YO RA TSJAJI YO XOO ÑE YO XAA
11. Ri pɇpji na joo
¿PJE NEE RA MAMAYO?
Na ntee ke na joo ga pɇpji dya su̱u̱ pje ma bʼɇpji ra tsjaa. Me nee ra pɇpji, dya tebʼe kjo ra unꞹ kʼo ni jyodʼꞹ xo nee ra mbøsʼꞹ yo dyaja, zø ñetse ke dya nda na mubi nu bʼɇpji kʼꞹ kjaa.
¿PJENGA ME NA MUBIYO?
Zø ri neji o jiyo, yo padya me ni jyodʼꞹ ra pɇpjiji. Xo ñeje ma ri pɇpjiji na joo me pjøxkꞹjikʼo na ngeje yo padya na punkjꞹ ntee dya nee ra pɇpjiji na zɇzhi (Eclesiastés 3:13).
“A ro pjechkʼø ke ma ri pɇkjø na punkjꞹ, me joo rga søø in mꞹnkʼø, ngekʼua xi nee ra pɇkjø. Xo ñeje ma ri kjaji na joo in bʼɇpji ra nukꞹji na joo yo dyaja” (Reyon).
NE BIBLIA JIZHI: “Ma kjo pɇpji na zɇzhi ra pɇsʼi kʼo ni jyodʼꞹ” (Proverbios 14:23).
¿PJE SØØ RI TSJAA?
Ma ri tsjaa yo mamaba ra mbøxkʼꞹ ri ñuu na joo in bʼɇpji.
Ma ri pjechi ri tsjaa na joo in bʼɇpji, ri zøø na joo. Tsjapꞹ na joo nguenda kʼo i kjage, ma ri xaʼma in nzumꞹ, ma ri tsjaa in tarea kja colegio o ma ri pɇpjige. Maa bi tsjaa na joo in bʼepji, jyodʼꞹdya ja rgi tsjaa xe nda na joo kʼe bʼɇpji o søø ri tsjaa dabʼaditrjo. Ma ri tsjaa akjanu me ri to̱jiage ma ri pɇpji.
NE BIBLIA JIZHI: “¿A bi jñanda na bʼɇzo ke na joo ga tsjaa o bʼɇpji? Ra bʼobʼꞹ a jmii kja yo manrro” (Proverbios 22:29).
Me ri potpꞹ nguenda yo dyaja. Ma ri tsjaa na joo in bʼɇpji søø ri pjøsʼꞹ yo dyaja. Nzakja ma ra xitsʼiji pje ri tsjaa kja in nzumꞹ, ri tsjapꞹ ke in pjamilia dya ra mboo o kuɇji.
NE BIBLIA JIZHI: “Xe nda ri mⱥkjeji ma ri unꞹji, ke nange ma ra chʼakʼꞹji” (Hechos 20:35)
Ri jyodʼꞹ pje xi søø ri tsjaa. Dya ngextrjo ri tsjaa kʼo xitsʼiji, tsjijñi pje xi søø ri tsjaa. Akjanu ngetsʼkʼe ri juajnꞹ pje ri tsjaa. Me ni jyodʼꞹ pje xi ri tsjaa zø ri pɇpji na zɇzhi, pe dya kjo mandatsʼꞹ pje ri tsjaa, ngetsʼkʼe ri juajnꞹ nu kʼꞹ ri tsjaa. (Mateo 5:41).
NE BIBLIA JIZHI: “Ri tsjaa kʼua ja rgi ñege. Dya ngeje kʼua ja ga negø. Ngetsʼkʼe ri cho̱jo̱” (Filemón 14, NTD).
Zø ri pɇpji na punkjꞹ pe xo ri soya. Yo tee ke na joo ga pɇpjiji dya nrrijemeji, pe dya pɇpjiji xomꞹ ndempa. Me na mubi ri mⱥjⱥ rgi pɇpji na zɇzhi xo ri mⱥjⱥ ma ri soya na ndajme.
NE BIBLIA JIZHI: “Na joo rgi søø ma ri soya na ndajme ke dya ngextrjo ma ri pɇpji na zɇzhi je nzikja ke gi nee ri zꞹrꞹ ne ndajma” (Eclesiastés 4:6).
Puede que también le interese
¡DESPERTAD!
Pje ra kjaji ko yo hora yo ri pɇsʼiji
Ma gi nee ke ra pesʹi nguenda kʼo ri tsjaa ko in jyadʼꞹ ni jyodʼꞹ ri ñuu pje i kjaa ko in zakꞹ. ¿ Jargi tsjayo?
