KĨŨRIA KĨA 6
Nĩatĩa Mpũũmba Kũrega Gwatĩkwa nĩ Bangĩ?
NĨATĨA ŨŨGWE ŨŨMBA KŨTHITHIA?
Ũthũgaania: Brian akwoona aritwa baĩrĩ beejĩte kĩrĩ we, aigua kĩu kĩojũra rũũjĩ. Nĩbageretie o jaĩrĩ kiumia gĩkĩ kũmũkundia thigara. Rĩrĩ rĩkethĩrwa rĩrĩ rĩa jathatũ.
Mũtaana wa mbere akauga:
“Kinya naarua ũrĩ wenka? Tiga nkwonie mũcoore.”
Akainyĩĩria kiugo “mũcoore” akiunaga riitho, akarita gĩntũ mũukone jwawe akanenkeeria Brian.
Brian akoona mũtaana ũu agwete thigara. Rũũjĩ rũkoojũra kĩu nkũrũki.
Brian akauga: “Itũ arĩ. Indĩkĩtie gũkwĩra ũũni ntĩ . . . ”
Mũtaana wa baĩrĩ agatonyeera: “Tiga ũguaa!”
Brian agaciaa ũcamba akauga “ntĩgũkĩra!”
Mũtaana wa baĩrĩ akarĩkĩĩra Brian njara gĩturo akamwĩra abooreri, “jũkia tu.”
Mũtaana wa mbere agaikaikia thigara ũthiũne bwawe akamwĩra na kĩoya: “Gũtĩwe tũkeera. Gũtĩwe ũkoromenya.”
Ũrĩngĩĩthĩrwa nĩgwe Brian, ũrĩngĩthithia atĩa?
AMBA ŨTHŨGAANIE!
Ataana bau-rĩ, ibathũgaanĩrĩtie bwega ũrĩa bakũthithia? Nĩbaituĩrĩte matua? Kwombĩka batiituĩrĩte. Na njĩra ĩngĩ, ka betĩkĩĩrĩtie bangĩ babatoongeria. Batĩkwenda kũregwa, kwou barekete bangĩ babatuĩra matua.
Ũrĩngĩcemania na ũntũ ta bũu, nĩatĩa ũrĩngĩthithia ũtĩgaatĩkwe nĩ bangĩ?
-
ITHURANĨRE
Bibiria yugaga: “Muntu uri na mathuganio noonaga ugwati bwijite, na agaiciitha; indi baria biaa ibakurukaga beetite na mbere, nabo iboonaga ikaanukia.”—Njuno 22:3.
Kaingĩ no wone thĩĩna ĩĩjĩte. Ngerekano, a tuuge ũkwona gĩkundi kĩa barĩa ũthoomaga nabo au mbere bakĩnyua thigara. Kwĩrĩgĩĩra thĩĩna gũgatũma ũthuranĩra ũrĩa ũkathithia.
-
THŨGAANIA
Bibiria yugaga: “Karageni na mathuganio jati na nkanja.”—1 Petero 3:16.
Ciũrie, ‘Nkaigua atĩa nyumene kethĩra nkareka ntawa nĩ mwingĩ?’ Nĩ mma no wĩtĩkĩĩrue nĩ bangĩ ĩgiita rĩĩkai. Ĩndĩ ũkaigua atĩa nyumene? Nũkwenda gwikaana kenda tu ũgwĩria aritwa bangĩ?—Kuuma 23:2.
-
TUA ĨTUA
Bibiria yugaga: “Muntu umuume nakiraga.”—Njuno 14:16.
Nandĩ kana nyumene, twinthe no mwanka twituĩre matua na tũtũũre na maumĩĩra. Bibiria ĩtwĩraga bwegie arũme ta Jusufu, Ayubu na Jesũ, barĩa baatuĩre ĩtua rĩagĩrĩte. Kinya nĩ yugaga bwegie Kaini, Esau, na Judasi, barĩa baatuĩre matua jamathũũku. Nĩatĩa ũũgwe ũkathithia?
Bibiria yugaga: “Uthithagie wega.” (Zaburi 37:3) Ũkeethĩrwa nũrĩĩkĩtie kũthũgaanĩria maumĩĩra na watua ĩtua, ũkoona bũũthi mono kuuga arĩa ũrũngi, na maumĩĩra jakethĩrwa jabuugi.
Ũgaacumbũka—to mwanka ũthoomere aritwa bangĩ. Kuuga akĩ ARĨ ũrĩna ũcamba, no kũng’ane. Kana kenda wonania mũrũngamo jwaku jũtĩkũgarũka, no uuge:
-
“Ni ntĩo!”
-
“Ntĩthithagia mantũ ta jau!”
-
“A, kabũtĩmbijĩ?”
Ũntũ bwa bata nĩ kuuga o rĩo na ũtĩna nkaanja. Wathithia ũu, ũkarigara kwona ũrĩa aritwa bangĩ bakarekana naagwe ntũti!
KŨŨMBANA NA GŨCIKŨŨRWA
Wetĩkĩĩria gwatĩkwa nĩ bangĩ, ũgakara ta roboti ĩgũtongeerua nĩbo
A antũ ba nthukĩ yaaku bagagũcikũũra? A bakeeja gũkwĩra, “Nĩmbi ĩĩna thĩĩna gwe—ka ũrĩ kĩguaa?” Menya gwatĩkwa kũũ, nĩ kwa wĩthĩre tu. Ũũmba kũthithia atĩa? Wĩna mantũ akuĩ jaĩrĩ ja kũthithia.
-
No wĩtĩkĩĩrie. (“Nĩ mma, nĩngũkĩra!” Rĩu ũbataarĩrie na ũkuĩ gĩtũmi gĩaku.)
-
Kinya gwe no ũbaũmĩrie. Beere gĩtũmi gĩaku gĩa kũrega, na ũboonie nĩkĩ bũu bakũthithia nĩ waa. (“Ntĩkwĩrĩgĩĩra antũ baboome banyua thigara!”)
Kethĩra bageeta na mbere gũgũcikũũra, ciĩtĩre! Riikana o ũrĩa ũgakara au, no u gwatĩkwa gũkongeereka. Gũciĩtĩra gũkoonania ũtĩkũreka bangĩ bakũgarũra.
Ũmma nĩ atĩ, ũtĩũmba gwiciithĩra gwatĩkwa. Ĩndĩ no ũtue ũrĩa ũkwenda kũthithia, uuge mũrũngamo jwaku, na witongeerie. Mũthiene, ĩtua nĩ rĩaku!—Joshua 24:15.
