Ma ra pombꞹji yo dyaja nee ra mama ke dya me ra mbentrjoji ma o tsjakꞹji na sʼoo ñe dya kja ra søji na ꞹꞹ kja in mꞹbʼꞹji. Nuyo, dya nee ra mama ke dya ra potpꞹji nguenrra kʼe nrrumꞹ o ra manji ke dya pje o kjogꞹ.

NE BIBLIA JIZHI: “Ri pøtki pɇspʼiji paciencia. Ri pøtki perdonaogeji ma kjo pje ra tsjaʼkʼꞹji. Nuts’k’eji o perdonats’ꞹgeji e Jesucristo. Ngek’ua xo ri perdonageji k’o in dyoji” (Colosenses 3:13).

“Ma gi s’iyage ni suu o ni xira, dya ri tsotrʼpꞹ ñiʼi ma dya ra mbedye na joo kʼo kjaa, kʼo ri pɇsʼi nguenrra nge ma pjongꞹ o kuɇ ngekʼua ra tsjaa kʼo na joo” (Aaron).

Ma ri nuu na ꞹꞹ yo dyaja bʼꞹma ri sødye ñe dya ri zøʼø na joo kja in mꞹbʼꞹ, xo dya søø ri jokꞹbi yo ndumꞹ ko ni suu o ni xira.

“Dʼa nu paa, in xira go xitsi ke ro pombꞹ nange o tsjaa kʼo me go zichʼi kja in mꞹnkʼo. Me ma sʼɇzhtrjo ro pombꞹ, pe ro pombꞹ. Kʼo dya ro søgø na joo nge ke dya ro pombꞹ dabadiji. Ma rgo pombꞹ dabaditrjo dya ro supjregøbʼe na punkjꞹ” (Julia).

ÑUU JA GA NGETSʼKʼE

Ma pje ra tsjakʼꞹ ni suu o ni xira ke ri søø na ꞹꞹ in mꞹbʼꞹ, tsjijñige:

• ¿Kjo me gi søxige dabadiji?

• ¿Me ni jyodʼꞹ ra dyotkʼꞹ ri pombꞹ o søø ri jyombeñetrjo?

RI ÑAGEBIYO KO NI SUU O NI XIRA

• ¿Janzi ga mezhe ke ri potka pombꞹbi?

• ¿Pje søø ra kjagøbi ngekʼua dya ra mezhe ra potka pombꞹbi?

NU KʼO SØØ RI TSJAA

• Ma ni suu o ni xira ra tsjaa kʼꞹ ra zøʼø na ꞹꞹ in mꞹbʼꞹ, dya ri mange ke a ba nekʼua.

• Mbeñe ja ga zøʼø ni xira o ni suu, ri mbeñe “ri texeji ri kjaji na punkjꞹ kʼo na sʼoo [o nde ri jyopꞹji]” (Santiago 3:2).

“Dya na sʼɇzhi ra potka pombꞹbi ma nzayebi nge in sʼokꞹbi, pe nda na sʼɇzhtjo ma ri kjijñibi ke ngextrjo dʼaja kʼꞹ nge ꞹ sʼokꞹ. Ni jyodʼꞹ me ra ndeptjoji ma kjo ra dyotkʼꞹ ri pombꞹ” (Kimberly).

NE BIBLIA JIZHI: “Ma pje ko ri tsjapꞹji na sʼoo naja yo nin minteji, ma ra zintsʼiji kja juesi, ri joʼtpʼꞹji ma kja ri pøtkjeji kja ʼñiji” (Mateo 5:25).