhi, angeze bo dyⱥtrʼⱥ texe yo bʼꞹbʼꞹ (Revelación 15:3, TNM). Ngekʼua texe yo bʼꞹbʼꞹ nge o kjaja angeze ñe søø ra manda kja texe yo o dyⱥtrʼⱥ (Salmo 24:1; Isaías 40:21-23; Apocalipsis 4:11). Texe yo o dyⱥtrʼⱥ e Jehová o unꞹ ley nzi dʼaja ñe søø ra ñʼeme kjo ra manda. Ma ri sʼiyaji ñe ri ⱥtⱥji Mizhokjimi ra jñetse ke ri tʼekjañomꞹji ja ga manda angeze (1 Crónicas 29:11).

▸ Xørꞹ 11, párrafo 10.

Nge kʼo kjaa na ndinxu ma nee ra mbøtʼꞹ o tsʼilele (o tsʼimbane). Dya nee ra mama kʼꞹ ro ndogꞹtsjɇ o lele ni xo ri nge ma dya sⱥmpⱥ o cuerpo ra ndunte. Nu tsʼilele ngeje na ntee ndeze nu paa ma o ndunte nu ndinxu.

▸ Xørꞹ 13, párrafo 5.

Nge ma na doctor ra xichʼbʼi kjii kja o ñitsji na ntee. Bʼꞹma ngetsjɇ o kjii kʼe ntee kʼꞹ o dyoʼpʼꞹji ma iyo nge o kjii nʼaño ntee. Xo nge ma na doctor ra xo̱kꞹ yo nziyo yo chja̱na̱ ne kjii ngekʼua natrjo kʼꞹ ra xichʼbʼi kja o ñitsji na ntee. Yo nziyo yo chja̱na̱ ne kjii ngeje: Nu plasma, yo glóbulo rojo, yo glóbulo blanco ñe yo plaqueta.

▸ Xørꞹ 13, párrafo 13.

Kja ne Biblia ne jñaa “guɇnchʼi”, dya ngextrjo ra jñꞹnpꞹji nguenrra na ntee ma pje kʼo o tsjaa. Ma kjo kʼo ra xitsʼkøji na joo pje ra kjaji ñe xitsiji kʼo dya ra kjaji chjentjui ke na guɇnchʼkøji. Ma e Jehová guɇnchʼi na ntee dya guɇnchʼi na zɇzhi ñe dya mⱥjⱥ ma supjre kʼe ntee (Proverbios 4:1, 2). E Jehová o unꞹ yo tata ñe yo nana na trju̱rꞹ ngekʼua ra mba̱ra̱ji ja rga guɇnchʼiji o trʼiji. Mizhokjimi pa̱ra̱ ja rga guɇnchʼi na ntee ngekʼua dya ra togꞹ o mꞹbʼꞹ kʼe ntee (Proverbios 12:1). E Jehová sʼiya ñe jichi yo ntee. Angeze pjøsʼꞹyo ngekʼua ra potꞹ o pjeñeji akjanu ra ngijñiji ñe ra tsjaji ja ga nee angeze. Ma yo tata ñe yo nana guɇnchʼiji o trʼiji ni jyodʼꞹ ra xipjiji pjenga na joo kʼꞹ ra dyⱥtⱥji. Xo jichiji ra sʼiyaji e Jehová ñe ra dyⱥtʼⱥji kʼo mama angeze kja ne Biblia.

▸ Xørꞹ 14, párrafo 13.

Yo demonio nge yo anxe yo kjaa na sʼoo, dya søø ra janrrajiyo ñe xenda na zɇzhiji ke yo ntee. Go mbɇzhiji demonio ma dya kja go dyⱥtⱥji Mizhokjimi ñe me ꞹmbꞹji angeze (Génesis 6:2; Judas 6). Yo demonio o nrreñeji e Satanás ngekʼua dya kja go dyⱥtⱥji e Jehová (Deuteronomio 32:17; Lucas 8:30; Hechos 16:16; Santiago 2:19).

▸ Xørꞹ 16, párrafo 4.