¿Ja ra tøtrʼꞹji nu esperanza kʼꞹ na kjuana?

Kjijñige ma rgui pɇsʼi na relo, kjanu ne relo bo sʼodʼꞹ, nakʼua rgui jñꞹnꞹ nu ja ra jokꞹtsʼꞹji, ya i ñuge na punkjꞹ kʼo jokꞹ yo relo, pe pje nrre naño ba manji. Nakʼua na ntee ke i chextøbi kja in ngumꞹ ra xitsʼi ke angeze pa̱ra̱ ja rga jokʼꞹ ne relo, nange nge kʼꞹ o dyⱥtrʼⱥ, ñe ma ra jokʼꞹ nu relo dya pje ri tsjontrʼꞹ. ¿Ja rgi søge ma rgui kjogꞹkʼo?

Kʼꞹ relo chjenjui ne esperanza. Ma ri unkʼe nguenrra ke dya gi pɇsʼi na punkjꞹ esperanza​—nange ri bʼꞹnkʼøji yo paa kʼꞹ me na sʼɇzhi​—, ¿kjo nge kʼꞹ søø ra mbøxkꞹjima? Bʼꞹbʼꞹ ntrʼee ke manji ke pje nrre ra dyakꞹji ngekʼua xi ra pɇsʼiji esperanza, pe texe kʼo manji dya ri meyaji ñe ba potꞹji kʼo manji. Ngekʼua, ¿na joo ra tʼⱥtʼⱥji ajmi e Diosi kʼꞹ o dyⱥkøji ñe kʼꞹ dʼakøji esperanza kʼꞹ na kjuana? Ne Biblia mama “Dya je̱e̱ bʼꞹbʼꞹ Mizhokjimi ko nuzgøji” ñe xo nee ra mbøxkꞹji Hechos 17:27; 1 Pedro 5: 7).

¿Pje nee ra mama ke ra pɇs’iji esperanza?

Yo mama ne Biblia de nu esperanza mazi na joo ke yo manji yo médico, yo científico ñe yo psicólogo. Mi jingua ma o dyopjꞹji ne Biblia, kʼo ntee mi pɇspiji nguenda pje mi nee ro mama nu esperanza, nu jñaa original esperanza ke o dyopjꞹji mi jingua kja ne Biblia nee ra mama. Ne esperanza ngeje kʼo ri tenkʼøji nrreze amboo kja in mꞹbʼꞹji ke na kjuana ra sⱥjⱥ, nangeje nge e Diosi ajensʼe ke ra dyakøji kʼo ri tenji, dya ngeje yo ntee.

Ne esperanza ko ne fe nzi kja ke dʼakjatrjobi pe dya chjenjui. Nu fe nge kʼo ri creoji ñe nu esperanza nge kʼo ri tenji (Hebreos 11:⁠1). Kja ne Biblia ba jñaa de nu fe ñe nu esperanza (1 Corintios 13:13).

Chjenjui nzakja naja ke ri jogøji: ma pje ra øtꞹji ri tebʼeji ke ra mbøxkꞹji, dya ra xitsiji ke iyo, nange a ri ɇdyiji kjɇɇ ke ri pa̱rgøji na joo ja ga nge angeze, a ro unꞹji nguenda ke me na jonte, ngekʼua ri pa̱rgøji ke ra dyakꞹji kʼo ni jyongꞹji. Texezꞹji yo ri matrʼꞹjiKjimi ni jyodʼꞹ ra pɇsʼiji esperanza ñe fe. Pe, ¿pje ra kjaji ngekʼua ra pɇsʼiji nu esperanza ke na kjuana?

¿Pjenga ri pɇsʼji esperanza?

E Jehová nge kʼꞹ dʼakji esperanza kʼꞹ na kjuana. Mi jingua ma o dyopjꞹji ne Biblia bo manji ke mi nge “nu esperanza de Israel” (Jeremías 14:⁠8). Nu esperanza ke mi pɇsʼi nu jñijñi Israle mi nge e Jehová ke mi unꞹ. Kꞹ mi xipji e Jehová ke ro unꞹ angezeji nge kʼo mi tenji ñe texe kʼo paa ke o bʼꞹbʼꞹji yo Israelita e Jehová o tsjaa texe kʼo o mama. Ngekʼua e Josué ke mi ngeje caudillo a Israel bo mama: “Nutsʼkʼeji i pa̱rgeji ke texe kʼo o mama e Jehová je ba kjogꞹ akjanu, ni ri dʼa jñaa bo bʼɇzhi” (Josué 23:14).

