KĨTHOOMO KĨA 28
Onania Nkaatho Tontũ bwa Jarĩa Jehova na Jesũ Baakũthithĩĩrie
Nĩatĩa wigagua rĩrĩa mũcoore akwa kĩewa gĩkĩthongi? Kwombĩka, nĩgĩtũmaga ũkagwĩrua mono na ũkenda kwonia mũcoore waaku atĩ ũrĩna nkaatho. Jehova na Jesũ nĩbaatwere kĩewa kĩrĩa kĩnene buru nkũrũki ya bionthe birĩa tũrĩngĩ kwewa. Kĩewa kĩu nĩkĩrĩkũ, na nĩatĩa tũũmba kwonania tũrĩna nkaatho tontũ bwa kĩo?
1. Nĩ njĩra ĩrĩkũ ĩmwe tũũmba kwonania nkaatho tontũ bwa ũrĩa Jehova na Kristũ baatũthithĩĩrie?
Bibiria ĩrĩna wĩrane atĩ ‘muntu kinya uriku uria ugeetikia’ Jesũ omba gũtũũra kenya na kenya. (Johana 3:16) Nĩta kuuga atĩa kwĩthĩrwa na wĩtĩkio? Nũbatara kũthithia jamaingĩ nkũrũki ya gwĩtĩkia Jesũ akĩ. Kinya nĩtũkũbatara kwonania wĩtĩkĩo gũkũrũkĩĩra matua jarĩa tũgũtua na mantũ jarĩa tũkũthithia. (Jakubu 2:17) Rĩrĩa tũkwonania wĩtĩkio bwetũ kĩrĩ jarĩa tũkũthĩthia na jarĩa tũkuuga, nĩtwĩkagĩra ũcoore bwetũ inya amwe na Jesũ na Ĩthe Jehova.—Thooma Johana 14:21.
2. Nĩ ũntũ bũrĩkũ bwa mwanya bũtũtethagia kwonania nkaatho cietũ tontũ bwa jarĩa Jehova na Jesũ baatũthithĩĩrie?
Ũgoro mbere akũa, Jesũ nerĩre athingati baawe bwegie njĩra ĩngĩ irĩa boomba kwonania nkaatho tontũ bwa kĩgongwana kĩawe. Naambĩrĩĩrie kĩatho kĩrĩa kijĩkene ta “kiatho kia Mwathani” kana Mũriikana jwa Gĩkuũ kĩa Jesũ. (1 Akorintho 11:20) Jesũ naambĩrĩĩrie kĩatho kĩu nĩkenda atũmwa baawe—na Akristũ bonthe ba mma nyumene—boomba kũriikana atĩ narĩtĩre mwoyo jwawe tontũ bwetũ. Ũntũne bwegie kĩatho kĩu, Jesũ naathanĩre ũjũ: “Thithagieni uju nikenda bundiikanaga.” (Luka 22:19) Rĩrĩa weja kĩrĩ Mũriikana, nĩ wonanagia ũrĩna nkaatho tontũ bwa wendo bũbũnene bũrĩa Jehova na Jesũ boonanĩrie tontũ bwetũ.
ĨNJA NKŨRŨKI
Iritane njĩra ingĩ irĩa ũũmba kwonania atĩ ũrĩna nkaatho tontũ bwa wendo bũbũnene bũrĩa Jehova na Jesũ boonanĩrie. Ona nĩkĩ Mũriikana jwa gĩkuũ gĩa Kristũ bũrĩ ũntũ bwa bata mono.
3. Nĩatĩa tũũmba kũthithia kenda twonania tũrĩna nkaatho
Ũthũgaania worokerete rũũjĩne na muntũ agakwonokia. No ũrĩrue na mpwĩ bwegie ũntũ bũu mtũ ũu aakũthithĩĩrie? Kana ũrĩngĩcwa njĩra cia kũmwonia atĩ ũrĩna nkaatho tontũ bwa ũntũ bũu aakũthithĩĩrie?
Tũrĩ na kaanya ga kwona mwoyo jwa kenya na kenya tontũ bwa kĩao kĩa Jehova. Thooma 1 Johana 4:8-10, rĩu bwarĩĩrie biũria bibi:
-
Nĩkĩ kĩgongwana kĩa Jesũ kĩrĩ kĩewa kĩa mwanya?
-
Nĩatĩa ũkwigua bwegie ũrĩa Jehova na Jesũ baakũthithĩĩrie?
