Dji ne boud besse teuteli wa mi yebai miez de. Djong mekeul messe ne Zembe ngue deug bouo ne nwa nkow ne bouo. Veda baw dji ne, beu ngue balane ne yebai chou bawbaw I sa. (O Corinthien 2 4:3, 4; 11:13-15) Being ne vale beu ngue teigne mi kouolong mi mekeul de, milga mi yebai mi chougale I jilngane, goule boud wa milga meyong, me domb, ne djagle balane ne I keukague. Mbia sa chou fouamai o mbougla o Zembe!​—Longue Mathieu 24:3-5, 11, 12.

Wala fouamai yebai I ngue goumale Zembe, mi yebai mia bebaw mi mpi gne. Mi ngue djigli mi tadga mi tsougai Bible de, ngue teigne idjong chou me Zembe ne chou mi moung. Veda Johova me dji ne boud beu mpougue bebelai chou sa I tsia ne gne.​—Longue Ezechiel 18:4; Timothee 1 2:3-5.

Mintague misse ne, Zembe gna djagai mi yebai mi tsi ne beu tsiel gne I ndoul yida beu ne beu tsiel chi me Satane. (Jak 4:4) Kalad Zembe ngue djaw bawbaw mi yebai miez mi ni ne “Babylone a Boubouague.” Babylone gna beu ngouala a yag komb bawbaw yebai ya taide mpesse mpeung medjouo a wala me Noe. Fouala I mousse kounekoune, Zembe me ze kouague bawbaw mi yebai mi chiigue ne tsibli boud.​—Longue Mi Ndeiguia mi Jan 17:1, 2, 5, 16, 17; 18:8.

Molga djong mekeul messe nang. Johova gna woussayai boud wa teuteli besse bawbaw mi yebai mi louandla chi de. A ngue syngue bouo chou djiglile bouo bebelai.​—Longue Michee 4:2, 5.

Johova me nwa know ne boud beu tsiel sa djisse bebelai ne gnouale. A ngue chile ne beu leilegue wouosse bawbaw mi yebai de. Bongue beu tsiel Zembe bey sa mi mbi miez tsendle chou tsielele gne.​—Longue Mi Ndeiguia mi Jan 18:4.

Seung a chouchouogou, dja boud beu tsiel o teuteli ba gouag djong mekeul wa apostel ba djiaw bouo, ba yalane ne mintague. Beu mou djigli djong tsig Johova ngue louo, tsig ne fouamai bougue chou melou me zag ma. Besse djong I youg chou djissou mousse ne tsie dja ba gouag djong mekeul ba magle, ka teul Johova chouog I sa biez bouode tsig de.​—Longue O Thessalonicien 1 1:8, 9; 2:13.

Johova ngue chouasse gnede synguia de o mbougla bongue ba me miasse bawbaw mi yebai wa. Ngue bi me magle ndjouwoulou ossessa ye, biey beu chouo ye, ndjaw boud a gougouane ne tsieli o mbougla me Johova de, ne tsig a melou mez.​—Longue Marc 10:29, 30; O Corinthien 2 6:17, 18.

Gouaguelele ne bawbaw mi yebai mi ze chine djisse djong mekeul. I ze yile chi gniez mekouglou de. Ya beulai gningue beu ne bawbaw mi yebai mi djimbale boud ne wa zamdane chi de. Boud bez beu ba tsigue leida fouamai yebai ngoud me Zembe de.​—Longue Mi Ndeiguia mi Jan 18:20, 21; 21:3, 4.