Zø a kjogꞹ na punkjꞹ kjɇɇ xegakjatjo e Jehová. Kja nee Biblia bʼꞹbʼꞹ na punkjꞹ profecía, ñe texe kʼo ba nⱥdʼⱥ ix bo kjogꞹ nzakja kʼe paa ke bo ju̱sʼꞹji. Ngekʼua ri manji ke ne Biblia nge na libro ke dʼakji esperanza nange, ngeje o jñaa e Yose.

Ngekʼua ri manji ke ne Biblia nge na libro ke dʼakji esperanza. Kʼꞹ jmachʼa jmanchʼa ra pa̱ra̱ji kʼo ra dyakji e Diosi a texezꞹji a ma xojñi, nukʼo ra mbøxkꞹji ra pɇsʼiji esperanza. Kʼe apostol Pablo bo mama: “Texe kʼo o tʼopjꞹ mi jingua, je bi tʼopjꞹkʼo, kʼꞹ rga xørꞹji ngekʼua ra pa̱ra̱gøji. Ngekʼua ra tebʼeji na joo Mizhokjimi. Yo o jñaa Mizhokjimi yo tʼopjꞹ jitsiji ra sɇchiji, nde ra mⱥjⱥji” (Romanos 15:⁠4).

¿Pje ma esperanza dʼakji e Diosi?

¿Jingua mazi ni jyodʼꞹji ra pɇsʼiji esperanza? ¿Nge ma ri søji a ra tu̱ji? Pe na punkjꞹ ntee ma ra nrru̱u̱ dʼa o pjamilia nge ma na sʼɇzhtrjo ra pɇsʼiji esperanza, nangeje dya bʼꞹbʼꞹ na nrrumꞹ ke mazi na sʼɇzhi nzakja ma ra tu̱ji, me sichʼi in mꞹbʼꞹjiyo. Dya søø ra minkʼøji na punkjꞹ paa ñe dya søø ra tsʼasʼꞹji ke ra tu̱ji. Ngekʼua ne Biblia mama ke “e Cristo kʼꞹ rgi nguarꞹ ra ndo̱pꞹji, nge e muerte” (1 Corintios 15:26).

Nuʼma, ¿ja ga mbøxkꞹji ne esperanza ma ra nrru̱u̱ dʼa in pjamilia? Kja ne versículo ke kja ro nuji mama ke ngextjo e Jesús søø ra tsjaa ke “dya kja xe ra tu̱ji“. E Jehová mazi na zɇzhi ke kʼꞹ tsjakꞹji ra tu̱ji, a bo tsjaa na punkjꞹ ke ñetsʼe ke nge akjanu. ¿Pjenga ri manjikʼo? Kja ne Biblia nⱥdʼⱥ 9 ntee ke a bi nrru̱ji ñe e Jehová nrro go xosꞹ ko nu o zɇzhkjimi.

E Jehová o unꞹ o espiritu santo o trʼii e Jesús ngekʼua ro xosꞹ e Lázaro ke mi jobi angeze, zø a mi ɇdyi 4 paa ke bo nrru̱u̱. Dya go tsjo̱jo̱, o xosꞹ ma mi bʼꞹbʼꞹ na punkju ntee (Juan 11:​38-48, 53; 12:​9, 10).

Bʼꞹma ri mange, ¿pjenga o xosꞹji kʼo ntrʼee nangeje ma o kjogꞹ kʼo paa go titaji ñe nrro go ndu̱ji? Na kjuanakʼo, pe ma ra xørꞹji kja ne Biblia ke na kjuana bo xosꞹji 9 ntee ke abi nrru̱ji, søø ra pɇsʼiji esperanza ke na kjuana ke dʼa nu paa nrro ra chjeji in pjamilia ke a nrru̱ji. ¿Eko me ri mⱥkjøji ri tebʼejikʼo?

E Jesús bo mama: “Nuzgø ngetsʼkø ra xosꞹ kʼo ya ndu̱u̱” (Juan 11:25). Jehová ra unꞹ o espiritu santo e Jesús ngekʼua ra xosꞹ kʼo ntee ke a go nrru̱ji. E Jesús xo go mama: “Ra e̱je̱ nu paa ma ra dyⱥtkⱥ in jñagø texe kʼo a ndu̱u̱. Texeji ra mbesʼeji kʼua ja tʼøgꞹji” (Juan 5:​28, 29). Ngekʼua texe kʼo a go nrru̱ji pɇsʼiji esperanza ke nrro ra xosꞹji ñe ra ka̱ra̱ji kja ne xoñijomꞹ kʼꞹ me rga zøø.

