Søø ra to̱mpꞹji ke ri manji dya pje dyezgøji

¿Ja rgi nuji yo nrrumꞹ yo ri kjogꞹjidya? Kʼuanzi rga trjꞹrꞹji ne trʼønꞹ ba ñetse ja ga ngezgøji. Ngekʼo manji yo me pa̱ra̱ji, ke texezꞹji ri pɇsʼiji nrrumꞹ, zø nge akjanu bʼꞹbʼꞹ kʼo mazi to̱gꞹ o mꞹbʼꞹji ke xe yo dyaja. ¿Pjenga bʼꞹbʼꞹ ntee ke zø kjogꞹji nrrumꞹ xi nee ra minji, pe bʼꞹbʼꞹ ntee ke ma kjogꞹji nrrumꞹ dya kja pje nee ra kjaji?

Nzakja ma dʼa ntee pa jodʼꞹ bʼɇpji ñe ma ra xiji ke dya søø ra unꞹji kʼe bʼɇpji, ¿jarga zøʼø kʼe ntee? Bʼꞹma ra søxi ñe ra mbeñe ke dya kja ra tøtrʼꞹ bʼɇpji xo ra mama: “Dya kjo ra dyakʼø bʼɇpji, pje ra kjagødya”. Kʼo na kjogꞹ bʼꞹma ra mama je rga nge akjanu texe yo paa ñe ra ngijñi: “Dya pje ni dyezgø nange dya kjo nee ra dyakʼø bʼɇpji“. Kʼꞹ kjijñi akjanu dya ra tsjaa kʼo ni jyodʼꞹ angeze.

Ja rga to̱mpꞹji ngekʼua dya ra kjijñiji akjanu

¿Pje ni jyodʼꞹ ra kjaji ngekʼua dya ra manji ke dya bʼꞹbʼꞹ pje søø ra kjagøji ñe dya dyezgøji? Kʼꞹ ra kjaji nge kʼꞹ ra unꞹji nguenda ke dya pjøxkꞹji ra kjijñiji akjanu. Mazi na joo ra manji ke dya go dyakøji kʼe bʼɇpji nange dya mi jodʼꞹji ne bʼɇpji kʼꞹ ri kjagø.

Mbeñege pje ni mbe kʼo na joo kʼo i kjage. Ke dya go dyakji kʼe bʼɇpji, dya nee ra mama ke dya gi pɇpjige na joo. Ra unꞹji nguenda kʼo na joo yo a ri kjajidya, nzakja —ma ri matrʼꞹjikjimi, ma ri bʼꞹnji kʼo in pjamilia ñe ma ri jmurꞹji ko in kjuarma ñe yo in kju̱u̱ kja jmurkjimi—. Ngekʼua ma ri pɇsʼiji ndumꞹ dya ra manji ke ra kjogꞹ kʼo dya bʼe kjogꞹ. Ja̱a̱, ra kjijñiji na joo nange ra sⱥjⱥ nu paa ke ra tøtrʼꞹji bʼɇpji zø dya nge kʼo ri negøji.

Ra kjijñiji ke kʼo ra nee ra kjaji ra mbedye na joo

Yo paa yo ri ka̱ra̱jidya bʼꞹbʼꞹ ntee yo me pa̱rtoji, manji ke nu esperanza pjøxkꞹji ra kjaji kʼo ni jyongꞹji. Yo parrafo ke bʼꞹbʼꞹ a xojñi ra nuji ke ne esperanza dya ngextrjoyo, kʼꞹ ra pa̱ra̱ji pjøxkꞹji na punkjꞹ søø ra kjaji kʼo ni jyongꞹji. Ndizidya, ra kjijñiji na joo ñe ra pa̱ra̱ji ke a ma xojñi søø ra kjaji kʼo ri neji.