Nĩatĩa tũũmba kwonania tũrĩ na nkaatho tontũ bwa ũrĩa Jehova na Jesũ baatũthithĩĩrie? Thooma 2 Akorintho 5:15 na 1 Johana 4:11; 5:3. Nyuma ya kũthooma o ĩandĩko arĩĩrieni kĩũria gĩkĩ:
-
Kũringana na ĩandĩko rĩu, nĩatĩa tũũmba kũthithia kenda twonania tũrĩ na nkaatho?
4. Igerekanie na Jesũ
Njĩra ĩngĩ tũũmba kwonania nkaatho, nĩkwigerekania na Jesũ. Thooma 1 Petero 2:21, rĩu bwarĩĩrie kĩũria gĩkĩ:
-
Nĩ na njĩra ĩrĩkũ ũũmba kũthingata makinya ja Jesũ na njĩra ĩnjega?
Jesũ neendete Rũteto rwa Mũrungu, agatũmĩĩria nkuma ĩnjega, na agatethia antũ bangĩ
5. Ĩta Mũriikanene jwa gĩkuũ kĩa Kristũ
Kenda wona nĩatĩa gwakarĩkĩre kĩrĩ kĩatho kĩa mbere kĩa Biakũrĩa bia Mwathani, thooma Luka 22:14, 19, 20. Rĩu bwarĩĩrie biũria bibi:
-
Nĩatĩa gwakarĩkĩre kĩrĩ kĩatho kĩa biakũrĩa bia ũgoro bia Mwathani?
-
Mũgate na ndibei birũngamagĩĩra mbi?—Tega mũstaarĩ jwa 19 na 20.
Jesũ eendaga aritwa baawe bathithia Mũriikana jwa gĩkuũ kĩawe o rĩmwe mwaka tarĩki ĩrĩa aakuĩre. Kwou, Akũũjĩ ba Jehova bacemanagia o rĩmwe mwaka kũriikana gĩkuũ gĩa Kristũ na njĩra o ĩrĩa aathanĩre. Kenda wiritana bwegie mũcemanio jũjũ jwa gĩtũmi, tega VIDIO. Rĩu bwarĩĩrie kĩũria kĩrĩa kĩthingatĩte.
-
Nĩatĩa gũkarĩkaga kĩrĩ kĩatho kĩa Mũriikana?
Mũgate na ndibei bitumagĩrwa bĩrĩ into bia kũrũngamĩĩra. Mũgate jũrũngamagĩĩra mwĩrĩ jũmũũjũru jwa Jesũ jũrĩa aaritĩre jũrĩ kĩgongwana tontũ bwetũ. Ndibei ĩrũngamagĩĩra tharike yaawe
ANTŨ BAMWE BAUGAGA: “Nĩmbĩtĩkĩĩrĩtie Kristũ arĩ mwathani na mwonokia wa nkoro yakwa, gũtĩ ũntũ bũngĩ kinya bũrĩkũ nkũbatara kũthithia.”
-
Nĩatĩa ũũmba gũtumĩra Johana 3:16 na Jakubu 2:17 kũbonia atĩ kũrĩ na ũntũ bũngĩ nkũrũki bũkwendekana?
NA NJĨRA ĨNKUĨ
Twonanagia nkaatho cietũ kĩrĩ bũrĩa Jesũ atũthithĩĩre na njĩra ya kwĩthĩrwa na wĩtĩkio kĩrĩ we na gwĩta Mũriikanene jwa gĩkuũ kĩawe.
Gũcookera
-
Nĩ kũũga atĩa kwĩthĩrwa na wĩtĩkio kĩrĩ Jesũ?
-
Nĩ na njĩra ĩrĩkũ ũũmba kwenda kwonania nkaatho ciaku tontũ bwa jarĩa Jehova na Jesũ baakũthithĩĩrie?
-
Nĩkĩ bũrĩ ũntũ bwa gĩtũmi gwĩta kĩrĩ Mũriikana jwa gĩkuũ gĩa Kristũ?
CŨNKŨŨNA
Nĩatĩa gĩkuũ gĩa Kristũ gĩtũmaga tũthithia?
Iritane nkũrũki bwegie wĩtĩkio na ũrĩa tũũmba kũbwonania.
“Onania Wĩtĩkio Kĩrĩ Mawĩrane Ja Jehova” (Mnara wa Mlinzi, Oktoba 2016)
Iritane ũrĩa ũtũũro bwa mwekũrũ ũmwe bwagarũkĩre arĩgũciũkĩrwa nĩ ũrĩa kĩgongwana gĩa Kristũ kĩmwegie.
“Bibiria Nĩgarũraga Ũtũũro” (Mnara wa Mlinzi, Agasti 1, 2011)
Iritane nĩkĩ antũ baakai barĩjaga mũgate na kunyua ndivei ĩgiita rĩa mũriikana.