Kʼe profeta Isaías bo mama ja rga kjaa ma ra yepe ra xosꞹji kʼo ya nrru̱u̱. Bo mama: “Tr’exe yo in ntr’ege yo ya nrruu, ra yepe ra mimiji. Yo ya nrru̱u̱ ra nangaji. ¡Ñangajidya ñe me ri mⱥjⱥji trʼexetsʼꞹji kʼꞹ mi jomꞹtrjoji! Nange ngetsʼkʼeji nzakja nu xaʼa kʼꞹ jⱥⱥ ma xo̱rtjo, ñe ne xoñijoma ra jyɇzi ra yepe ra mimi yo ya nrru̱u̱” (Isaías 26:​19, Versión Popular).

¿Eko na kjuana me ri mⱥji ke ri pa̱ra̱jikʼo? Nudya kʼo a nrru̱ji dya kja kjogꞹji ndumꞹ, dya kja supjreji, na pjørꞹji, ixi chjenjui kʼꞹ ro bꞹnji amboo kja o pjeme na nana. Xo e Palesito ajensʼe me na zɇzhi nangeje mbeñe na joo texe kʼo ya nrru̱u̱ (Lucas 20:​37,​38). Ngekʼua dya kja ra mezhe ma e Diosi ra yepe ra xosꞹ kʼo a nrru̱ji, akjanꞹ søø ra minji kja ne xoñijomꞹ kʼu me rga zøø texe yo paa. Nzakja na lele ke kja o musʼꞹ o nana, me mⱥjⱥ nu pjamilia. Nudya ri unꞹji nguenda ke jesta ma ri tu̱ji søø ra pɇsʼiji esperanza, nangeje e Diosi ra yepe ra xoshkꞹji.

Ne esperanza søø ra mbøxkꞹji

Kʼe apostol Pablo jitsiji ke me na joo ra pɇsʼiji esperanza. Ne esperanza chjenjui nzakja kʼe trʼɇzi ke junsʼꞹ a ñiji kʼo xundaro ma pa chu̱ji (1 Tesalonicenses 5:⁠8). ¿Pje nee ro mamayo? Kʼo pakʼo ma kʼo xondaro mi pa chu̱ji mi junsʼꞹji na trʼɇzi kja o ñiji, mi ngeje na gorro de fieltro o de cuero, ngekʼua ma mi pjatrʼꞹji kʼo xundaro dya mi tu̱ji. Kʼe trʼɇzi ke ngeje na yelmo kobʼꞹ o ñiji, akjanu ne esperanza pjorꞹ in ñiji, in pjeñeji ñe kʼo ri kjijñiji. Ma ri pɇsʼiji ne esperanza ke na kjuana ke mama ne Biblia dya ra bʼꞹbʼꞹ pje ra su̱ji ni xi ra bʼꞹbʼꞹ pje ra kjakꞹji ra søxiji na punkjꞹ ma ra kjogꞹji nrrumꞹ. ¿Kjo nge kʼꞹ dya ra nee kʼe trʼɇzi ke ra ngobʼꞹ a ñiʼi nzakja na xundaro?

Kʼe apostol Pablo xi go mama na jñaa ke me na joo ra pjønguenrraji, bo mama: “Ne esperanza ke ri pɇsʼiji nge nzakja na ancla ke pjøxkꞹji ra sɇchiji” (Hebreos 6:19). Kʼe apostol Pablo mi pa̱ra̱ na joo ja ga kjaa kʼe ancla nangeje mi nzhodʼꞹ na punkjꞹ kja kʼe trʼazapjꞹ. Ma mi e̱je̱ na trʼadyebʼe ko zꞹndajma kʼe ancla mi pa̱ntrʼa̱ji ngekʼua ro ngibʼi jesta amboo kja trʼazapjꞹ, akjanu dya ro pꞹmꞹ kʼe barco, ñe dya ro chꞹtrʼꞹ e ndajma i dya ro pjatrʼꞹ kja yo nrrojo.

Xo akjanu, ma ra ejmeji kʼꞹ ra tsjaa kʼo mama Mizhokjimi nge “ne esperanza [...] ke pjøxkꞹji ra sɇchiji”, nuyo ra mbøxkꞹji ra unkøji nguenda pje ma paa ri ka̱rgøji. E Jehová mama ke ra sⱥjⱥ nu paa ma dya kja ra søji ja na ꞹꞹ, yo ntee dya kja ra chu̱ji ñe dya kja ra tu̱ji (jñanra nu recuadro kja nu pagina 10). Kʼꞹ ra enchʼeji kja in mꞹbʼꞹji ne esperanza ra mbøxkꞹji ra kjaji kʼo nee e Diosi nangeje yo paa yo ri bʼꞹnji me na sʼoo yo kjaji yo ntee