Ndizidya, na joo ra kjaji yo ni jyodʼꞹ ra kjaji, ra pjonguenrraji na joo pje ri nee ra kjaji a ma xojñi dya ngextrjo kʼo ri kjaji pama pama. Kʼꞹ ra kjaji texezꞹji nge ke ra øntsʼɇji, ¿ri pa̱ra̱ji kʼo ri nee ra kjaji nudya ñe a ma xojñi? Nrreze mi jingua kja ne Biblia o ju̱sʼꞹji yo jñaa ke me pjøxkꞹji, mama ke me na joo ra pa̱ra̱ji “kʼo me ni mubi ra kjaji” (Filipenses 1:​10).

Ma a ri pa̱ra̱ji pje ni jyongꞹji, ri unꞹji nguenda pje nge kʼo mazi na mubi, nzakja in pjamilia, in bʼɇpjiji o ma ri matrʼꞹjikjimi. Me na joo ra kjaji ngextrjo yo søø ra kjaji, ra juajnꞹji pje ni mbe kʼo ja̱a̱ søø ra kjajidya. Kʼo xi ra mextrjo ra kjaji, jmanchʼa jmanchʼa ra kjaji ngekʼua dya ra søxiji.

Bʼꞹbʼꞹ na jñaa ke mama, “ma pje ri nee ri tsjaa søø ri tsjaa”, mejme ne jñaa. Na joo ra unꞹji nguenrra pje ni mbe kʼo me na mubi ra kjaji, ñe ja ga mbøxkꞹjiyo. Ngekʼua ma bʼꞹbʼꞹ kʼo ra kaxkꞹji, ra pjongꞹ in kueji ñe ra kjaji kʼo ni jyongꞹji nange ri pa̱ra̱ji ke me na mubiyo ñe ra mbøxkꞹji.

Ra pjonguendaji na joo pje ni mbe kʼo ri nee ra kjaji. Kʼe Autor C. R. Snyder a go nuʼu ja ga mbøxkꞹji ne esperanza, xitsiji ni jyodʼꞹ ra kjaji kʼo pje nrre ri nee ra kjaji, ra yepeji ra yepeji jesta ma ra kjaji kʼo na joo kʼo ri neji.

E Snyder xo bo mama jingua ra potpꞹji kʼo ri kjaji ma dya ra mbedye na joo kʼo ri neji, ngekʼua dya ra søxiji ma dya pedye na joo. Ra unꞹji nguenrra ke xi bʼꞹbʼꞹ kʼo søø ra kjaji, nujyo pjøxkꞹji ra pɇsʼiji esperanza ke ra kjaji kʼo ri neji.

Kja ne Biblia ri tøtrʼꞹji kʼo o kjogꞹ kʼe rey David. Angeze mi nee ro jyⱥbⱥ o ngumꞹ e Jehová, pe e Jehová o xipji ke iyo. Nange kʼꞹ ro jyⱥbⱥ o ngꞹmꞹ e Jehová mi ngeje nu trʼii ke mi chju̱u̱ Salomón. David dya go ꞹdʼꞹ, dya o jyɇzi ro søxi o mꞹbʼꞹ. Kʼo go tsjaa angeze o jmutꞹ kʼo mi jyodʼꞹ ngekʼua e Salomón søø ro jyⱥbʼⱥ kʼe templo nzi go mama e Jehová (1 Reyes 8:​17-19; 1 Crónicas 29:​3-7.

Manke ra pɇsʼiji esperanza xi ra bʼꞹbʼꞹ nrrumꞹ ke dya søø ra jokꞹji ñe nujyo ra tsjapꞹ ra søxiji ñe ra to̱gꞹ in mꞹbʼꞹji. Ja̱a̱, texe ne xoñijomꞹ bʼꞹbʼꞹ na punkjꞹ ntee ke —tu̱ji trjimi, chu̱ji, sødyɇji, pøtrʼꞹjintee ñe pje nrre kjaji kʼo na sʼoo—, ¿ja rga mⱥjⱥ in mꞹbʼꞹji ma ri jandaji texeyo o ma ri kjogꞹjiyo?

[Yo retrato]

Ma dya ra unꞹji kʼe bʼɇpji kʼꞹ nee angeze, ¿nujyo nee ra mama ke dya kja ra chøtrʼꞹ bʼɇpji?

[Yo retrato]

E David dya go ꞹdʼꞹ ni o jyɇzi ro søxi o mꞹbʼꞹ