YO RA TSJAJI YO XOO ÑE YO XAA
12. Jyod’ꞹ pje søø ri tsjaa a ma axojñi
¿PJE NEE RA MAMAYO?
Ma bʼꞹbʼꞹ pje nge kʼꞹ i nee ri tsjaa, dya ngextrjo ri tsjijñi ja rgua ngeje kʼo i nege, ma na kjuana i nee ri tsjaa, otʼꞹ ni jyodʼꞹ ri tsjaa nguenda, kjanu ri tsjijñi ja rgi tsjaa ma ri pesi ndumꞹ ñe xo ri pɇpji na zɇzhi.
Nu kʼꞹ i nee ri tsjaa, bʼꞹbʼꞹ nu kʼꞹ dabaditrjo søø ri tsjaa, pe xo bʼꞹbʼꞹ kʼo xe nda ra mezhe ri tsjaa, bʼꞹma ra kjogꞹ janzi zana, maxke janzi kjɇɇ. Ma bʼꞹbʼꞹ pje i nee ri tsjaa ke ra mezhe janzi kjɇɇ, ri jyodʼꞹ pje ri tsjaa ngekʼua ri sotꞹ.
¿PJENGA ME NA MUBIYO?
Ma ri tsjaa texe kʼo na joo ke i nege, ri søge na joo, ri chɇzhi ko in jobige ñe me ri mⱥjⱥ.
Ri søge na joo: Ma ri sotꞹ kʼꞹ i nee ri tsjaa ke dya ra mezhe na punkjꞹ paa, mazi søø ri tsjaa kʼo ra mezhe janzi kjɇɇ. Xo ra mbøxkʼꞹ dya ri su̱ge yo ndumꞹ yo ri tsjogꞹ pama pama, nzakja ma kjo ra xitsʼi ke ri tsjage kʼo na sʼoo.
Ri chɇzhi na joo ko in jobi. Texe ri søji na joo ma ri bʼꞹnkʼøji ko yo tee ke pa̱ra̱ji na joo pje neji ñe pɇpjiji ngek’ua ra sotꞹji kʼo neji. Xo ñeje søø ri chɇzhiji na joo ko in jobi ma ri potka pɇpjibi ngek’ua ri sotꞹbi nu kʼꞹ gi nee ri tsjagebi.
Xe nda ri to̱jia: Nuʼma i sotꞹ nu kʼꞹ i nege, me joo rga zøø ni mꞹbʼꞹ ke bi sotꞹ.
“Ri søgø na joo ma bʼꞹbʼꞹ kʼꞹ i nee ra kjagø, akjanu ri pɇkjø pama pama ñe ri jodʼꞹ ja rga sotʼꞹ. Ma ri sotꞹ kʼo mi nee ro kjagø, ri mbeñe texe kʼo ro kjagø ñe ri mango: ʼ¡Na kjuana ro søø ro kjago!ʼ” (Christopher).
NE BIBLIA JIZHI: “Nu kʼꞹ ngextrjo janda ne ndajma dya ra ndu̱jmꞹ, ñe kʼꞹ ngextrjo janda yo ngo̱mꞹ, dya pje ra xepje” (Eclesiastés 11:4).
¿PJE SØØ RI TSJAA?
Ma pje nge kʼo i nee ri tsjage, pjøtpꞹ nguenda kʼo mamaba.
Juajnꞹ kʼꞹ i nee ri tsjaa. Jñusꞹ texe kʼo i nee ri tsjage, kjanu ri ñuu pje nge kʼꞹ otrʼꞹ ri pjꞹrꞹ ri tsjaa.
Tsjijñi ja rgi tsjaa. Tsjapꞹ akjaba kʼꞹ i nee ri tsjaa:
Juajnꞹ pje ma paa ri sotꞹ ke na kjuana søø ri tsjage.
Jñusʼꞹ texe ja rgi tsjage.
Tsjijñi ke bʼꞹma ri tsjogꞹ ndumꞹ ñe ja rgi sɇchi.
Tsjagedya. Dya ri chebʼe jesta ma ri pɇsʼi nza texe kʼo ni jyodʼꞹ. Dyønꞹtsjɇ: ¿Pje nge kʼꞹ otʼꞹ søø ra kjagø ngekʼua ra sotꞹ kʼo ri negø? Kjanu ri tsjaa. Pjøtpꞹ nguenda texe kʼo ya bi sotꞹ.
NE BIBLIA JIZHI: “Kʼo nee ra tsjaa dʼaja ke me na joo ga pɇpji, ra mbedye na joo” (Proverbios 21:5).