Ne esperanza kʼe dʼakji e Yose xo nge pa nutsʼkʼe ke gi xørge ne nskuama. Angeze nee ke ri mimi na joo texe yo paa nzakja mi jingua ma o mbʼꞹrꞹ ne xoñijomꞹ. Angeze nee ke texe ”yo ntee ra bʼꞹbʼꞹtrjoji”. ¿Ja rga kjayo? Kʼo ni jyodʼꞹ nge ke texe yo ntee “ra mba̱ra̱ji kʼo na kjuana” kʼo ju̱sʼꞹ kja o Jñaa e Diosi (1 Timoteo 2:⁠4). Kʼo ri ⱥtrʼⱥjme ne skuama ri negøjme ke ri pa̱rge kʼo na kjuana kʼo mama ne Biblia. Ne esperanza ke dyakøji Mizhokjimi mazi na kjuana ñe mazi na mubi ke ne esperanza ke dyakøji yo ntee.

Ne esperanza pjøxkꞹji ngekʼua dya ra søxiji na punkjꞹ ma ri pɇsʼiji ndumꞹ. E Mizhokjimi kjakꞹji ra sɇzhiji in mꞹbʼꞹji ngekʼua ra minji janzi ga nee angeze (2 Corintios 4:7; Filipenses 4:13). Nu esperanza nge kꞹ ni jyongꞹzꞹji. Ngekʼua ma gi nee, ri chøtrʼꞹ ne esperanza ke me na mubi ñe ra mbøxkʼꞹ na punkjꞹ texe yo paa.

[Nu recuadro/nu retrato]

Pjenga ra pɇsʼiji esperanza

Yo Jñaa ke ba e̱je̱ kja ne Biblia søø ra mbøxkꞹji ra pɇsʼiji esperanza:

◼ Mizhokjimi xitsiji ke a ma xojñi ra mⱥji na punkjꞹ.

Nu Jñaa angeze mama ke ne xoñojomꞹ ra mbɇzhi na paraiso, nu ja søø ra minji na punkjꞹ ntee ñe me ra mⱥji​(Salmo 37:11, 29; Isaías 25:8; Apocalipsis 21:​3, 4).

◼ E Diosi dya søø ra mama mbɇchjine.

Angeze me ꞹmbꞹ texe yo mama mbɇchjine. E Jehová dya pɇsʼi nzhubꞹ ñe me jyaxtrjo; ngekʼua dya søø ra mama mbɇchjine​(Proverbios 6:​16-​19; Isaías 6:​2, 3; Tito 1:2; Hebreos 6:​18).

◼ O zɇzhi e Diosi dya søø ra trjeze.

Ngextrjo e Jehová nge kʼꞹ mazi na zɇzhi. Dya bʼꞹbʼꞹ ajensʼe ñe kja ne xoñijomꞹ kjo ra tsʼasʼꞹ ke ra tsjaa nu kʼo nee angeze​(Éxodo 15:11; Isaías 40:25, 26).

◼ E Palesito ajensʼe nee ke ra minji texe yo paa.

​(Juan 3:​16; 1 Timoteo 2:​3, 4.)

◼ Mizhokjimi janrrazꞹji ko esperanza.

Angeze nuʼu yo na joo kʼo ri kjaji, dya  pɇsʼi nguenda ma ri jyopꞹji (Salmo 103:12-​14; 130:3; Hebreos 6:​10). Angeze tebʼe ke ra kjaji kʼo na joo, ñe me mⱥjⱥ ma ri kjajiyo​(Proverbios 27:11).

◼ Mizhokjimi mama ke ra mbøxkꞹji ma ri nee ra kjaji kʼo na joo.

Yo ri matrʼꞹji e Jehová pjexi bʼꞹbʼꞹ pje ra su̱ji. Nangeje Mizhokjimi dakøji o zɇzhi kʼꞹ pjøxkꞹji​(Filipenses 4:​13).

◼ Ngextrjo e Mizhokjimi dʼakøji esperanza kʼꞹ na kjuana.

Ngextrjo angeze søø ra ejmeji, nange dya xitsiji mbɇchjine​(Salmo 25:3).

[Yo retrato]

Nzakja na yelmo kobʼꞹ in ñiʼi ne esperanza pjorꞹ in ñiʼi

[Yo retrato]

Nzakja na ancla , ne esperanza pjøxkꞹji na punkjꞹ

[Kʼo o tsjaji]

Por gentileza de René Seindal/Su concessione del Museo Archeologico Regionale A. Salinas di Palermo